ଭୁବନେଶ୍ୱର,୧।୨: କିଟ୍ ବିଶ୍ୱବିଦ୍ୟାଳୟରେ ଜର୍ମାନୀର ପୂର୍ବତନ ଗ୍ରାଣ୍ଡ ସ୍ଲାମ୍ ଟେନିସ୍ ଖେଳାଳି ତଥା ଆଲେକ୍ଜାଣ୍ଡର ୱାସକେ ଟେନିସ୍ ବିଶ୍ୱବିଦ୍ୟାଳୟର ପ୍ରତିଷ୍ଠାତା ଆଲେକ୍ଜାଣ୍ଡାର ୱାସକେ ଏବଂ ଅହମ୍ଦାବାଦ୍ସ୍ଥିତ ଅଲ୍ଟେଭୋଲ୍ ଟେନିସ୍ ଏକାଡେମୀ ସହଯୋଗରେ କିଟ୍-ଆଲେକ୍ଜାଣ୍ଡର-ଟେନିସ୍ ଏକାଡେମୀ ବୁଧବାର ଉଦ୍ଘାଟିତ ହୋଇଛି। କିଟ୍ ଟେନିସ୍ ଷ୍ଟାଡିଅମରେ ଆୟୋଜିତ ଉଦ୍ଘାଟନୀ କାର୍ଯ୍ୟକ୍ରମରେ ଓଡ଼ିଶାର କ୍ରୀଡ଼ା ଓ ଯୁବସେବା ତଥା ଇଲେକ୍ଟ୍ରୋନିକ୍ସ ଓ ସୂଚନା ପ୍ରଯୁକ୍ତି ମନ୍ତ୍ରୀ ତୁଷାରକାନ୍ତି ବେହେରା, କିଟ୍ ଓ କିସ୍ ପ୍ରତିଷ୍ଠାତା ତଥା କନ୍ଧମାଳ ସାଂସଦ ଅଚ୍ୟୁତ ସାମନ୍ତ, ରାଜ୍ୟ କ୍ରୀଡ଼ା ଓ ଯୁବସେବା ବିଭାଗ କମିଶନର ତଥା ଶାସନସଚିବ ଭିନିଲ୍ କ୍ରିଷ୍ନା, ଆଲେକ୍ଜାଣ୍ଡର ୱାସକେ, ଅଲ୍ଟେଭୋଲ୍ ଟେନିସ୍ ଏକାଡେମୀର ପ୍ରତିଷ୍ଠାତା ଚିରାଗ ପଟେଲ୍ ଏବଂ ଅଲ୍ଟେଭୋଲ୍ ଟେନିସ୍ ଏକାଡେମୀର ନିର୍ଦ୍ଦେଶକ ଶ୍ରୀମଲ୍ ଭଟ୍ଟଙ୍କ ଉପସ୍ଥିତିରେ ଏହି ଏକାଡେମୀର ଉଦ୍ଘାଟନ କରିଥିଲେ। ଏହି ଟେନିସ୍ ଏକାଡେମୀ ପ୍ରତିଷ୍ଠାରେ ସହଯୋଗ କରିଥିବାରୁ ଆଲେକ୍ଜାଣ୍ଡାର ୱାସକେ ଏବଂ ଅଲ୍ଟେଭୋଲ୍ ଟେନିସ୍ ଏକାଡେମୀର ପ୍ରତିଷ୍ଠାତାଙ୍କୁ ଶ୍ରୀ ସାମନ୍ତ ଧନ୍ୟବାଦ ଜଣାଇଥିଲେ।
ପରେ ଏକାଡେମୀ ପକ୍ଷରୁ ଅନୁଷ୍ଠିତ ଏକ ସାମ୍ବାଦିକ ସମ୍ମିଳନୀରେ ସୂଚନା ଦେଇ ୱାସକେ କହିଲେ, ଓଡ଼ିଶା ସମେତ ଭାରତରେ ବହୁ ପ୍ରତିଭାବାନ୍ ଖେଳାଳି ଅଛନ୍ତି। ଏହି ଏକାଡେମୀ ଓଡ଼ିଶାରେ ଟେନିସ୍ ଖେଳର ପ୍ରସାର କ୍ଷେତ୍ରରେ ସହାୟକ ହେବା ସହ ଆଗାମୀ ଦିନର ଗ୍ରାଣ୍ଡ ସ୍ଲାମ୍ ଖେଳାଳି ସୃଷ୍ଟି କରିବାରେ ସହାୟକ ହେବ ବୋଲି କହିଥିଲେ। କିଟ୍ ଆଲେକଜାଣ୍ଡର ୱାସ୍କେ-ଆଲଟେଭୋଲ୍ ଟେନିସ୍ ଏକାଡେମୀ ସହ ମିଳିତ ଭାବେ ଏହି ଏକାଡେମୀରେ ଟେନିସ୍ ଖେଳ ପ୍ରତି ଆଗ୍ରହ ଥିବା ପିଲାଙ୍କୁ ପ୍ରଶିକ୍ଷଣ ଦିଆଯିବ। ଏଥିରେ କିଟ୍ ଓ କିସ୍ ସମେତ ଅନ୍ୟ ପିଲାମାନେ ମଧ୍ୟ ଟେନିସ୍ ପ୍ରଶିକ୍ଷଣ ନିମନ୍ତେ ଆବେଦନ କରି ନାମ ଲୋଖାଇପାରିବେ ବୋଲି କିଟ୍ କ୍ରୀଡ଼ା ମହାନିର୍ଦ୍ଦେଶକ ଡ. ଗଗନେନ୍ଦୁ ଦାଶ ସୂଚନା ଦେଇଥିଲେ। କିଟ୍ରେ ରାଜ୍ୟ ତଥା ଦେଶ ବିଦେଶର ପିଲାମାନେ ପଢ଼ୁଥିବାରୁ ସେମାନଙ୍କ ପାଇଁ ଏହି ଏକାଡେମୀ ବିଶେଷ ସହାୟକ ହେବ। ପ୍ରଥମ ପର୍ଯ୍ୟାୟରେ ଟେନିସ୍ କ୍ରୀଡ଼ା ପ୍ରତିଭାମାନଙ୍କୁ ଚିହ୍ନଟ କରାଯାଇ ସେମାନଙ୍କୁ ତାଲିମ ପ୍ରଦାନ କରାଯିବ। ଦ୍ୱିତୀୟ ପର୍ଯ୍ୟାୟରେ ବିଦ୍ୟାଳୟ ଓ ବିଶ୍ୱବିଦ୍ୟାଳୟସ୍ତରର ଟେନିସ୍ ଖେଳାଳିଙ୍କ ପାଇଁ ତାଲିମ୍ ବ୍ୟବସ୍ଥା ରହିଥିବା ବେଳେ ତୃତୀୟ ପର୍ଯ୍ୟାୟରେ ଟେନିସ୍ ଖେଳାଳିଙ୍କୁ ହାଇ-ପରଫର୍ମାନ୍ସ ତାଲିମ୍ ପ୍ରଦାନ କରାଯାଇ ଜାତୀୟ ଓ ଅନ୍ତର୍ଜାତୀୟ ଖେଳାଳି ସୃଷ୍ଟି କରାଯିବ। ଏଠାରେ ତାଲିମ ପାଇଁ ଅନ୍ତର୍ଜାତୀୟସ୍ତରର ୧୫ଜଣ କୋଚ ରହିବା ସହ ଫିଜିଓ ବ୍ୟବସ୍ଥା ରହିବ। ଏହା ବ୍ୟତୀତ ସମୟକୁ ସମୟ ୱାସକେ ମଧ୍ୟ ଓଡ଼ିଶା ଆସି ତାଲିମ ପ୍ରଦାନ କରିବା ସହ ଭର୍ଚୁଆଲ୍ରେ ତାଲିମ୍ ପ୍ରଦାନ କରିବେ। ଆଗାମୀ ଦିନରେ କିଟ୍ ଏବଂ କିସ୍ରୁ ଅନ୍ତର୍ଜାତୀୟ ଟେନିସ୍ ଖେଳାଳି ବାହାରିବେ ବୋଲି ଡ. ଦାଶ ସୂଚନା ଦେଇଥିଲେ। ଅନ୍ୟମାନଙ୍କ ମଧ୍ୟରେ ଆଲଟେଭୋଲ୍ ଟେନିସ୍ ଏକାଡେମୀ ପ୍ରତିଷ୍ଠାତା ଚିରାଗ୍ ପଟେଲ, ଆଲଟେଭୋଲ୍ ଟେନିସ୍ ଏକାଡେମୀ ନିର୍ଦେଶକ ଶ୍ରୀମୟ ଭଟ୍ଟ ଏବଂ ପ୍ରକାଶ ପଟେଲ ପ୍ରମୁଖ ଉପସ୍ଥିତ ଥିଲେ। ଏହି ଉଦ୍ଘାଟନୀ ଅବସରରେ କିଟ୍ ଟେନିସ୍ ଗ୍ରାଉଣ୍ଡରେ କ୍ରୀଡାମନ୍ତ୍ରୀ ତୁଷାରକାନ୍ତି ବେହେରା ଏବଂ କିଟ୍ ଓ କିସ୍ ପ୍ରତିଷ୍ଠାତା ପ୍ରଫେସର ଅଚ୍ୟୁତ ସାମନ୍ତ ଏବଂ ଉପସ୍ଥିତ ଅନ୍ୟନ୍ୟ ଅତିଥିମାନେ ଟେନିସ୍ ଖେଳିଥିଲେ।
Comments are closed, but trackbacks and pingbacks are open.