ବିଧାୟକଙ୍କ ପ୍ରଶିକ୍ଷଣ ଶିବିରକୁ ବୟକଟ୍ କଲେ ବିରୋଧୀ

18

ଭୁବନେଶ୍ବର: ଉପରାଷ୍ଟ୍ରପତି ସି.ପି. ରାଧାକ୍ରିଷ୍ଣନଙ୍କ ଉପସ୍ଥିତିରେ ଆୟୋଜିତ ବିଧାୟକମାନଙ୍କ ପ୍ରଶିକ୍ଷଣ ଶିବିରକୁ ବିରୋଧୀ ଦଳ ବିଜେଡି ଓ କଂଗ୍ରେସ ବୟକଟ୍ କରିଛନ୍ତି। ଦୁଇ ଦଳର କୌଣସି ବିଧାୟକ ଏହି କାର୍ଯ୍ୟକ୍ରମରେ ସାମିଲ ହୋଇନାହାନ୍ତି।ପୂର୍ବରୁ କଂଗ୍ରେସ ଏହି କାର୍ଯ୍ୟକ୍ରମକୁ ବୟକଟ୍ କରିବ ବୋଲି ଘୋଷଣା କରିଥିଲା। ପିସିସି ସଭାପତି ଭକ୍ତ ଚରଣ ଦାସ କହିଥିଲେ, ରାଷ୍ଟ୍ରପତି ଓ ଉପରାଷ୍ଟ୍ରପତି ସାମ୍ବିଧାନିକ ପଦବୀ, ସେଥିପ୍ରତି ସମ୍ମାନ ଅଛି। କିନ୍ତୁ ଏ ସରକାରରେ ବିଧାୟକମାନଙ୍କର ସମ୍ମାନ ନାହିଁ। ବିରୋଧୀ ବିଧାୟକମାନେ ଭଲ ଭାବେ ତାଲିମପ୍ରାପ୍ତ, ବରଂ ବିଜେପି ବିଧାୟକମାନଙ୍କୁ ହିଁ ଟ୍ରେନିଂ ଦରକାର। ସେ ବିଜେଡିକୁ ମଧ୍ୟ ବୟକଟ୍ କରିବାକୁ ଆହ୍ୱାନ ଦେଇଥିଲେ।ପରେ ବିଜେଡି ମଧ୍ୟ ଏହି କାର୍ଯ୍ୟକ୍ରମକୁ ବର୍ଜନ କରିବାକୁ ନିଷ୍ପତ୍ତି ନେଇଥିଲା। ଦଳ ପକ୍ଷରୁ ବିଧାୟକମାନଙ୍କୁ ଯୋଗ ନ ଦେବାକୁ ନିର୍ଦ୍ଦେଶ ଦିଆଯାଇଥିଲା। ଫଳରେ ପ୍ରଶିକ୍ଷଣ ଶିବିରରେ କେବଳ ବିଜେପି ବିଧାୟକମାନେ ସାମିଲ ହୋଇଥିଲେ।ଏହି ବୟକଟ୍‌କୁ ନେଇ ପ୍ରତିକ୍ରିୟା ରଖିଛନ୍ତି ରାଜସ୍ୱ ମନ୍ତ୍ରୀ ସୁରେଶ ପୂଜାରୀ। ସେ କହିଛନ୍ତି, ପ୍ରଶିକ୍ଷଣରେ ଯୋଗ ନ ଦେଇ ଉଭୟ ବିରୋଧୀ ଦଳ ରାଜନୈତିକ ଉଦ୍ଦେଶ୍ୟ ରଖି ଉପରାଷ୍ଟ୍ରପତିଙ୍କୁ ଅସମ୍ମାନ କରିଛନ୍ତି।ଅନ୍ୟପଟେ ଦଳରୁ ନିଲମ୍ବିତ ହୋଇଥିବା କିଛି ବିଧାୟକ ଏହି କାର୍ଯ୍ୟକ୍ରମରେ ଯୋଗ ଦେଇଥିଲେ। ବିଜେଡିରୁ ନିଲମ୍ବିତ ସୌଭିକ ବିଶ୍ୱାଳ, ଦେବୀ ରଞ୍ଜନ ତ୍ରିପାଠୀ, ଅରବିନ୍ଦ ମହାପାତ୍ର ଓ କଂଗ୍ରେସରୁ ନିଲମ୍ବିତ ସୋଫିଆ ଫିରଦୌସ୍ ସାମିଲ ହୋଇଥିବାରୁ ମନ୍ତ୍ରୀ ସେମାନଙ୍କୁ ସାଧୁବାଦ ଜଣାଇଛନ୍ତି।

Comments are closed, but trackbacks and pingbacks are open.