ବାଂଲାଦେଶକୁ ହରାଇ WTC ଶୀର୍ଷରେ ଦକ୍ଷିଣ ଆଫ୍ରିକା

24

ନୂଆଦିଲ୍ଲୀ: ଜୋହାନ୍ସବର୍ଗରେ ଖେଳାଯାଇଥିବା ପ୍ରଥମ ଟେଷ୍ଟ ମ୍ୟାଚ୍‌ରେ ବାଂଲାଦେଶକୁ ୯ ୱିକେଟ୍‌ରେ ପରାସ୍ତ କରି ବିଶ୍ୱ ଟେଷ୍ଟ ଚାମ୍ପିଅନସିପ୍ (WTC) ପଏଣ୍ଟ ଟେବୁଲର ଶୀର୍ଷ ସ୍ଥାନ ହାସଲ କରିଛି ଦକ୍ଷିଣ ଆଫ୍ରିକା। ଏହି ବିଜୟ ସହ ଦକ୍ଷିଣ ଆଫ୍ରିକା ଦୁଇ ମ୍ୟାଚ୍‌ ବିଶିଷ୍ଟ ଟେଷ୍ଟ ଶୃଙ୍ଖଳାରେ ୧-୦ରେ ଆଗୁଆ ହୋଇଛି। ପୂର୍ବରୁ ଦଳ ଦ୍ୱିତୀୟ ସ୍ଥାନରେ ଥିବା ବେଳେ ଏବେ ପଏଣ୍ଟ ପ୍ରତିଶତ (PCT) ୭୧.୪୩ରୁ ବୃଦ୍ଧି ପାଇ ୭୫ରେ ପହଞ୍ଚିଛି। ମ୍ୟାଚ୍‌ର ଅନ୍ତିମ ଦିନରେ ଦକ୍ଷିଣ ଆଫ୍ରିକାର ସ୍ପିନର ସାଇମନ ହାର୍ମର ଚମତ୍କାର ବୋଲିଂ କରି ଦ୍ୱିତୀୟ ଇନିଂସରେ ୧୨.୩ ଓଭରରେ ୫୧ ରନ୍‌ ଦେଇ ୬ଟି ୱିକେଟ୍‌ ଅକ୍ତିଆର କରିଥିଲେ। ତାଙ୍କ ଘାତକ ବୋଲିଂ ବାଂଲାଦେଶର ମଧ୍ୟମ ଓ ନିମ୍ନ କ୍ରମକୁ ଧ୍ୱସ୍ତବିଧ୍ୱସ୍ତ କରିଦେଇଥିଲା, ଯାହାଫଳରେ ଆୟୋଜକ ଦଳ ପାଇଁ ବିଜୟ ଲକ୍ଷ୍ୟ ବେଶ୍‌ ସହଜ ହୋଇଯାଇଥିଲା। ଦ୍ୱିତୀୟ ଇନିଂସରେ ୧୦୦/୫ ସ୍କୋରରୁ ପଞ୍ଚମ ଦିନର ଖେଳ ଆରମ୍ଭ କରିଥିଲା ବାଂଲାଦେଶ। ମ୍ୟାଚ୍‌କୁ ଫେରିବା ପାଇଁ ଭ୍ରମଣକାରୀ ଦଳ ପ୍ରୟାସ କରିଥିଲେ ମଧ୍ୟ ବିଶେଷ ସଫଳ ହୋଇପାରିନଥିଲା। ଅବଶିଷ୍ଟ ୫ଟି ୱିକେଟ୍‌ ମାତ୍ର ୬୮ ରନ୍‌ ଭିତରେ ଖସିଯିବା ଫଳରେ ବାଂଲାଦେଶ ୧୬୮ ରନ୍‌ରେ ଅଲଆଉଟ୍‌ ହୋଇଯାଇଥିଲା। ଦ୍ୱିତୀୟ ଇନିଂସରେ ବ୍ୟାଟିଂ ବିପର୍ଯ୍ୟୟ ଯୋଗୁଁ ବାଂଲାଦେଶ ଦକ୍ଷିଣ ଆଫ୍ରିକା ଆଗରେ ମାତ୍ର ୧୨ ରନ୍‌ର ବିଜୟ ଲକ୍ଷ୍ୟ ରଖିଥିଲା। ଏହି ସହଜ ଲକ୍ଷ୍ୟକୁ ଦକ୍ଷିଣ ଆଫ୍ରିକା ମାତ୍ର ୧.୩ ଓଭରରେ ଗୋଟିଏ ୱିକେଟ୍‌ ହରାଇ ହାସଲ କରିନେଇଥିଲା। ସମ୍ପୂର୍ଣ୍ଣ ମ୍ୟାଚ୍‌ରେ ଦକ୍ଷିଣ ଆଫ୍ରିକାର ଦବଦବା ଦେଖିବାକୁ ମିଳିଥିଲା।

Comments are closed, but trackbacks and pingbacks are open.