ଭୁବନେଶ୍ୱର: ଶିଶୁ ଦିବସରେ ବାର୍ଷିକ ଶିଶୁ ମହୋତ୍ସବ ‘କୋଟିଏ ହସ’ର ଅବସରରେ ଓଡିଶା ସରକାରଙ୍କ ମହିଳା ଓ ଶିଶୁ ବିକାଶ ବିଭାଗ ପକ୍ଷରୁ ଭୁବନେଶ୍ୱର ହରିନଗର ସ୍ଥିତ ମଇଁଷିଖାଲରେ ଉପ ମୁଖ୍ୟମନ୍ତ୍ରୀ ପ୍ରଭାତୀ ପରିଡାଙ୍କ ଉପସ୍ଥିତିରେ ଏହି କୋଟିଏ ହସ, କୋଟିଏ ସ୍ୱପ୍ନ ଓ ଭବିଷ୍ୟତର ନୂଆ ସଂକଳ୍ପ କାର୍ଯ୍ୟକ୍ରମ ଅନୁଷ୍ଠିତ ହୋଇଛି । ସୁସ୍ଥ ଓ ଆନନ୍ଦମୟ ଶୈଶବ ଗଠନରେ ଅଭିଭାବକଙ୍କ ଅଧିକ ସମ୍ପୃକ୍ତି ପାଇଁ ଉପମୁଖ୍ୟମନ୍ତ୍ରୀ ଆହ୍ୱାନ ଦେଇଛନ୍ତି । ଶିଶୁର ପ୍ରାରମ୍ଭିକ ବର୍ଷ ଗୁଡିକରେ ସ୍ନେହ, ଯତ୍ନ, ମମତା ହିଁ ପିଲାଟିର ଭବିଷ୍ୟତ ମୂଳଦୂଆ ପକାଏ । ତେଣୁ ଶିଶୁଙ୍କ ଭାବପ୍ରବଣ , ସାମାଜିକ ଓ ବୌଦ୍ଧିକ ବିକାଶରେ ସହାୟକ ହେଉଥିବା ପାରମ୍ପରିକ ନାନାବାୟା ଗୀତ, ଗପ ଓ ଆନନ୍ଦମୟ ଭାବ ବିନିମୟକୁ ସଂର କ୍ଷିତ କରିବା ଉପରେ ଗୁରୁତ୍ୱରୋପ କରିଛନ୍ତି ପ୍ରଭାତୀ ପରିଡା । ଏହି କାର୍ଯ୍ୟକ୍ରମରେ ଜନ୍ମରୁ ୩ ଓ ୩ରୁ ୬ ବର୍ଷର ପିଲାଙ୍କ ପାଇଁ ପୃଥକ କାର୍ଯ୍ୟକ୍ରମ ପ୍ରସ୍ତୁତ ହୋଇଥିଲା । ଆକ୍ଟିଭିଟି କଣ୍ଣର୍ରରେ ପିଲାଙ୍କ ଉଦ୍ଦେଶ୍ୟରେ ଥିବା ପ୍ରଦର୍ଶନୀର ଭରପୁର ଉପଭୋଗ କରିଥିଲେ ଉପ ମୁଖ୍ୟମନ୍ତ୍ରୀ । ଶିଶୁମାନେ ଅଭିନୟ, ଗୀତ, ନୃତ୍ୟ, ଗପ କହିବା ଏବଂ ଚିତ୍ରାଙ୍କନ ପ୍ରତିଯୋଗିତାରେ ଅଂଶଗ୍ରହଣ କରି ସେମାନଙ୍କର ସୃଜନଶୀଳତା ଓ ପ୍ରତିଭା ପ୍ରଦର୍ଶନ କରିଥିଲେ। ମାନନୀୟା ଉପମୁଖ୍ୟମନ୍ତ୍ରୀ ଶ୍ରୀମତୀ ପ୍ରଭାତୀ ପରିଡ଼ା ବିଭିନ୍ନ ପ୍ରତିଯୋଗିତାର ବିଜେତାମାନଙ୍କୁ ପୁରସ୍କାର ଓ ପ୍ରମାଣପତ୍ର ପ୍ରଦାନ କରିଥିଲେ। ରାଜ୍ୟସ୍ତରୀୟ କାର୍ୟ୍ୟକ୍ରମ ବ୍ୟତୀତ, ଓଡ଼ିଶାର ସମସ୍ତ ଅଙ୍ଗନବାଡ଼ି କେନ୍ଦ୍ରରେ ‘କୋଟିଏ ହସ’ପାଳନ କରାଯାଇଥିବା ବେଳେ ଜିଲ୍ଲା ସଦର ମହକୁମା ନିକଟସ୍ଥ ମନୋନୀତ ଆଦର୍ଶ ଅଙ୍ଗନବାଡ଼ି କେନ୍ଦ୍ରଗୁଡ଼ିକରେ ସ୍ୱତନ୍ତ୍ର ଜିଲ୍ଲାସ୍ତରୀୟ କାର୍ୟ୍ୟକ୍ରମ ଆୟୋଜିତ ହୋଇଥିଲା।
Comments are closed, but trackbacks and pingbacks are open.