ଭୁବନେଶ୍ବର: ବୈଷୟିକ ତ୍ରୁଟି ଯୋଗୁଁ ଝାରସୁଗୁଡ଼ା ବୀର ସୁରେନ୍ଦ୍ର ସାଏ ବିମାନବନ୍ଦରରୁ ଭୁବନେଶ୍ବର ଏବଂ ହାଇଦ୍ରାବାଦକୁ ବିମାନ ସେବା ବାତିଲ କରାଯାଇଛି। ଗତ ୧୭ ତାରିଖରୁ ଆସନ୍ତା ଅକ୍ଟୋବର ୨୪ ତାରିଖ ପର୍ଯ୍ୟନ୍ତ ଏହି ସେବା ବନ୍ଦ ରହିବ ବୋଲି ବିମାନବନ୍ଦର ନିର୍ଦ୍ଦେଶକ ଉପେନ୍ଦ୍ରନାଥ ଧୁଣ୍ଡିଆ ସୂଚନା ଦେଇଛନ୍ତି। ‘ଷ୍ଟାର୍ ଏୟାର’ ପକ୍ଷରୁ ହାଇଦ୍ରାବାଦ–ଝାରସୁଗୁଡ଼ା ଏବଂ ଝାରସୁଗୁଡ଼ା–ଭୁବନେଶ୍ୱର ମଧ୍ୟରେ ଚାଲୁଥିବା ଏହି ବିମାନ ସେବା ସାମୟିକ ଭାବେ ସ୍ଥଗିତ ରଖାଯାଇଛି। କୌଣସି ବୈଷୟିକ ତ୍ରୁଟି ଯୋଗୁଁ ସେବା ବନ୍ଦ କରାଯାଇଥିବା ବେଳେ ଅକ୍ଟୋବର ୨୪ ପରେ ଏହା ପୁନରୁଦ୍ଧାର ହେବ ବୋଲି କର୍ତ୍ତୃପକ୍ଷ ଜଣାଇଛନ୍ତି। ଏହି ଦୁଇଟି ମାର୍ଗରେ ସପ୍ତାହକୁ ୫ ଦିନ ବିମାନ ଚଳାଚଳ କରୁଥିଲା, ଯାହା ଦ୍ୱାରା ଝାରସୁଗୁଡ଼ା ସମେତ ପଶ୍ଚିମ ଓଡ଼ିଶାର ଅନେକ ଯାତ୍ରୀ ଉପକୃତ ହେଉଥିଲେ। ହେଲେ ଅଗଷ୍ଟ ୧୭ରୁ ବିମାନ ସେବା ବନ୍ଦ ନେଇ ଷ୍ଟାର୍ ଏୟାର ପକ୍ଷରୁ ବିମାନବନ୍ଦର କର୍ତ୍ତୃପକ୍ଷଙ୍କୁ ଲିଖିତ ଭାବେ ଅବଗତ କରାଯାଇଛି। ଅପରପକ୍ଷରେ, ସେବା ଅଚାନକ ବନ୍ଦ ହେବା ଯୋଗୁଁ ଯାତ୍ରୀଙ୍କ ମଧ୍ୟରେ ଅସନ୍ତୋଷ ପ୍ରକାଶ ପାଇଛି ଏବଂ ଏହାକୁ ଯଥାଶୀଘ୍ର ପୁନଃକାର୍ଯ୍ୟକ୍ଷମ କରିବାକୁ ଦାବି ହୋଇଛି।
Comments are closed, but trackbacks and pingbacks are open.