କିମସରେ ପେଡିଆଟ୍ରିକ୍ସ ଅପଡେଟ୍ ୨.୦:ଏକାଠି ହେଲେ ପ୍ରମୁଖ ଶିଶୁ ସ୍ୱାସ୍ଥ୍ୟ ବିଶେଷଜ୍ଞ

ଭୁବନେଶ୍ୱର: ଶିଶୁ ସ୍ୱାସ୍ଥ୍ୟସେବା ବିକାଶ କ୍ଷେତ୍ରରେ ଆଲୋଚନା କରିବା ଓ ସର୍ବୋତ୍ତମ କ୍ଲିନିକାଲ୍ ଅଭ୍ୟାସ ବିନିମୟ ପାଇଁ କିମ୍‍ସ ଶିଶୁ ରୋଗ ବିଭାଗ ପକ୍ଷରୁ ‘କିମସ ପେଡିଆଟ୍ରିକ୍ସ ଅପଡେଟ୍ ୨.୦’ ଆୟୋଜିତ ହୋଇଯାଇଛି। ଏହି ସମ୍ମିଳନୀରେ ପ୍ରମୁଖ ଶିଶୁ ବିଶେଷଜ୍ଞ ଏବଂ ଚିକିତ୍ସକମାନେ ଯୋଗ ଦେଇଥିଲେ। ଏହି କାର୍ଯ୍ୟକ୍ରମରେ ନବଜାତ ଶିଶୁର ଯତ୍ନ, ଶିଶୁ ଆଘାତ, ଜନ୍ମଗତ ହୃଦରୋଗ ଓ ଟୀକା ସମ୍ବନ୍ଧୀୟ ଅପଡେଟ୍ ସଂପର୍କରେ ବହୁବିଧ ଶିକ୍ଷାଗତ ଅଧିବେଶନ ଅନୁଷ୍ଠିତ ହୋଇଥିଲା।

କାର୍ଯ୍ୟକ୍ରମ ଉପରେ ସୂଚନା ଦେଇ କିମ୍‍ସ ଶିଶୁ ରୋଗ ବିଭାଗ ମୁଖ୍ୟ ଡା ସେବାରଞ୍ଜନ ବିଶ୍ୱାଳ କହିଲେ, ଡାକ୍ତର ଓ ବିଶେଷଜ୍ଞଙ୍କ ପାଇଁ ଜ୍ଞାନ ବିନିମୟ ଓ ଶିଶୁ ଯତ୍ନରେ ବିକଶିତ ଅଭ୍ୟାସଗୁଡ଼ିକ ଉପରେ ବିଚାର ବିମର୍ଶ କରିବା ପାଇଁ ଏହି ବୈଠକ ଏକ ପ୍ଲାଟଫର୍ମ। ଏଭଳି  ଆଲୋଚନାରେ ଡାକ୍ତରମାନେ ଅତ୍ୟାଧୁନିକ ବିକାଶ ସହିତ ଅପଡେଟ୍ ରହିବା ସହ ପିଲାମାନଙ୍କୁ ପ୍ରଦାନ କରାଯାଉଥିବା ଚିକିତ୍ସାର ଗୁଣବତ୍ତା ଉନ୍ନତ କରିବାରେ ଡାକ୍ତରଙ୍କୁ ସାହାଯ୍ୟ କରେ।

