ବଙ୍ଗ ମଇଦାନରେ ହାର୍ ମାନିବାକୁ ନାରାଜ ମମତା: ଭୋଟର ତାଲିକା ସଂଶୋଧନ ପ୍ରକ୍ରିୟାକୁ ନେଇ ସାଂଘାତିକ ଅଭିଯୋଗ, ଶେଷ ପର୍ଯ୍ୟନ୍ତ ଲଢ଼େଇ ଜାରି ରଖିବାକୁ ଆହ୍ୱାନ

କୋଲକାତା: ପଶ୍ଚିମବଙ୍ଗ ବିଧାନସଭା ନିର୍ବାଚନର ଫଳାଫଳକୁ ନେଇ ସାରା ଦେଶରେ ଚର୍ଚ୍ଚା ଜାରି ରହିଥିବା ବେଳେ ଏକ ନୂଆ ମୋଡ଼ ସାମ୍ନାକୁ ଆସିଛି। ଭାରତୀୟ ଜନତା ପାର୍ଟି ସଂଖ୍ୟାଗରିଷ୍ଠତା ଆଡ଼କୁ ଅଗ୍ରସର ହେଉଥିବା ଏବଂ ସ୍ପଷ୍ଟ ବିଜୟର ସଙ୍କେତ ମିଳୁଥିଲେ ହେଁ, ତୃଣମୂଳ କଂଗ୍ରେସ ମୁଖ୍ୟ ତଥା ମୁଖ୍ୟମନ୍ତ୍ରୀ ମମତା ବାନାର୍ଜୀ ପରାଜୟ ସ୍ୱୀକାର କରିବାକୁ ସିଧାସଳଖ ମନା କରିଦେଇଛନ୍ତି। ସୋମବାର ସାମାଜିକ ଗଣମାଧ୍ୟମ ମାଧ୍ୟମରେ ସେ ଦଳୀୟ କର୍ମୀ ଓ ସମର୍ଥକଙ୍କୁ ଏକ ଶକ୍ତିଶାଳୀ ବାର୍ତ୍ତା ଦେଇ କହିଛନ୍ତି ଯେ, ଲଢ଼େଇ ଏବେ ବି ବାକି ଅଛି। ଚତୁର୍ଥ ଥର ପାଇଁ ରାଜ୍ୟ ଶାସନ ଗାଦିକୁ ଫେରିବାକୁ ଲକ୍ଷ୍ୟ ରଖିଥିବା ମମତା ବାନାର୍ଜୀ ଆଜି ନିଜର ମତ ରଖି ପ୍ରାୟ ଦେଢ଼ ମିନିଟର ଏକ ଭିଡିଓ ବାର୍ତ୍ତା ଜାରି କରିଛନ୍ତି। ଏଥିରେ ସେ ନିଜ ସମର୍ଥକମାନଙ୍କୁ ଆଶା ନ ହରାଇବାକୁ ଅନୁରୋଧ କରିବା ସହ ‘ଅପେକ୍ଷା କରନ୍ତୁ ଏବଂ ଦେଖନ୍ତୁ’ ବୋଲି କହିଛନ୍ତି। ମମତାଙ୍କ କହିବା ଅନୁସାରେ, ଅନେକ ନିର୍ବାଚନ ମଣ୍ଡଳୀରେ ଏବେ ବି ୧୪ରୁ ୧୮ ପର୍ଯ୍ୟାୟ ପର୍ଯ୍ୟନ୍ତ ଗଣତି ବାକି ରହିଛି। ତେଣୁ ପ୍ରାରମ୍ଭିକ ସୂଚନାକୁ ଦେଖି ବିଚଳିତ ନ ହେବାକୁ ସେ ପରାମର୍ଶ ଦେଇଛନ୍ତି। ମମତା କେବଳ ଫଳାଫଳ ଉପରେ ନୁହେଁ, ବରଂ ନିର୍ବାଚନ ପ୍ରକ୍ରିୟା ଉପରେ ମଧ୍ୟ ପ୍ରଶ୍ନ ଉଠାଇଛନ୍ତି। ସେ ନିର୍ବାଚନ କମିଶନଙ୍କ ‘ଭୋଟର ତାଲିକାର ସ୍ୱତନ୍ତ୍ର ସଘନ ସଂଶୋଧନ’ ପ୍ରକ୍ରିୟାକୁ କଡ଼ା ସମାଲୋଚନା କରିଛନ୍ତି। ମମତାଙ୍କ ଅଭିଯୋଗ ଅନୁସାରେ, ଏହି ସଂଶୋଧନ ପ୍ରକ୍ରିୟା ଆଳରେ ରାଜ୍ୟର ବହୁ ସଂଖ୍ୟକ ପ୍ରକୃତ ଭୋଟରଙ୍କ ନାମ ତାଲିକାରୁ ଜାଣିଶୁଣି ବାଦ୍ ଦିଆଯାଇଛି। ଏହା ଏକ ଯୋଜନାବଦ୍ଧ ଚକ୍ରାନ୍ତ ବୋଲି ଦର୍ଶାଇ ସେ କହିଛନ୍ତି ଯେ, ଲୋକଙ୍କ ସାଂବିଧାନିକ ଅଧିକାରକୁ କ୍ଷୁଣ୍ଣ କରାଯାଇଛି। ଏହି ସଂଶୋଧନ ପ୍ରକ୍ରିୟାକୁ ସମାଲୋଚନା କରି ସେ ନିର୍ବାଚନର ସ୍ୱଚ୍ଛତା ଉପରେ ଗମ୍ଭୀର ସନ୍ଦେହ ପ୍ରକଟ କରିଛନ୍ତି। ପଶ୍ଚିମବଙ୍ଗରେ ବିରୋଧୀ ଦଳର ଦବଦବା ବଢ଼ୁଥିବା ବେଳେ ମମତାଙ୍କ ଏହି ଜିଦ୍ ଏବଂ ଅଭିଯୋଗ ରାଜନୈତିକ ମହଲକୁ ଚକିତ କରିଛି। ଗୋଟିଏ ପଟେ ବିଜେପି ଶିବିରରେ ଉତ୍ସବର ପରିବେଶ ଥିବା ବେଳେ ଅନ୍ୟପଟେ ତୃଣମୂଳ କଂଗ୍ରେସ ମୁଖ୍ୟଙ୍କ ଏହି ବୟାନ ସଙ୍କେତ ଦେଉଛି ଯେ, ଆଗକୁ ଏହି ଲଢ଼େଇ କେବଳ ଗଣତି କେନ୍ଦ୍ରରେ ସୀମିତ ରହିବ ନାହିଁ। ଅନେକ ସମୀକ୍ଷକ ମନେ କରୁଛନ୍ତି ଯେ, ମମତା ବାନାର୍ଜୀ ଶେଷ ମୁହୂର୍ତ୍ତ ପର୍ଯ୍ୟନ୍ତ ନିଜ କର୍ମୀଙ୍କୁ ସକ୍ରିୟ ରଖିବାକୁ ଚାହୁଁଛନ୍ତି। ଶେଷ ପର୍ଯ୍ୟାୟ ଗଣତି ବାକି ଥିବା କଥା କହି ସେ ଏକ ପ୍ରକାର ମନସ୍ତାତ୍ୱିକ ଚାପ ସୃଷ୍ଟି କରିବାକୁ ଚେଷ୍ଟା କରୁଛନ୍ତି। ବର୍ତ୍ତମାନ ପୁରା ବଙ୍ଗଳାର ନଜର ଶେଷ ପର୍ଯ୍ୟାୟର ଗଣତି ଏବଂ ମମତାଙ୍କ ପରବର୍ତ୍ତୀ ପଦକ୍ଷେପ ଉପରେ ରହିଛି।