ଆଙ୍କାଇଲୋଜିଂ ସ୍ପଣ୍ଡିଲାଇଟିସ୍ ରୋଗ ସମ୍ପର୍କରେ ସଚେତନତା ଓ ରୋଗୀଙ୍କୁ ସହାୟତା ପ୍ରଦାନ ଲକ୍ଷ୍ୟରେ ‘ସ୍ୱର’ର ଶୁଭାରମ୍ଭ

71

ଭୁବନେଶ୍ୱର, ୨୨ ନଭେମ୍ବର ୨୦୨୬: ଆଙ୍କାଇଲୋଜିଂ ସ୍ପଣ୍ଡିଲାଇଟିସ୍ (Ankylosing Spondylitis) ରୋଗ ସମ୍ପର୍କରେ ଜନସଚେତନତା ସୃଷ୍ଟି, ଶୀଘ୍ର ରୋଗ ଚିହ୍ନଟ, ଉପଯୁକ୍ତ ଚିକିତ୍ସା ଏବଂ ରୋଗୀଙ୍କୁ ସାମାଜିକ ସହଯୋଗ ପ୍ରଦାନ କରିବା ଉଦ୍ଦେଶ୍ୟରେ ଓଡ଼ିଶା ଆର୍ଥ୍ରାଇଟିସ୍ ଆଣ୍ଡ ରିଉମାଟୋଲୋଜି ଫାଉଣ୍ଡେସନ୍ ଟ୍ରଷ୍ଟ (OARFT) ପକ୍ଷରୁ ‘SWARA’ (Supporting Warriors of Ankylosing Spondylitis by Raising Awareness)ର ଶୁଭାରମ୍ଭ ଭୁବନେଶ୍ୱରସ୍ଥିତ ଗୀତଗୋବିନ୍ଦ ସଦନଠାରେ ମହାସମାରୋହରେ ଅନୁଷ୍ଠିତ ହୋଇଯାଇଛି।
ଏହି ଉଦ୍‌ଘାଟନୀ ସମାରୋହରେ ଓଡ଼ିଶା ସରକାରଙ୍କ ସ୍ୱାସ୍ଥ୍ୟମନ୍ତ୍ରୀ ଡ଼ଃ ମୁକେଶ ମହାଲିଙ୍ଗ ମୁଖ୍ୟ ଅତିଥି ଭାବେ ଯୋଗଦେଇ SWARAର ଶୁଭାରମ୍ଭ କରିଥିଲେ। ସମ୍ମାନିତ ଅତିଥି ଭାବେ ଓଡ଼ିଶା ରାଜ୍ୟ ମହିଳା ଆୟୋଗର ଅଧ୍ୟକ୍ଷା ଶ୍ରୀମତୀ ଶୋଭନା ମହାନ୍ତି, କୋରେଇ ବିଧାନସଭା ନିର୍ବାଚନମଣ୍ଡଳୀର ବିଧାୟକ ଶ୍ରୀ ଆକାଶ ଦାସନାୟକ ଏବଂ ଏକାମ୍ର-ଭୁବନେଶ୍ୱର ବିଧାନସଭା ନିର୍ବାଚନମଣ୍ଡଳୀର ବିଧାୟକ ଶ୍ରୀ ବାବୁ ସିଂ ଯୋଗଦେଇଥିଲେ।
ଆଙ୍କାଇଲୋଜିଂ ସ୍ପଣ୍ଡିଲାଇଟିସ୍ ଏକ ଦୀର୍ଘକାଳୀନ ପ୍ରଦାହଜନିତ ରୋଗ, ଯାହା ମୁଖ୍ୟତଃ ମେରୁଦଣ୍ଡ ଓ ଅନ୍ୟାନ୍ୟ ଗଣ୍ଠିକୁ ପ୍ରଭାବିତ କରିଥାଏ। ଏହି ରୋଗ ସାଧାରଣତଃ ଯୁବାବସ୍ଥାରେ ଦେଖାଦେଇଥାଏ। ଅନେକ ସମୟରେ ଏହାର ପ୍ରାରମ୍ଭିକ ଲକ୍ଷଣକୁ ସାଧାରଣ ଅଣ୍ଟାବିନ୍ଧା ବୋଲି ଭାବି ଅଣଦେଖା କରାଯାଏ। ଫଳରେ ରୋଗ ଚିହ୍ନଟ ଓ ଚିକିତ୍ସାରେ ବିଳମ୍ବ ହୋଇଥାଏ। ଓଡ଼ିଶାରେ ପ୍ରାୟ ପ୍ରତି ୫୦୦ ଜଣଙ୍କ ମଧ୍ୟରୁ ଜଣେ ଏହି ରୋଗରେ ଆକ୍ରାନ୍ତ ହୋଇଥାଇପାରନ୍ତି ବୋଲି ଆକଳନ କରାଯାଉଛି।
ଏହି କାର୍ଯ୍ୟକ୍ରମରେ ପ୍ରାୟ ୩୦ ଜଣ ଆଙ୍କାଇଲୋଜିଂ ସ୍ପଣ୍ଡିଲାଇଟିସ୍ ରୋଗୀ, ୨୦ ଜଣ ଡାକ୍ତର ଏବଂ ୨୦୦ ଜଣ ଅତିଥି ଯୋଗଦେଇଥିଲେ। ରୋଗୀମାନଙ୍କ ଅନୁଭୂତି, ସଂଘର୍ଷ ଓ ଜୀବନଯାତ୍ରାକୁ ଗୁରୁତ୍ୱ ଦେବା ସହିତ ଏହି ରୋଗ ସମ୍ପର୍କରେ ସମାଜରେ ଥିବା ଭ୍ରାନ୍ତ ଧାରଣା ଦୂର କରିବା ଉପରେ ଆଲୋକପାତ କରାଯାଇଥିଲା।
