ଆଜି ଅଁଳା ନବମୀରେ ମା’ ରାଧାରାଣୀଙ୍କ ଦୁର୍ଲଭ ପାଦ ଦର୍ଶନ

27

ଭୁବନେଶ୍ୱର: ଆଜି ପବିତ୍ର ଅଁଳା ନବମୀ ଅଥବା ଅକ୍ଷୟ ନବମୀ। କାର୍ତ୍ତିକ ମାସର ଶୁକ୍ଳପକ୍ଷ ନବମୀ ତିଥିକୁ ହିନ୍ଦୁ ଧର୍ମରେ ଅତ୍ୟନ୍ତ ଶୁଭ ଓ ପୁଣ୍ୟଦାୟୀ ବୋଲି ବିବେଚନା କରାଯାଏ। ଧାର୍ମିକ ବିଶ୍ୱାସ ଅନୁସାରେ, ଏହି ଦିନ ଭଗବାନ ବିଷ୍ଣୁଙ୍କ ସହ ଅଁଳା ଗଛର ପୂଜା କଲେ ଅକ୍ଷୟ ପୁଣ୍ୟ ପ୍ରାପ୍ତି ହୋଇଥାଏ। ଏହି ଅବସରରେ ପୂଜାର୍ଚ୍ଚନା, ଜପ, ତପ ଓ ଦାନଧର୍ମର ବିଶେଷ ମହତ୍ତ୍ୱ ରହିଛି। ଅନ୍ୟପଟେ ଓଡ଼ିଶାର ପ୍ରସିଦ୍ଧ ସାକ୍ଷୀଗୋପାଳ ମନ୍ଦିରରେ ଆଜି ବର୍ଷକୁ ଥରେ ମାତ୍ର ମିଳୁଥିବା ମା’ ରାଧାରାଣୀଙ୍କ ଦୁର୍ଲଭ ରାଧାପାଦ ଦର୍ଶନ ପାଇଁ ଶ୍ରଦ୍ଧାଳୁଙ୍କ ମଧ୍ୟରେ ପ୍ରବଳ ଉତ୍ସାହ ଦେଖିବାକୁ ମିଳିଛି। ଧାର୍ମିକ ମାନ୍ୟତା ରହିଛି ଯେ ଅଁଳା ଗଛରେ ଭଗବାନ ବିଷ୍ଣୁ ଏବଂ ମା’ ମହାଲକ୍ଷ୍ମୀଙ୍କ ବାସ ରହିଥାଏ। ତେଣୁ ଏହି ଦିନ ଅଁଳା ଗଛକୁ ବିଧିପୂର୍ବକ ପୂଜା କରିବା ସହ ଏହାର ମୂଳରେ ଜଳ ଅର୍ପଣ କରିବାର ପରମ୍ପରା ରହିଛି। ଏହି ପୂଜା ଦ୍ୱାରା ପରିବାରରେ ସୁଖ, ଶାନ୍ତି, ସମୃଦ୍ଧି ଓ ମଙ୍ଗଳ ଆସିଥାଏ ବୋଲି ଭକ୍ତଙ୍କ ଦୃଢ଼ ବିଶ୍ୱାସ ରହିଛି। ଏହାଛଡ଼ା ଏହି ଦିନ ