ପ୍ରତିରକ୍ଷା ତଥ୍ୟ ଲିକ୍ କରି ଗିରଫ ହେଲେ ବାୟୁସେନା ଅଧିକାରୀ

ନୂଆଦିଲ୍ଲୀ:ପାକିସ୍ତାନୀ ଗୁଇନ୍ଦା ଏଜେଣ୍ଟଙ୍କ ‘ହନିଟ୍ରାପ୍’ ରେ ଶିକାର ହୋଇ ଦେଶର ସମ୍ବେଦନଶୀଳ ପ୍ରତିରକ୍ଷା ତଥ୍ୟ ଲିକ୍ କରିବା ଅଭିଯୋଗରେ ଜଣେ ୪୪ ବର୍ଷୀୟ ଭାରତୀୟ ବାୟୁସେନା (IAF) ୱିଙ୍ଗ କମାଣ୍ଡରଙ୍କୁ ଦିଲ୍ଲୀ ପୋଲିସ ଦ୍ୱାରା ଗିରଫ କରାଯାଇଛି।ପୋଲିସ ରିପୋର୍ଟ ଅନୁଯାୟୀ, ଅଭିଯୁକ୍ତ ଅଧିକାରୀ ଜଣକ ସୋସିଆଲ ମିଡିଆ ମାଧ୍ୟମରେ ଜଣେ ଅଜଣା ମହିଳାଙ୍କ ସମ୍ପର୍କରେ ଆସିଥିଲେ। ଉକ୍ତ ମହିଳା ଜଣକ ପ୍ରକୃତରେ ପାକିସ୍ତାନର ଜଣେ ଗୁଇନ୍ଦା ଏଜେଣ୍ଟ ଥିଲେ ବୋଲି ତଦନ୍ତକାରୀ ସଂସ୍ଥା ସନ୍ଦେହ କରୁଛି। ଲଗାତାର ଚାଟିଂ ଏବଂ ଭିଡିଓ କଲ୍ ମାଧ୍ୟମରେ ମହିଳା ଜଣକ ୱିଙ୍ଗ କମାଣ୍ଡରଙ୍କ ବିଶ୍ୱାସ ଜିତିଥିଲେ। ପରେ ତାଙ୍କୁ ପ୍ରଲୋଭିତ କରି ଭାରତୀୟ ପ୍ରତିରକ୍ଷା ବ୍ୟବସ୍ଥା, ସାମରିକ କାର୍ଯ୍ୟକଳାପ ଏବଂ ଗୁରୁତ୍ୱପୂର୍ଣ୍ଣ ସାମରିକ ଦସ୍ତାବିଜର ଫଟୋ ଓ ଭିଡିଓ ଡିଜିଟାଲ୍ ମାଧ୍ୟମରେ ହାସଲ କରିଥିଲେ। ଏପରିକି ଏକ ସ୍ପାଏୱେର୍ (ଗୁପ୍ତଚର ଆପ୍) ନିଜ ସହକର୍ମୀଙ୍କ ଫୋନରେ ଇନଷ୍ଟଲ୍ କରିବାକୁ ମଧ୍ୟ ସେ ଅଧିକାରୀଙ୍କୁ ବାଧ୍ୟ କରିଥିଲେ ବୋଲି ଅଭିଯୋଗ ହୋଇଛି।ଦିଲ୍ଲୀ ପୋଲିସର ସ୍ପେଶାଲ ସେଲ୍ ଏବଂ କେନ୍ଦ୍ରୀୟ ଗୁଇନ୍ଦା ସଂସ୍ଥାମାନଙ୍କ ମିଳିତ ତଦନ୍ତରୁ ଏହି ସମ୍ବେଦନଶୀଳ ଘଟଣାର ପର୍ଦ୍ଦାଫାଶ ହୋଇଛି।ଏହି ଘଟଣାକୁ ନେଇ ଭାରତୀୟ ବାୟୁସେନା କଡ଼ା ଆଭିମୁଖ୍ୟ ଗ୍ରହଣ କରିଛି। ଅଧିକାରୀମାନେ କହିଛନ୍ତି ଯେ, Official Secrets Act ଅନୁସାରେ ଏଭଳି ଅପରାଧକୁ କୌଣସି ପରିସ୍ଥିତିରେ ବରଦାସ୍ତ କରାଯିବ ନାହିଁ।ବାୟୁସେନା ଅଧିକାରୀଙ୍କ କହିବା ଅନୁସାରେ, ସମ୍ପୃକ୍ତ ୱିଙ୍ଗ କମାଣ୍ଡରଙ୍କ ଉପରେ ନଜର ରଖାଯାଉଥିଲା। ଠିକ୍ ସମୟରେ ନିଆଯାଇଥିବା ପଦକ୍ଷେପ ଯୋଗୁଁ ତାଙ୍କୁ ଧରାଯାଇପାରିଛି।