ରାଉରକେଲା: ବନ ବିଭାଗର ସଂରକ୍ଷିତ ଜଙ୍ଗଲ ଜମିରେ ବେଆଇନ ଭାବେ ନିର୍ମିତ କାର୍ଯ୍ୟାଳୟ ଉପରେ ବନ ବିଭାଗର ବଡ଼ ଆକ୍ସନ୍ । ଜଙ୍ଗଲ ଜମି ଜବରଦଖଲ ଅଭିଯୋଗରେ ପ୍ରଶାସନ ପକ୍ଷରୁ ଏହି କଠୋର କାର୍ଯ୍ୟାନୁଷ୍ଠାନ ଗ୍ରହଣ କରାଯାଇଛି। ଜଣେ ମାଜିଷ୍ଟ୍ରେଟ୍, ବରିଷ୍ଠ ପୋଲିସ ଅଧିକାରୀ, ୫ ଜଣ ଆଇଆଇସି, ପାନପୋଷ ଏସଡିପିଓ ଏବଂ ରାଉରକେଲା ବନଖଣ୍ଡ କର୍ମଚାରୀଙ୍କ ଉପସ୍ଥିତିରେ ଏହି ଉଚ୍ଛେଦ ପ୍ରକ୍ରିୟା ସମ୍ପନ୍ନ ହୋଇଛି। ରାଉରକେଲା ଏସିଏଫ୍ (ACF) ଗଜେନ୍ଦ୍ର ପାଲ ସିଂହ ମାଥୁର କହିଛନ୍ତି ଯେ, ଏହି ଢାଞ୍ଚାଟି ଦୁର୍ଗାପୁର ସଂରକ୍ଷିତ ଜଙ୍ଗଲ ମଧ୍ୟରେ ଅବସ୍ଥିତ ଥିଲା ଏବଂ ଏଥିପାଇଁ ମିଳିଥିବା ଅନୁମତିଠାରୁ ଅଧିକ ଜମିରେ ବେଆଇନ ନିର୍ମାଣ ହୋଇଥିବା ଜଣାପଡିଥିଲା। ଅଧିକାରୀଙ୍କ ସୂଚନାନୁସାରେ, ୨୦୨୩ ମସିହାରେ ଏହି ସ୍ଥାନରେ କେବଳ ୦.୦୧ ଡେସିମିଲ୍ ଜମି ପାଇଁ ଅନୁମତି ମିଳିଥିଲା। ମାତ୍ର ଏହାକୁ ବେଆଇନ ଭାବେ ୦.୦୧୫ ଡେସିମିଲକୁ ବୃଦ୍ଧି କରାଯାଇଥିଲା। ଏନେଇ ନୋଟିସ୍ ଜାରି କରାଯାଇଥିଲେ ହେଁ ଅଗଷ୍ଟ ୩୧ ସୁଦ୍ଧା କେହି ଏହାର ଉତ୍ତର ରଖିନଥିଲେ କିମ୍ବା ମାଲିକାନା ଦାବି କରିନଥିଲେ। ତେଣୁ ରାଉରକେଲା ଡିଏଫଓଙ୍କ ନିର୍ଦ୍ଦେଶକ୍ରମେ ଏହି ବେଆଇନ ନିର୍ମାଣକୁ ଭାଙ୍ଗି ଦିଆଯାଇଛି ଏବଂ ସେଠାରୁ କାଗଜପତ୍ର ସମେତ ଅନ୍ୟାନ୍ୟ ସାମଗ୍ରୀ ଜବତ କରାଯାଇ ଏକ ତାଲିକା ପ୍ରସ୍ତୁତ କରାଯାଇଛି। ଗତ ଅଗଷ୍ଟ ୧୫ ତାରିଖରେ ରାଉରକେଲା ସର୍କିଟ୍ ହାଉସରୁ ଦୁଇ ଜଣ ସଶସ୍ତ୍ର ଅପରାଧୀଙ୍କୁ ବିପୁଳ ଅସ୍ତ୍ରଶସ୍ତ୍ର ସହ ଗିରଫ କରାଯିବା ଘଟଣାରେ ସମ୍ପୃକ୍ତ ଥିବା ଅଭିଯୋଗରେ ପ୍ରକାଶ ପାଶୱାନ ବର୍ତ୍ତମାନ ଜେଲରେ ଅଛନ୍ତି। ପୋଲିସ ଦେଇଥିବା ସୂଚନା ଅନୁଯାୟୀ, ୩୫ ବର୍ଷୀୟ ପାଶୱାନ ହିଁ ସର୍କିଟ୍ ହାଉସରେ ଅପରାଧୀମାନଙ୍କୁ ଆଶ୍ରୟ ଦେଇଥିଲେ ଏବଂ ସେ ଏହି ଘଟଣାର ମୁଖ୍ୟ ଅଭିଯୁକ୍ତ। ସେ ଫେରାର ଥିବା ବେଳେ ଗତ ଅଗଷ୍ଟ ୨୭ ତାରିଖରେ ତାଙ୍କୁ ବିହାରର ସମସ୍ତିପୁରରୁ ଗିରଫ କରାଯାଇଥିଲା।
Comments are closed, but trackbacks and pingbacks are open.