ଅଁଳା ଚାଷ କରି ଲାଭବାନ ହୁଅନ୍ତୁ

ଅଁଳା ଏକ ଫଳ ହେଲେ ମଧ୍ୟ ଏହାର ଔଷଧୀୟ ବ୍ୟବହାର ବହୁତ ବେଶି । ଲୋକପ୍ରିୟ ତ୍ରିଫଳା ମଧ୍ୟରେ ଏହା ଏକ ପ୍ରମୁଖ ଉପାଦାନ । ଏସିଆ ମହାଦେଶରେ ଅଁଳାର ଜନ୍ମ । ଆମ ଦେଶର ବହୁ ଅଞ୍ଚଳରେ ଏହି ଗଛ ଦେଖିବାକୁ ମିଳେ । ଆମେରିକା, ଆଫ୍ରିକା ଓ ଅଷ୍ଟ୍ରେଲିଆ ମହାଦେଶରେ ମଧ୍ୟ ଏହା ଚାଷ କରାଯାଇଥାଏ ।
ସଦ୍ୟ ତୋଳାଯାଇଥିବା ଅଁଳା ଫଳରେ ଶତକଡ଼ା ୧୩.୭ ଭାଗ ଶ୍ୱେତସାର, ୦.୫ ଭାଗ ପୁଷ୍ଟିସାର, ୦.୫ ଭାଗ ଖଣିଜ ଲବଣ, ୦.୧ ଭାଗ ସ୍ନେହସାର ଓ ୩.୪ ଭାଗ ତନ୍ତୁଜାତୀୟ ପଦାର୍ଥ ରହିଥାଏ । ଏଥିରେ ଯଥେଷ୍ଟ ପରିମାଣର ଜୀବନିକା-ଗ ରହିଥିବାର ଜଣାଯାଏ ।
ବିଭିନ୍ନ ଜଳବାୟୁରେ ଅଁଳା ଚାଷ ହୋଇପାରିବ । ଉଭୟ ଆର୍ଦ୍ର ଏବଂ ଶୁଷ୍କାଞ୍ଚଳରେ ଏହି ଗଛ ବଢ଼ିପାରେ । ବାୟୁମଣ୍ଡଳର ଉତ୍ତାପ ୧ଂରୁ ୪୫ଂ ସେଲସିଅସ ଶୀତ ବା ଉତ୍ତାପ ସହ୍ୟ କରିପାରେ ନାହିଁ । ସମୁଦ୍ର ପତ୍ତନଠାରୁ ଆରମ୍ଭ କରି ୧୨୫୦ ମିଟର ଉଚ୍ଚା ପର୍ଯ୍ୟନ୍ତ ଅଞ୍ଚଳରେ ଏହା ଚାଷ କରାଯାଇପାରିବ ।
ନିଗିଡ଼ା, ଦୋରସା ମାଟିରେ ଅଁଳା ଭଲ ହୋଇଥାଏ । ମାଟି ଉର୍ବର ଥିଲେ ଗଛ ଶୀଘ୍ର ବଢ଼ିପାରେ । ପାହାଡ଼ିଆ ଅଞ୍ଚଳର ଲାଲ ମାଟିରେ ମଧ୍ୟ ଏହା ଚାଷ କରାଯାଇପାରିବ ।
ଫଳର ରଙ୍ଗ ଅନୁସାରେ ଅଁଳାର କିସମ ଚିହ୍ନା ଯାଇଥାଏ । କେତେକ କିସମ ହେଲା – କାଞ୍ଚନ, କ୍ରିଷ୍ଣା, ଏନ୍‌ଏ-୭, ଏନ୍‌ଏ-୧୦, ଫ୍ରାନ୍‌ସିସ୍‌, ହାଥିଝୁଲ, ଚକିଆ ହ୍ୱାଇଟ୍ ଷ୍ଟ୍ରାଇପ୍‌, ବନାରସୀ, ରେଡ଼-ଟିଞ୍ଜ, ଗ୍ରୀନ୍‌-ଟିଞ୍ଜ ଇତ୍ୟାଦି । ଡାଳ କଲମୀ, ଯୋଡ଼ କଲମୀ ଏବଂ ସିଲଡ୍ ବଡିଂ ସାହାଯ୍ୟରେ ଅଁଳାର ବଂଶ ବିସ୍ତାର କରାଯାଇଥାଏ ।
