ସମ୍ବଲପୁର: ପଶ୍ଚିମବଙ୍ଗ ଆରଜି କର ହସ୍ପିଟାଲ ଦୁଷ୍କର୍ମ ଓ ହତ୍ୟା ଘଟଣାରେ ଆଜି ଗିରଫ ହୋଇଛନ୍ତି ଟିଏମସିର ପୂର୍ବତନ ବିଧାୟକ ନିର୍ମଳ ଘୋଷ। ଆରଜି କର ପୀଡ଼ିତାଙ୍କ ଅନ୍ତିମ ସଂସ୍କାର ତରବରିଆ ଭାବେ କରାଯାଇଥିବା ଅଭିଯୋଗ ଘଟଣାରେ ଆଜି ପୋଲିସ ତାଙ୍କୁ ଓଡ଼ିଶାର ସମ୍ବଲପୁରରୁ ଗିରଫ କରିଛି। ପ୍ରାମଣ ନଷ୍ଟ, ଅପରାଧିକ ଷଡ଼ଯନ୍ତ୍ର ଓ ଇଚ୍ଛା ବିରୋଧରେ ଜଣଙ୍କୁ ଗୋଟିଏ କାମ କରିବା ପାଇଁ ବାଧ୍ୟ କରିବା ଭଳି ଚାର୍ଜରେ ସମ୍ବଲପୁରରୁ ପୋଲିସ ବିଧିବଦ୍ଧ ଭାବେ ଗିରଫ କରି ତାଙ୍କୁ ଟ୍ରାଞ୍ଜିଟ ରିମାଣ୍ଡରେ କୋଲକାତା ନେଇଥିବା ଜଣାପଡ଼ିଛି। ନିର୍ମଳ ଘୋଷ ହେଉଛନ୍ତି ପାନିହାତୀ ନିର୍ବାଚନ ମଣ୍ଡଳୀର ପୂର୍ବତନ ବିଧାୟକ। ୨୦୨୬ ବିଧାନସଭା ନିର୍ବାଚନରେ ଆରଜି କର୍ ପୀଡ଼ିତାଙ୍କ ମା’କୁ ବିଜେପି ଏଠାରେ ପ୍ରାର୍ଥୀ କରିଥିଲା। ଆଉ ରତନା ଦେବନାଥ ଏଠାରୁ ବିଜୟ ହୋଇଛନ୍ତି। ରତନା ଦେବନାଥ ବିଧାୟକ ହେବା ପରେ ଆରଜି କର ଘଟଣାର ଖୋଳତାଡ଼ ପୁଣି ଆରମ୍ଭ ହୋଇଥିଲା। ସୂଚନା ଥାଉ ଯେ, ନିର୍ମଳ ଘୋଷ ଜାଣିଶୁଣି ୨୦୨୪ରେ ପୀଡ଼ିତାଙ୍କ ପରିବାର ଉପରେ ଚାପ ପକାଇ ତରବରିଆ ଭାବେ ଅନ୍ତିମ ସଂସ୍କାର ପାଇଁ ବାଧ୍ୟ କରିଥିବା ଅଭିଯୋଗ ଆସିଥିଲା। ଏଥିପାଇଁ ୨ ଦିନ ତଳେ ତାଙ୍କ ବିରୋଧରେ ପୁଲିସ୍ ଏଫଆଇଆର ରୁଜୁ କରିଥିଲା।
Comments are closed, but trackbacks and pingbacks are open.