ନୂଆଦିଲ୍ଲୀ: ନେପାଳ ପ୍ରଧାନମନ୍ତ୍ରୀ ବାଲେନ୍ ଶାହ ଦୁଇ ଦିନିଆ ଗସ୍ତରେ ଭାରତ ଆସିଛନ୍ତି। ପ୍ରଧାନମନ୍ତ୍ରୀ ଦାୟିତ୍ୱ ଗ୍ରହଣ କରିବା ପରେ ଏହା ତାଙ୍କର ପ୍ରଥମ ଭାରତ ତଥା ପ୍ରଥମ ବିଦେଶ ଗସ୍ତ। ଏହି ଗସ୍ତ ସମୟରେ ସେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଏବଂ ରାଷ୍ଟ୍ରପତି ଦ୍ରୌପଦୀ ମୁର୍ମୁଙ୍କୁ ଦୁଇଟି ଐତିହାସିକ ପ୍ରତିମା ଉପହାର ଦେବେ। ସେ ପ୍ରଧାନମନ୍ତ୍ରୀ ମୋଦୀଙ୍କୁ ରାତୋ ମଚ୍ଛିନ୍ଦ୍ରନାଥଙ୍କ ପ୍ରତିମା ପ୍ରଦାନ କରିବେ। କାଠମାଣ୍ଡୁ ଉପତ୍ୟକାରେ ପୂଜିତ ଏହି ଦେବତା ନେପାଳର ଧାର୍ମିକ, ସାଂସ୍କୃତିକ ଏବଂ ଐତିହାସିକ ପରିଚୟ ସହ ଗଭୀର ଭାବେ ଜଡ଼ିତ। ପାରମ୍ପରିକ ନେପାଳୀ ବିଶ୍ୱାସ ଅନୁଯାୟୀ, ଲିଚ୍ଛଭି ରାଜବଂଶର ରାଜା ନରେନ୍ଦ୍ର ଦେବ ବର୍ତ୍ତମାନର ଆସାମରୁ ରାତୋ ମଚ୍ଛିନ୍ଦ୍ରନାଥଙ୍କୁ କାଠମାଣ୍ଡୁ ଉପତ୍ୟକାକୁ ଆଣିଥିଲେ। ସେହିପରି ନେପାଳ ପ୍ରଧାନମନ୍ତ୍ରୀ ରାଷ୍ଟ୍ରପତି ମୁର୍ମୁଙ୍କୁ କାଠମାଣ୍ଡୁର ଚାବାହିଲରେ ଅବସ୍ଥିତ ଚାରୁମତି ବିହାର ସହ ଜଡ଼ିତ ଏକ ପ୍ରତିମା ପ୍ରଦାନ କରିବେ। ଏହି ମଠର ଇତିହାସ ମୌର୍ଯ୍ୟ ସମ୍ରାଟ ଅଶୋକ ଏବଂ ତାଙ୍କ କନ୍ୟା ଚାରୁମତିଙ୍କ ସହ ସମ୍ପୃକ୍ତ। ପାରମ୍ପରିକ କାହାଣୀ ଅନୁଯାୟୀ, ସମ୍ରାଟ ଅଶୋକ ତାଙ୍କ କନ୍ୟାଙ୍କ ସହ କାଠମାଣ୍ଡୁ ଉପତ୍ୟକାକୁ ଯାଇଥିଲେ। ପରବର୍ତ୍ତୀ ସମୟରେ ଚାରୁମତି ସ୍ଥାନୀୟ ରାଜକୁମାର ଦେବପାଳଙ୍କୁ ବିବାହ କରି ଦେବପାଟନ ଅଞ୍ଚଳରେ ବସତି ସ୍ଥାପନ କରିଥିଲେ। ସେଠାରେ ସେ ଏହି ମଠ ପ୍ରତିଷ୍ଠା କରିବା ସହ ଶେଷ ନିଃଶ୍ୱାସ ତ୍ୟାଗ କରିଥିଲେ ବୋଲି ବିଶ୍ୱାସ କରାଯାଏ।
Comments are closed, but trackbacks and pingbacks are open.