ଭୁବନେଶ୍ୱର: ଭୁବନେଶ୍ୱର ଏମ୍ସରେ ଆତ୍ମାହୁତି ଉଦ୍ୟମ କରିଥିବା ଯୁବତୀଙ୍କର ମୃତ୍ୟୁ ଘଟିଛି । ଯୁବତୀ ଜଣକ ମଙ୍ଗଳବାର ଦିନ ଭୁବନେଶ୍ୱରର ଇନ୍ଫୋସିଟି ଥାନା ପଥରଗାଡ଼ିଆ ରୋଡ୍ରେ ଆତ୍ମାହୁତି ଉଦ୍ୟମ କରିଥିଲେ | ତାଙ୍କ ଶରୀରର ପ୍ରାୟ ୯୦% ପୋଡ଼ି ଯାଇଥିଲା। ଭୁବନେଶ୍ୱର ଏମ୍ସରେ ଚିକିତ୍ସାଧୀନ ଅବସ୍ଥାରେ ଆଜି ସେ ଆଖି ବୁଜିଛନ୍ତି। ଯୁବତୀଙ୍କର ମୃତ୍ୟୁ ହୋଇଯାଇଥିବା ବେଳେ ତାଙ୍କୁ ପୋଡ଼ି ମାରିଦେବାକୁ ଉଦ୍ୟମ କରାଯାଇଥିଲା ବୋଲି ତାଙ୍କ ବାପା ଇନ୍ଫୋସିଟି ଥାନାରେ ଅଭିଯୋଗ କରିଥିଲେ। ତେବେ ଯୁବତୀ ଜଣଙ୍କ ନିଜେ ଆତ୍ମାହୁତି ଉଦ୍ୟମ କରିଥିଲେ ବୋଲି ପୋଲିସ କହିଥିଲା। କିନ୍ତୁ ଯୁବତୀ ଜଣଙ୍କ କିଭଳି ଘଟଣାସ୍ଥଳକୁ ଆସିଲେ, ପେଟ୍ରୋଲ କେମିତି କୋଉଠୁ ଆଣିଥିଲେ, ପୋଡ଼ିହେଲା ବେଳେ ଘଟଣାସ୍ଥଳରେ କିଏ କିଏ ଥିଲେ, ସେସବୁ ଜାଣିବା ପାଇଁ ପୋଲିସ ସିସିଟିଭିଗୁଡ଼ିକୁ ଯାଞ୍ଚ କରୁଛି। ଯୁବତୀଙ୍କ ପୁରୁଷ ବନ୍ଧୁଙ୍କୁ ପୋଲିସ ଅଟକ ରଖି ପଚରାଉଚରା କରୁଛି । ଜଣେ ଏସିପିଙ୍କ ନେତୃତ୍ୱରେ ସ୍ୱତନ୍ତ୍ର ଟିମ୍ ଘଟଣାର ତଦନ୍ତ କରାଯାଉଛି। ସୂଚନା ଥାଉ ଯେ, ଯୁବତୀ ଜଣଙ୍କ ନୟାପଲ୍ଲୀ ଅଞ୍ଚଳରେ ଥିବା ଏକ ନର୍ସିଂ ସଂସ୍ଥାରେ କମ୍ପ୍ୟୁଟର ଅପରେଟର୍ ଥିଲେ। ଅନୁଗୋଳର ଜଣେ ଯୁବକଙ୍କ ସହ ତାଙ୍କର ପ୍ରେମ ସମ୍ପର୍କ ଥିଲା। କିଛି ମାସ ତଳେ ସେମାନଙ୍କର ବ୍ରେକ୍ଅପ୍ ହୋଇଥିଲା। ଏହାକୁ ନେଇ ସେ ମାନସିକ ଚାପରେ ଥିଲେ। ମଙ୍ଗଳବାର ତାଙ୍କୁ ପଥରଗାଡ଼ିଆ ରୋଡ୍ରେ ଅର୍ଦ୍ଧଦଗ୍ଧ ଅବସ୍ଥାରେ ଉଦ୍ଧାର କରାଯାଇଥିଲା।
Comments are closed, but trackbacks and pingbacks are open.