ନୂଆଦିଲ୍ଲୀ: ଆଜି ପ୍ରଧାନମନ୍ତ୍ରୀ ମୋଦି ‘ମନ୍ କି ବାତ’ କାର୍ଯ୍ୟକ୍ରମର ୧୦୯ ତମ ଏପିସୋଡକୁ ସମ୍ବୋଧିତ କରିଛନ୍ତି । ଚଳିତ ବର୍ଷ ‘ମନ୍ କି ବାତ’ କାର୍ଯ୍ୟକ୍ରମର ଏହା ପ୍ରଥମ ଏପିସୋଡ ଅଟେ । ଯାହା ମାଧ୍ୟମରେ ରାମ ମନ୍ଦିର, ନାରୀଶକ୍ତି, ପଦ୍ମ ପୁରସ୍କାର, ଅଙ୍ଗଦାନ ଏବଂ ଗଣତନ୍ତ୍ର ସମ୍ପର୍କରେ ଦେଶବାସୀଙ୍କ ସହ ଆଲୋଚନା କରିଛନ୍ତି ପିଏମ ମୋଦି । ଏହି ବର୍ଷ ସମ୍ବିଧାନ ୭୫ ବର୍ଷ ପୂରଣ କରିଛି ଏବଂ ସୁପ୍ରିମକୋର୍ଟ ମଧ୍ୟ ୭୫ ବର୍ଷ ପୂରଣ କରିଛନ୍ତି ।
ସେ କହିଛନ୍ତି ଯେ, ସମ୍ବିଧାନର ମୂଳ ପ୍ରତି ତୃତୀୟ ଅଧ୍ୟାୟରେ ଲୋକଙ୍କ ମୌଳିକ ଅଧିକାର ବର୍ଣ୍ଣନା କରାଯାଇଛି । ଗୁରୁତ୍ବପୂର୍ଣ୍ଣ ବିଷୟ ହେଉଛି ତୃତୀୟ ଅଧ୍ୟାୟ ଆରମ୍ଭରେ ଭଗବାନ ରାମ, ମାତା ସୀତା ଏବଂ ଲକ୍ଷ୍ମଣଙ୍କ ଚିତ୍ର ସ୍ଥାନ ଦିଆଯାଇଛି । ଏହା ମଧ୍ୟ ସମ୍ବିଧାନ ନିର୍ମାତାମାନଙ୍କ ପାଇଁ ପ୍ରେରଣା ଉତ୍ସ ଥିଲା । କୋଟି କୋଟି ଭାରତୀୟଙ୍କୁ ଏକାଠି କରିପାରିଛି ଅଯୋଧ୍ୟାର ରାମଲାଲାଙ୍କ ପ୍ରାଣପ୍ରତିଷ୍ଠା ଉତ୍ସବ ।
ପ୍ରଧାନମନ୍ତ୍ରୀ ମୋଦି କହିଛନ୍ତି ଯେ, ମୋର ଆବେଦନରେ ଲୋକମାନେ ମକର ସଂକ୍ରାନ୍ତିରୁ ଜାନୁଆରୀ ୨୨ ପର୍ଯ୍ୟନ୍ତ ଭକ୍ତି ଓ ଶ୍ରଦ୍ଧା ର ସହିତ ଧାର୍ମିକ ସ୍ଥାନ ସଫା କରିଥିଲେ, ଏହି ଭାବନା ବନ୍ଦ ହେବା ଉଚିତ୍ ନୁହେଁ । ସଂଗଠନର ଏହି ଶକ୍ତି ଦେଶକୁ ସଫଳତାର ନୂତନ ଉଚ୍ଚତାକୁ ନେଇଯିବ ।