ଏହି ଅବସରରେ ଆୟୋଜିତ ଆଲୋଚନାଚକ୍ରରେ ଶ୍ରୀ ମନୋରଞ୍ଜନ ମିଶ୍ର, ଶ୍ରୀମତୀ ବର୍ଷା ପ୍ରିୟଦର୍ଶିନୀ, ଡ଼ଃ ବିଜୟ କୁମାର ମହାପାତ୍ର, ଡ଼ଃ ଜୟନ୍ତ କୁମାର ପଣ୍ଡା ଏବଂ ଶ୍ରୀ ନିଶିକାନ୍ତ ମହାପାତ୍ର ଅଂଶଗ୍ରହଣ କରି Ankylosing Spondylitis (AS) ସମ୍ପର୍କିତ ବିଭିନ୍ନ ବିଷୟ ଉପରେ ନିଜର ମତାମତ, ଅନୁଭୂତି ଓ ଦୃଷ୍ଟିକୋଣ ରଖିଥିଲେ। ଏହି ଆଲୋଚନା SWARA ଅଭିଯାନର ଉଦ୍ଦେଶ୍ୟକୁ ଆହୁରି ସୁଦୃଢ଼ କରିବା ସହ ରୋଗୀଙ୍କ ମଧ୍ୟରେ ସଚେତନତା ଓ ସମର୍ଥନ ବୃଦ୍ଧି କରିବାରେ ସହାୟକ ହୋଇଥିଲା।
ଏହି ଅଭିଯାନର ପ୍ରମୁଖ ପ୍ରେରଣାଦାତା ତଥା ଓଡ଼ିଶା ଆର୍ଥ୍ରାଇଟିସ୍ ଆଣ୍ଡ ରିଉମାଟୋଲୋଜି ଫାଉଣ୍ଡେସନ୍ ଟ୍ରଷ୍ଟ (OARFT)ର ପ୍ରତିଷ୍ଠାତା ପ୍ରଫେସର ଡା. ଜ୍ୟୋତି ରଞ୍ଜନ ପରିଡ଼ାଙ୍କ ଦୂରଦୃଷ୍ଟି ଓ ପ୍ରୟାସରେ ଏହି SWARA ଅଭିଯାନର ଶୁଭାରମ୍ଭ ହୋଇଛି। ସେ MBBS, MD (Internal Medicine), DM (Rheumatology) ଏବଂ FRCP (London) ଡିଗ୍ରୀଧାରୀ ତଥା ଭୁବନେଶ୍ୱରସ୍ଥିତ Odisha Arthritis & Rheumatology Center (OARC)ର ବରିଷ୍ଠ ପରାମର୍ଶଦାତା ରିଉମାଟୋଲୋଜିଷ୍ଟ ଓ ଅଟୋଇମ୍ୟୁନ୍ ରୋଗ ବିଶେଷଜ୍ଞ। ଆଙ୍କାଇଲୋଜିଂ ସ୍ପଣ୍ଡିଲାଇଟିସ୍ ସମ୍ପର୍କରେ ଜନସଚେତନତା ବୃଦ୍ଧି, ରୋଗୀଙ୍କୁ ଠିକ୍ ସମୟରେ ରୋଗ ଚିହ୍ନଟ ଓ ଚିକିତ୍ସାର ସୁଯୋଗ ଦେବା ସହିତ ସେମାନଙ୍କୁ ଆବଶ୍ୟକୀୟ ସହଯୋଗ ଓ ସମର୍ଥନ ଯୋଗାଇଦେବା ଏହି ଅଭିଯାନର ମୁଖ୍ୟ ଉଦ୍ଦେଶ୍ୟ।
OARFT ପକ୍ଷରୁ କୁହାଯାଇଛି ଯେ, ‘SWARA’ କେବଳ ଗୋଟିଏ ଦିନର ସଚେତନତା କାର୍ଯ୍ୟକ୍ରମ ନୁହେଁ, ବରଂ ଏହା ଏକ ଦୀର୍ଘକାଳୀନ ଜନଆନ୍ଦୋଳନ। ଏହା ମାଧ୍ୟମରେ ରୋଗର ପ୍ରାରମ୍ଭିକ ଲକ୍ଷଣ ଚିହ୍ନଟ, ଠିକ୍ ସମୟରେ ବିଶେଷଜ୍ଞଙ୍କ ପରାମର୍ଶ, ସଠିକ୍ ନିଦାନ ଓ ଚିକିତ୍ସା ସହିତ ରୋଗୀ ଓ ସେମାନଙ୍କ ପରିବାରକୁ ଆବଶ୍ୟକ ସହଯୋଗ ଯୋଗାଇବା ଉପରେ ଗୁରୁତ୍ୱ ଦିଆଯିବ।
ଏହି ପଦକ୍ଷେପ ମାଧ୍ୟମରେ ରୋଗୀ, ଡାକ୍ତର, ସ୍ୱାସ୍ଥ୍ୟକର୍ମୀ, ନୀତି ନିର୍ଦ୍ଧାରକ ଓ ସାଧାରଣ ଜନତାଙ୍କୁ ଏକାଠି କରି ଓଡ଼ିଶାରେ ଆଙ୍କାଇଲୋଜିଂ ସ୍ପଣ୍ଡିଲାଇଟିସ୍ ରୋଗୀଙ୍କ ପାଇଁ ଏକ ସୁଦୃଢ଼ ସହଯୋଗୀ ପରିବେଶ ସୃଷ୍ଟି କରିବା ଟ୍ରଷ୍ଟର ମୁଖ୍ୟ ଲକ୍ଷ୍ୟ।

Comments are closed, but trackbacks and pingbacks are open.