ସମ୍ଭାବ୍ୟ ବାତ୍ୟା ମୁକାବିଲା ପାଇଁ ପ୍ରଶାସନ ହାଇ-ଆଲର୍ଟ: ପ୍ରସ୍ତୁତି ସମୀକ୍ଷା କଲେ ମୁଖ୍ୟ ଶାସନ ସଚିବ

27

ଭୁବନେଶ୍ବର: ସମ୍ଭାବ୍ୟ ବାତ୍ୟା ମୁକାବିଲା ନିମନ୍ତେ ରାଜ୍ୟ ସରକାରଙ୍କ ପକ୍ଷରୁ ସଜାଗ ଓ ସକ୍ରିୟ ପଦକ୍ଷେପ ନିଆଯାଉଛି। ପ୍ରଶାସନିକ ପ୍ରସ୍ତୁତିକୁ ଅଧିକ ସୁଦୃଢ଼ କରିବା ଉଦ୍ଦେଶ୍ୟରେ ସମସ୍ତ ବିଭାଗକୁ ସତର୍କ ରଖାଯାଇଥିବା ମୁଖ୍ୟ ଶାସନ ସଚିବ ଅନୁ ଗର୍ଗ କହିଛନ୍ତି। ଲୋକସେବା ଭବନରେ ବିଭିନ୍ନ ବିଭାଗର ବରିଷ୍ଠ ପଦାଧିକାରୀଙ୍କ ଉପସ୍ଥିତିରେ ଏକ ସମୀକ୍ଷା ବୈଠକ ଆୟୋଜନ କରି ସେ ସାମଗ୍ରିକ ସ୍ଥିତିର ଅନୁଧ୍ୟାନ କରିଛନ୍ତି। ଏହି ବୈଠକରେ ସବୁ ଜିଲ୍ଲାପାଳଙ୍କୁ ସତର୍କ ଦୃଷ୍ଟି ରଖିବାକୁ ନିର୍ଦ୍ଦେଶ ଦିଆଯାଇଛି, ବିଶେଷ କରି ଉପକୂଳ ଜିଲ୍ଲାଗୁଡ଼ିକ ପାଇଁ ସ୍ୱତନ୍ତ୍ର ସତର୍କତା ଜାରି କରାଯାଇଛି। ସମୁଦ୍ରରେ ପ୍ରତିକୂଳ ପରିସ୍ଥିତି ସୃଷ୍ଟି ହେବାର ସମ୍ଭାବନା ଥିବାରୁ ମତ୍ସ୍ୟଜୀବୀମାନଙ୍କୁ ସମୁଦ୍ରକୁ ନ ଯିବାକୁ ସତର୍କ କରାଯାଇଛି ଏବଂ ବର୍ତ୍ତମାନ ସମୁଦ୍ର ମଧ୍ୟରେ ଥିବା ମତ୍ସ୍ୟଜୀବୀଙ୍କୁ ତୁରନ୍ତ ସୁରକ୍ଷିତ ଭାବେ କୂଳକୁ ଫେରିଆସିବାକୁ ପରାମର୍ଶ ଦିଆଯାଇଛି। ନିମ୍ନାଞ୍ଚଳ ଓ ଉପକୂଳବର୍ତ୍ତୀ ବାସିନ୍ଦାଙ୍କୁ ନିରାପଦ ସ୍ଥାନକୁ ନେବା ପାଇଁ ସମସ୍ତ ବାତ୍ୟା ଆଶ୍ରୟସ୍ଥଳୀକୁ କାର୍ଯ୍ୟକ୍ଷମ ରଖାଯାଇଛି। ଆଶ୍ରୟସ୍ଥଳୀରେ ରନ୍ଧା ଓ ଶୁଖିଲା ଖାଦ୍ୟ, ପିଇବା ପାଣି, ଅତ୍ୟାବଶ୍ୟକ ଔଷଧ ଏବଂ ଆଲୋକର ସୁବ୍ୟବସ୍ଥା ରଖିବାକୁ କୁହାଯାଇଛି। ଲୋକଙ୍କୁ ସ୍ଥାନାନ୍ତର କରିବା ବେଳେ ଗର୍ଭବତୀ, ବୟସ୍କ, ଶିଶୁ ଓ ଦିବ୍ୟାଙ୍ଗ ବ୍ୟକ୍ତିଙ୍କୁ ଅଗ୍ରାଧିକାର ଓ ସ୍ୱତନ୍ତ୍ର ସହାୟତା ଯୋଗାଇଦେବାକୁ ପ୍ରଶାସନକୁ ନିର୍ଦ୍ଦେଶ ରହିଛି। ବାତ୍ୟା ଚାଲିଗଲା ପରେ କ୍ଷୟକ୍ଷତି ଭରଣା ଓ ସେବା ପୁନଃସ୍ଥାପନ ପାଇଁ ବିଦ୍ୟୁତ୍ ବିଭାଗକୁ ଆବଶ୍ୟକ ସାମଗ୍ରୀ ସହ ମରାମତି ଟିମ୍ ପ୍ରସ୍ତୁତ ରଖିବାକୁ କୁହାଯାଇଛି, ଯାହାଦ୍ୱାରା ବିଦ୍ୟୁତ୍ ଯୋଗାଣ ଶୀଘ୍ର ସ୍ୱାଭାବିକ ହୋଇପାରିବ। ଏଥିସହ ପାନୀୟ ଜଳ ବଣ୍ଟନ, ରାସ୍ତା ସଫେଇ ଏବଂ ଜରୁରୀ ଚିକିତ୍ସା ପାଇଁ ଡାକ୍ତର ଓ ସ୍ୱାସ୍ଥ୍ୟ କର୍ମୀଙ୍କୁ ସଜାଗ ରଖାଯାଇଛି। ଜରୁରୀ ଉଦ୍ଧାର ଓ ସହାୟତା ପାଇଁ ଓଡ୍ରାଫ୍, ଏନଡିଆରଏଫ୍ ଏବଂ ଅଗ୍ନିଶମ ସେବାକୁ ସମ୍ପୂର୍ଣ୍ଣ ପ୍ରସ୍ତୁତ ରଖାଯାଇଛି। ପାଣିପାଗ ବିଭାଗର ପ୍ରତ୍ୟେକ ପୂର୍ବାନୁମାନ ଓ ସୂଚନା ଉପରେ ସରକାର କଡ଼ା ନଜର ରଖିଛନ୍ତି ଏବଂ ଆବଶ୍ୟକତା ମୁତାବକ ତୁରନ୍ତ ପଦକ୍ଷେପ ନିଆଯିବ ବୋଲି ମୁଖ୍ୟ ଶାସନ ସଚିବ ସ୍ପଷ୍ଟ କରିଛନ୍ତି। ଲୋକେ କୌଣସି ପ୍ରକାର ଗୁଜବରେ କାନ ନ ଦେଇ କେବଳ ସରକାରୀ ଓ ନିର୍ଭରଯୋଗ୍ୟ ସୂଚନାକୁ ଅନୁସରଣ କରିବାକୁ ସେ ଅନୁରୋଧ କରିଛନ୍ତି।

Comments are closed, but trackbacks and pingbacks are open.