ଭୁବନେଶ୍ବର: ସୋନି ଏଣ୍ଟରଟେନମେଣ୍ଟ ଟେଲିଭିଜନର ଲୋକପ୍ରିୟ ସଙ୍ଗୀତ ଭିତ୍ତିକ ରିଆଲିଟି ଶୋ’ ‘ଇଣ୍ଡିଆନ୍ ଆଇଡଲ୍ ସିଜିନ୍-୧୬’ର ବିଜେତା ହୋଇଛନ୍ତି ଓଡ଼ିଶାର ୨୪ ବର୍ଷୀୟା ଗାୟିକା ଜ୍ୟୋତିର୍ମୟୀ ନାୟକ। ଏହି ପ୍ରସିଦ୍ଧ ଟାଇଟଲ୍ ଜିତିବାରେ ସେ ଓଡ଼ିଶାର ପ୍ରଥମ ପ୍ରତିଯୋଗୀ ଭାବେ ଇତିହାସ ରଚିଛନ୍ତି। ବିଜେତା ଭାବେ ଜ୍ୟୋତିର୍ମୟୀଙ୍କୁ ଟ୍ରଫି ସହ ୨୦ ଲକ୍ଷ ଟଙ୍କାର ପୁରସ୍କାର ରାଶି ପ୍ରଦାନ କରାଯାଇଥିବା ବେଳେ ମଧ୍ୟପ୍ରଦେଶ ଜବଲପୁରର ତନିଷ୍କ ଶୁକ୍ଲା ପ୍ରଥମ ରନର୍ସ-ଅପ୍ ହୋଇଛନ୍ତି।ମାସ ମାସର ସାଙ୍ଗୀତିକ ଯାତ୍ରା ଏବଂ ମନମୁଗ୍ଧକର ପ୍ରଦର୍ଶନ ପରେ ଅନୁଷ୍ଠିତ ଗ୍ରାଣ୍ଡ ଫାଇନାଲ୍ରେ ଜ୍ୟୋତିର୍ମୟୀ ‘ସାଁୟା ଓ ସାଁୟା’ ଗୀତ ପରିବେଷଣ କରି ଦର୍ଶକ ଓ ବିଚାରକଙ୍କ ମନ ଜିଣିଥିଲେ। ଅନ୍ୟ ସହ-ଫାଇନାଲିଷ୍ଟ ଅଂଶିକା ଚୋଙ୍କାର, ମନରାଜ ବୀର ସିଂହ, ମାଇସ୍କେମ ବାସୁ, ସୁହେଲ୍ ସୁଫି ଏବଂ ତନିଷ୍କ ଶୁକ୍ଲାଙ୍କୁ ପଛରେ ପକାଇ ସେ ଭାରତର ନୂତନ ସଙ୍ଗୀତ ସେନ୍ସେସନ୍ ଭାବେ ଆତ୍ମପ୍ରକାଶ କରିଛନ୍ତି। ଦୀର୍ଘ ୧୦ ମାସ ଧରି ଚାଲିଥିବା ଏହି ସିଜିନ୍ରେ ଶ୍ରେୟା ଘୋଷାଲ୍, ବିଶାଲ୍ ଦଦଲାନି ଏବଂ ବାଦଶାହା ବିଚାରକ ଦାୟିତ୍ୱ ତୁଲାଇଥିଲେ। ଚଳିତ ବର୍ଷ ଶୋ’ର ଥିମ୍ ‘ୟାଦୋଁ କି ପ୍ଲେଲିଷ୍ଟ’ ଦର୍ଶକଙ୍କ ଦ୍ୱାରା ବେଶ୍ ଆଦୃତ ହୋଇଥିବାରୁ ଏହାକୁ ଦୁଇଟି ପର୍ଯ୍ୟାୟରେ ମୋଟ ୩ ମାସର ଏକ୍ସଟେନ୍ସନ୍ ଦିଆଯାଇଥିଲା। ଜ୍ୟୋତିର୍ମୟୀ ନିଜର ଏହି ବିଜୟର ଶ୍ରେୟ ମ୍ୟୁଜିକ୍ ଥେରାପି (ସଙ୍ଗୀତ ଚିକିତ୍ସା) ମାଧ୍ୟମରେ ସୁସ୍ଥ ହୋଇଥିବା କର୍କଟ ରୋଗୀମାନଙ୍କୁ ସମର୍ପଣ କରିଛନ୍ତି।
Comments are closed, but trackbacks and pingbacks are open.