ସମ୍ଭାବ୍ୟ ବାତ୍ୟା ‘ଆକ୍‌ଭାନ୍‌’ ମୁକାବିଲା: ନଦୀବନ୍ଧ ଓ ଘାଇ ମରାମତି କାର୍ଯ୍ୟ ତ୍ୱରାନ୍ୱିତ କଲା ଜଳ ସମ୍ପଦ ବିଭାଗ

23

ଭୁବନେଶ୍ୱର: ସମ୍ଭାବ୍ୟ ବାତ୍ୟା ‘ଆକ୍‌ଭାନ୍‌’ର ମୁକାବିଲା ପାଇଁ ଜଳ ସମ୍ପଦ ବିଭାଗ ପକ୍ଷରୁ ପ୍ରସ୍ତୁତିକୁ ଜୋରଦାର କରାଯାଇଛି। ବିଭିନ୍ନ ସମ୍ବେଦନଶୀଳ ଅଞ୍ଚଳରେ ଚାଲିଥିବା ପୁନରୁଦ୍ଧାର, ନଦୀବନ୍ଧ ଘାଇ ମରାମତି ଓ ବନ୍ଧ ସୁଦୃଢ଼ୀକରଣ କାର୍ଯ୍ୟକୁ ତ୍ୱରାନ୍ୱିତ କରାଯାଇଛି। ବନ୍ୟା ନିୟନ୍ତ୍ରଣ ଭିତ୍ତିଭୂମିକୁ ମଜଭୁତ କରିବା ସହ ତଳିଆ ଅଞ୍ଚଳର ଜନସାଧାରଣଙ୍କ ସୁରକ୍ଷାକୁ ଦୃଷ୍ଟିରେ ରଖି କ୍ଷେତ୍ରୀୟ ଡିଭିଜନଗୁଡ଼ିକ ପକ୍ଷରୁ ଅତ୍ୟନ୍ତ ସମ୍ବେଦନଶୀଳ ସ୍ଥାନଗୁଡ଼ିକୁ ପ୍ରାଥମିକତା ଦିଆଯାଉଛି। ବିଶେଷ କରି ଗଞ୍ଜାମ ଜିଲ୍ଲାରେ ବ୍ରହ୍ମପୁର ଡ୍ରେନେଜ୍ ଡିଭିଜନ ପକ୍ଷରୁ ବ୍ୟାପକ ମରାମତି କାର୍ଯ୍ୟ ହାତକୁ ନିଆଯାଇଛି। କଳିଙ୍ଗ ବିହାର ଓ ଦୁରା ନିକଟସ୍ଥ ବାହାନା ନାଳ, ଚଣାମେରୀ ଗ୍ରାମ ନିକଟସ୍ଥ ତପ୍ତପାଣି ନାଳ ଏବଂ ପାତ୍ରପୁର ବ୍ଲକ୍‌ର ଗୁଡ଼ିପଦର ଗ୍ରାମ ନିକଟସ୍ଥ ପଦ୍ମତୋଳା ନାଳରେ ଘାଇ ମରାମତି କାର୍ଯ୍ୟ ଯୁଦ୍ଧକାଳୀନ ଭିତ୍ତିରେ ଚାଲିଛି। ବାତ୍ୟା ପୂର୍ବରୁ ଏହି ଜଳ ନିଷ୍କାସନ ପଥଗୁଡ଼ିକୁ ସୁଦୃଢ଼ କରି ସମ୍ଭାବ୍ୟ ବନ୍ୟା ପରିସ୍ଥିତିକୁ ଏଡ଼ାଇବା ଏହାର ମୁଖ୍ୟ ଲକ୍ଷ୍ୟ। ଜଳ ସମ୍ପଦ ବିଭାଗର ପ୍ରମୁଖ ଶାସନ ସଚିବ ଶୁଭା ଶର୍ମା ଏବଂ ସର୍ବୋଚ୍ଚ ଯନ୍ତ୍ରୀ ଇଂ. ଦିଲ୍ଲୀପ କୁମାର ରାଉତ ଏହି ସମସ୍ତ ପୁନରୁଦ୍ଧାର ଓ ପ୍ରସ୍ତୁତି କାର୍ଯ୍ୟର ଅଗ୍ରଗତି ଉପରେ ନିରନ୍ତର ନଜର ରଖିଛନ୍ତି। ପ୍ରାଥମିକତା ଭିତ୍ତିରେ ଆବଶ୍ୟକ କାର୍ଯ୍ୟଗୁଡ଼ିକୁ ଶୀଘ୍ର ଶେଷ କରିବା, ନିୟମିତ ତଦାରଖ କରିବା ଏବଂ ଯେକୌଣସି ଜରୁରୀକାଳୀନ ପରିସ୍ଥିତିର ମୁକାବିଲା ପାଇଁ ପର୍ଯ୍ୟାପ୍ତ ମାନବସମ୍ବଳ, ଯନ୍ତ୍ରପାତି ଓ ନିର୍ମାଣ ସାମଗ୍ରୀ ମହଜୁଦ ରଖିବାକୁ କ୍ଷେତ୍ରୀୟ ଅଧିକାରୀମାନଙ୍କୁ ନିର୍ଦ୍ଦେଶ ଦିଆଯାଇଛି।

Comments are closed, but trackbacks and pingbacks are open.