ବ୍ରହ୍ମପୁର: ଦକ୍ଷିଣାଞ୍ଚଳ ରାଜସ୍ୱ ଆୟୁକ୍ତ (ଆରଡିସି) ବିଜୟ ଅମୃତା କୁଲାଙ୍ଗେ ଲୋକଙ୍କ ସମସ୍ୟା ଓ ଅଭିଯୋଗର ଶୀଘ୍ର ସମାଧାନ ପାଇଁ ନୂଆ ପଦକ୍ଷେପ ନେଇଛନ୍ତି | ସେ ନିଜର ମୋବାଇଲ୍ ନମ୍ବରକୁ ସୋସିଆଲ୍ ମିଡିଆ ‘ଏକ୍ସ’ରେ ସେୟାର କରି ଦକ୍ଷିଣ ଓଡ଼ିଶାର ଲୋକଙ୍କୁ ସେମାନଙ୍କ ସମସ୍ୟା ଜଣାଇବାକୁ ଅନୁରୋଧ କରିଛନ୍ତି। ଏଣିକି ଅଭିଯୋଗ ଜଣାଇବା ପାଇଁ ଲୋକଙ୍କୁ ବ୍ରହ୍ମପୁରସ୍ଥିତ ଆରଡିସି କାର୍ଯ୍ୟାଳୟକୁ ଯିବାକୁ ପଡ଼ିବ ନାହିଁ। ଫୋନ୍ କିମ୍ବା ହ୍ୱାଟ୍ସଆପ୍ ଜରିଆରେ ମଧ୍ୟ ସେମାନେ ନିଜ ସମସ୍ୟା ଜଣାଇପାରିବେ। ଦକ୍ଷିଣାଞ୍ଚଳ ଆରଡିସିଙ୍କ ଅଧୀନରେ ଗଞ୍ଜାମ, ଗଜପତି, କନ୍ଧମାଳ, କୋରାପୁଟ, ମାଲକାନଗିରି, ନବରଙ୍ଗପୁର, କଳାହାଣ୍ଡି ଓ ରାୟଗଡ଼ା ଜିଲ୍ଲା ରହିଛି। ଏହି ୮ଟି ଜିଲ୍ଲାର ଲୋକେ ନିଜ ଅଞ୍ଚଳର ଅସମ୍ପୂର୍ଣ୍ଣ କାମ, ସରକାରୀ ସେବାରେ ସମସ୍ୟା ଓ ଅନ୍ୟାନ୍ୟ ଅଭିଯୋଗ ସମ୍ପର୍କରେ ତାଙ୍କୁ ଜଣାଇପାରିବେ। ଏଥିସହ ସମସ୍ୟା ସମ୍ପର୍କିତ ଫଟୋ ଓ ଲିଖିତ ଅଭିଯୋଗ ମଧ୍ୟ ପଠାଇପାରିବେ। ଅଭିଯୋଗଗୁଡ଼ିକୁ ସମ୍ପୃକ୍ତ ଜିଲ୍ଲା ପ୍ରଶାସନ ସହ ସମନ୍ୱୟ ରଖି ସମାଧାନ କରିବାକୁ ଉଦ୍ୟମ କରାଯିବ ବୋଲି ସେ କହିଛନ୍ତି। ଆର୍ଡିସିଙ୍କ ଅନୁସାରେ, ଏହାଦ୍ୱାରା ଅଭିଯୋଗ ଉପରେ ଶୀଘ୍ର ପଦକ୍ଷେପ ନେବା ସହ ସମସ୍ୟାର ସମାଧାନ କରିବା ସହଜ ହେବ । ସୂଚନା ଥାଉ ଯେ, ଏହି ପଦକ୍ଷେପ ଘୋଷଣା ହେବାର ଦୁଇ ଦିନ ମଧ୍ୟରେ ୧୫୦ରୁ ଅଧିକ ଅଭିଯୋଗ ଆସିସାରିଲାଣି। ସେଥିମଧ୍ୟରୁ କିଛି ଅଭିଯୋଗର ସମାଧାନ ମଧ୍ୟ ହୋଇଥିବା ଜଣାପଡ଼ିଛି ।
Comments are closed, but trackbacks and pingbacks are open.