କିମ୍‍ସ ମେଡିକାଲ କଲେଜ ଅଧ୍ୟକ୍ଷ ଡା ଆର. ସି. ଦାସ କହିଲେ, ଏହି ସମ୍ମିଳନୀ ଭୁବନେଶ୍ୱର ସମେତ ଦେଶର ଅନ୍ୟାନ୍ୟ ସ୍ଥାନରୁ ପ୍ରସିଦ୍ଧ ଓ ଅଭିଜ୍ଞ ଶିଶୁରୋଗ ବିଶେଷଜ୍ଞଙ୍କୁ ଏକାଠି କରିଛି । ଅନୁଷ୍ଠାନର ଦକ୍ଷତା ଉପରେ ଆଲୋକପାତ କରି ସେ କହିଲେ, କିମ୍‍ସରେ ଥିବା ନବଜାତ ଇଣ୍ଟେନ୍‍ସିଭ୍ କେୟାର ୟୁନିଟ୍ ଓ ପେଡିଆଟ୍ରିକ୍ ଇଣ୍ଟେନସିଭ୍ କେୟାର ୟୁନିଟ୍ ଓଡ଼ିଶାରେ ବହୁଳ ଭାବରେ ସ୍ୱୀକୃତିପ୍ରାପ୍ତ। କିମ୍‍ସରେ ସଫଳତାର ସହ ଶିଶୁ ଚିକିତ୍ସା ଏଣ୍ଡୋସ୍କୋପି ଓ ଶିଶୁ ଅସ୍ଥି ମଜ୍ଜା ପ୍ରତିରୋପଣ ଭଳି ଉନ୍ନତ ପ୍ରକ୍ରିୟାଗୁଡ଼ିକୁ କାର୍ଯ୍ୟକାରୀ ହେଉଛି ବୋଲି ସେ କହିଥିଲେ।

ପୁଣେର ବିଶିଷ୍ଟ ଶିଶୁରୋଗ ବିଶେଷଜ୍ଞ ଡା ପ୍ରମୋଦ ଯୋଗ ଚିକିତ୍ସା ଅଭ୍ୟାସରେ କରୁଣା ଓ ମାନବିକତାର ଗୁରୁତ୍ୱ ଉପରେ ଆଲୋକପାତ କରିଥିଲେ। ସେ ଭଲ ଡାକ୍ତର ହେବା ପୂର୍ବରୁ ଭଲ ମଣିଷ ହେବାକୁ ପ୍ରୟାସ କରିବାକୁ ଯୁବ ଡାକ୍ତରମାନଙ୍କୁ ଆହ୍ୱାନ କରିଥିଲେ। ଦିନିକିଆ କାର୍ଯ୍ୟକ୍ରମରେ ପ୍ରମାଣ-ଆଧାରିତ ନବଜାତ ଯତ୍ନ, ପିଲାମାନଙ୍କ ମଧ୍ୟରେ କ୍ଷୟକାରୀ ଆଘାତ, କିଶୋର ସ୍ୱାସ୍ଥ୍ୟସେବା, ଅକାଳ ଶିଶୁଙ୍କ ପୋଷଣ, ଶିଶୁ ଆଘାତ ପରିଚାଳନା, ଅଟୋଇମ୍ମ୍ୟୁନ୍ ଏନସେଫାଲାଇଟିସ୍‌, ଜନ୍ମଗତ ହୃଦରୋଗ ଓ ଟୀକାକରଣ ଭଳି ବିଷୟ ଉପରେ ବିଭିନ୍ନ ବୈଜ୍ଞାନିକ ଅଧିବେଶନ ଅନୁଷ୍ଠିତ ହୋଇଥିଲା। ସମ୍ମିଳନୀରେ ଡାକ୍ତର ଓ ଗବେଷକମାନଙ୍କ ଦ୍ୱାରା ସନ୍ଦର୍ଭ ଓ ପୋଷ୍ଟର ଉପସ୍ଥାପନା ପାଇଁ ସମାନ୍ତରାଳ ଅଧିବେଶନ ମଧ୍ୟ ଆୟୋଜନ କରାଯାଇଥିଲା। କିମସ ମେଡିକାଲ ଅଧୀକ୍ଷକ ଡା ମାନସ ରଞ୍ଜନ ବେହେରା, ଶିଶୁରୋଗ ବିଶେଷଜ୍ଞ ଡା ନିର୍ମଳ ମହାକୁଡଙ୍କ ସମେତ ବହୁ ବରିଷ୍ଠ ଶିଶୁରୋଗ ବିଶେଷଜ୍ଞ ଏହି କାର୍ଯ୍ୟକ୍ରମରେ ଅଂଶଗ୍ରହଣ କରିଥିଲେ।