ନୂଆଦିଲ୍ଲୀ: ରାଜଧାନୀ ଦିଲ୍ଲୀରେ ଦିନକୁ ଦିନ ବୃଦ୍ଧି ପାଉଥିବା ବାୟୁ ପ୍ରଦୂଷଣକୁ ନିୟନ୍ତ୍ରଣ କରିବା ପାଇଁ ଉଦ୍ୟମ ଆରମ୍ଭ ହୋଇଛି। ଆସନ୍ତା ନଭେମ୍ବର ୧ ତାରିଖରୁ ଦିଲ୍ଲୀରେ ଯାନବାହନ ପ୍ରବେଶ ଉପରେ କଠୋର କଟକଣା ଲାଗୁ କରାଯିବ। ଏଣିକି ଦିଲ୍ଲୀକୁ ଆସୁଥିବା ସମସ୍ତ ଗାଡ଼ିଗୁଡ଼ିକୁ ଇନ୍ଧନ ଏବଂ ନିର୍ଗମନ ମାନଦଣ୍ଡ ସମ୍ପର୍କିତ ନିୟମାବଳୀକୁ କଡ଼ାକଡ଼ି ଭାବେ ପାଳନ କରିବାକୁ ପଡ଼ିବ। ନିୟମ ଉଲ୍ଲଂଘନ କଲେ ଗାଡ଼ି ଚାଳକ ଓ ମାଲିକଙ୍କ ବିରୋଧରେ ଆଇନଗତ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ। ବାୟୁ ଗୁଣବତ୍ତା ପରିଚାଳନା ଆୟୋଗଙ୍କ ନିର୍ଦ୍ଦେଶକ୍ରମେ ଦିଲ୍ଲୀରେ ବିଏସ୍-୬, ସିଏନ୍ଜି, ଏଲ୍ଏନ୍ଜି ଏବଂ ବୈଦ୍ୟୁତିକ ଯାନଗୁଡ଼ିକୁ ପ୍ରାଥମିକତା ଦିଆଯାଉଛି। ଏହି ନିୟମ ସମ୍ପର୍କରେ ଗାଡ଼ି ମାଲିକ ଓ ଚାଳକମାନଙ୍କୁ ସଚେତନ କରିବା ପାଇଁ ହାପୁଡ଼ର ସହକାରୀ ଆଞ୍ଚଳିକ ପରିବହନ ଅଧିକାରୀ କାର୍ଯ୍ୟାଳୟ ପକ୍ଷରୁ ଏକ ପ୍ରେସ୍ ବିଜ୍ଞପ୍ତି ଜାରି କରାଯାଇଛି। ସୂଚନା ଅନୁସାରେ, ବିଏସ୍-୪ ଶ୍ରେଣୀର ମାଲବାହୀ ଯାନଗୁଡ଼ିକୁ କେବଳ ଅକ୍ଟୋବର ୩୧ ତାରିଖ ପର୍ଯ୍ୟନ୍ତ ଦିଲ୍ଲୀରେ ପ୍ରବେଶ କରିବାକୁ ସୀମିତ ସମୟ ପାଇଁ ଅନୁମତି ମିଳିଛି। ଏହି ସମୟସୀମା ଶେଷ ହେବା ପରେ ଏହିସବୁ ଗାଡ଼ିର ପ୍ରବେଶ ଉପରେ ସମ୍ପୂର୍ଣ୍ଣ ରୋକ୍ ଲଗାଯିବ। ସେହିପରି ନଭେମ୍ବର ୧ରୁ ସିଏନ୍ଜି, ବୈଦ୍ୟୁତିକ ଏବଂ ବିଏସ୍-୬ ଡିଜେଲ୍ ଯାନ ବ୍ୟତୀତ ଅନ୍ୟ କୌଣସି ଶ୍ରେଣୀର ବସ୍ ଦିଲ୍ଲୀରେ ପ୍ରବେଶ କରିପାରିବେ ନାହିଁ। ତେବେ ଦିଲ୍ଲୀରେ ପଞ୍ଜୀକୃତ ହୋଇଥିବା ବସ୍ଗୁଡ଼ିକ ପାଇଁ ନିୟମାନୁସାରେ କିଛି ରିହାତି ବ୍ୟବସ୍ଥା ରହିବ। ନଭେମ୍ବର ୧ରୁ ଆସନ୍ତା ଜାନୁଆରୀ ୩୧ ପର୍ଯ୍ୟନ୍ତ ଦିଲ୍ଲୀ ବାହାରେ ପଞ୍ଜୀକୃତ ଏବଂ ବିଏସ୍-୬ ମାନଦଣ୍ଡଠାରୁ କମ୍ ଶ୍ରେଣୀର ଗାଡ଼ିଗୁଡ଼ିକର ଦିଲ୍ଲୀ ପ୍ରବେଶ ଉପରେ ସମ୍ପୂର୍ଣ୍ଣ କଟକଣା ରହିବ। ଦିଲ୍ଲୀରେ ଯାନବାହନ ଜନିତ ପ୍ରଦୂଷଣ ହ୍ରାସ କରିବା ଲକ୍ଷ୍ୟରେ ଏହି ଗୁରୁତ୍ୱପୂର୍ଣ୍ଣ ପଦକ୍ଷେପ ଗ୍ରହଣ କରାଯାଇଛି।
Comments are closed, but trackbacks and pingbacks are open.