ଜୁଲାଇ ମାସରେ ଅଁଳା ଲଗାଇବା ଉଚିତ । ଧାଡ଼ିକୁ ଧାଡ଼ି ଓ ଗଛକୁ ଗଛ ଦୂରତା ୮ ମିଟର ରଖିବା ଆବଶ୍ୟକ । ଏହି ହିସାବରେ ଏକର ପ୍ରତି ପ୍ରାୟ ୬୩ଟି ଗଛ ଲାଗିପାରିବ । ଗାତର ଲମ୍ବ, ଓସାର ଓ ଗଭୀରତା ୧ ମିଟର ଲେଖାଏଁ ହେବା ଉଚିତ । ଲଗାିବା ବେଳେ ୨ ଝୁଡ଼ି ସଢ଼ା ଗୋବର ଖତ ପ୍ରୟୋଗ କରାଯାଇପାରେ । ଗୋଟିଏ ବଡ଼ ଗଛ ପାଇଁ ପ୍ରତି ବର୍ଷ ୩-୪ ଝୁଡ଼ି ସଢ଼ା ଖତ ଦେବାକୁ ହେବ । ତା ସହିତ ୭୦୦ ଗ୍ରାମ ଯବକ୍ଷାର, ୧୬୦ ଗ୍ରାମ ଫସଫରସ ଓ ୯୦୦ ଗ୍ରାମ ପଟାସ ଦେବାକୁ ପଡ଼ିବ । ଏଥିପାଇଁ ୧୫୪୦ ଗ୍ରାମ ୟୁରିଆ, ୧ କି.ଗ୍ରା. ସିଙ୍ଗଲ ସୁପର ଫସଫେଟ୍ ଓ ୧.୫ କି.ଗ୍ରା. ମ୍ୟୁରେଟ୍ ଅଫ୍ ପଟାସ ଦରକାର ପଡ଼ିବ । ଏହି ସାରକୁ ଦୁଇ ଭାଗ କରି ଥରେ ବର୍ଷାଋତୁ ଆରମ୍ଭରେ ଓ ଆଉ ଥରେ ବର୍ଷାଋତୁ ଶେଷରେ ପ୍ରୟୋଗ କରାଯିବ ।
ଶୀତଦିନେ ଓ ଖରାଦିନେ ଜଳସେଚନର ବ୍ୟବସ୍ଥା କରିବା ଉଚିତ । ମାଟି ଶୁଖିଗଲେ ଫଳ ଅମଳ କମିଯିବାର ଆଶଙ୍କା ରହିଛି । ବର୍ଷା ଋତୁରେ ଜଳ ନିଷ୍କୋସନ ବ୍ୟବସ୍ଥା ହୋଇଥିବା ଆବଶ୍ୟକ ।
ଅଁଳା ଗଛରେ କଳଙ୍କି ରୋଗ ହେବାର ଆଶଙ୍କା ରହିଛି । ଏହି ରୋଗ ହେଲେ ପତ୍ର ଏବଂ ଫଳ ଉପରେ ବାଦାମୀ ରଙ୍ଗର ଦାଗମାନ ଦେଖାଯାଏ । ଏହାକୁ ଦମନ କରିବା ପାଇଁ ପ୍ରତି ଲିଟର ପାଣିରେ ୩ ଗ୍ରାମ ଇଣ୍ଡୋଫିଲ ଏମ୍‌-୪୫ ବା ଡିଥେନ୍ ଜେଡ୍‌-୭୮ ମିଶାଇ ଗଛରେ ସ୍ପ୍ରେ କରିବାକୁ ପଡ଼ିବ ।
ଅଁଳା ଗଛରେ ସଁବାଳୁଆ ଲାଗି କାଣ୍ଡକୁ କଣା କରି ଦିଅନ୍ତି । ଆକ୍ରାନ୍ତ ଗଛ ବଢ଼ିପାରେ ନାହିଁ । ଏହି ପୋକକୁ ଦମନ କରିବା ପାଇଁ ପ୍ରତି ଲିଟର ପାଣିରେ ୧.୫ ମିଲିଲିଟର ପ୍ରୋଫିଟ୍ ବା ସୁଡୋଲ ବା ମେଟାସିଡ୍‌-୫୦ ମିଶାଇ ଗଛରେ ସ୍ପ୍ରେ କରିବାକୁ ପଡ଼ିବ ।
ଗଛ ଲଗାଇବାର ୯-୧୦ ବର୍ଷ ପରେ ଫଳ ଆସିଥାଏ । ପ୍ରାୟ ଏକ ମାସ ଧରି ଗଛରେ ଫୁଲ ଧରେ । ଛୋଟ ଅବସ୍ଥାରେ ଫଳ ସବୁଜ ଥାଏ । କିନ୍ତୁ ପାକଳ ହୋଇଗଲେ ଇଷତ୍ ହଳଦିଆ ଦେଖାଯାଏ । ପାକଳ ଫଳ ଟାଣ ଥାଏ । ଗୋଟିଏ ବଡ଼ ଗଛରୁ ବର୍ଷକୁ ପ୍ରାୟ ୨ କ୍ୱିଣ୍ଟାଲ ଫଳ ମିଳିପାରିବ ।