ମୋଦି ଆହୁରି ମଧ୍ୟ କହିଛନ୍ତି ଯେ, ୨୬ ଜାନୁଆରୀରେ ପ୍ୟାରେଡ୍ ଆଶ୍ଚର୍ଯ୍ୟଜନକ ଥିଲା । ଏଥିରେ ନାରୀଶକ୍ତି ର ପ୍ରତିଫଳନ ଦେଖିବାକୁ ମିଳିଛି । DRDO ର ପ୍ରଦର୍ଶନ ମଧ୍ୟ ସମସ୍ତଙ୍କ ଦୃଷ୍ଟି ଆକର୍ଷଣ କରିଥିଲା, ଯାହା ଦର୍ଶାଇଥିଲା ଯେ ନାରୀ ଶକ୍ତି ପ୍ରତ୍ୟେକ କ୍ଷେତ୍ରରେ ଦେଶକୁ କିପରି ସୁରକ୍ଷା ଦେଉଛନ୍ତି । ଏକବିଂଶ ଶତାବ୍ଦୀର ଭାରତ ଏପରି ମନ୍ତ୍ର ସହିତ ଆଗକୁ ବଢୁଛି ।
ସେହିପରି ଅର୍ଜୁନ ପୁରସ୍କାରରେ ଅନେକ ପ୍ରତିଜ୍ଞାକାରୀ ଖେଳାଳିଙ୍କୁ ସମ୍ମାନିତ କରାଯାଇଛି । ଏଥିରେ ମହିଳା ଖେଳାଳି ସମସ୍ତଙ୍କ ଦୃଷ୍ଟି ଆକର୍ଷଣ କରିଥିଲେ । ପରିବର୍ତ୍ତନଶୀଳ ଭାରତରେ ଆମର ଝିଅମାନେ ପ୍ରତ୍ୟେକ କ୍ଷେତ୍ରରେ ଚମତ୍କାର କାର୍ଯ୍ୟ କରୁଛନ୍ତି ।
ପଦ୍ମ ପୁରସ୍କାର ପ୍ରାପ୍ତ ବ୍ୟକ୍ତିଙ୍କ ବିଷୟରେ ପ୍ରଧାନମନ୍ତ୍ରୀ ମୋଦି କହିଛନ୍ତି ଯେ, ତିନି ଦିନ ପୂର୍ବରୁ ପଦ୍ମ ପୁରସ୍କାର ଘୋଷଣା କରାଯାଇଥିଲା । ଏଥିରେ ଯେଉଁ ବ୍ୟକ୍ତିଙ୍କ ନାମ ରହିଥିଲା ସେମାନେ ମାାଟି ସହିତ ଯୋଡିହୋଇ କାର୍ଯ୍ୟ କରିଛନ୍ତି । ସେମାନେ ଗଣମାଧ୍ୟମର ମୁଖ୍ୟ ଖବରରୁ ବହୁ ଦୂରରେ ରହି ନିଜ କର୍ତ୍ତବ୍ୟ କରିଚାଲିଛନ୍ତି ।
ପ୍ରଧାନମନ୍ତ୍ରୀ ମୋଦି ଅଙ୍ଗ ଦାନ ଉପରେ ମଧ୍ୟ ଆଲୋଚନା କରିଥିଲେ । ସେ କହିଛନ୍ତି ଯେ ଆମ ମଧ୍ୟରେ କିଛି ଲୋକ ଅଛନ୍ତି ଯେଉଁମାନେ ମୃତ୍ୟୁ ପରେ ମଧ୍ୟ ସମାଜ ପ୍ରତି ସେମାନଙ୍କର ଦାୟିତ୍ବ ପୂରଣ କରନ୍ତି । ଏହି ଲୋକମାନେ ଅଙ୍ଗ ଦାନ କରି ସେମାନଙ୍କର ଦାୟିତ୍ବ ପୂରଣ କରନ୍ତି । ଏହି ନିଷ୍ପତ୍ତି ସହଜ ନୁହେଁ, କିନ୍ତୁ ଅନେକ ଜୀବନ ବଞ୍ଚାଇବାରେ ଏହା ପ୍ରମୁଖ ଭୂମିକା ଗ୍ରହଣ କରିଛି ।
Comments are closed, but trackbacks and pingbacks are open.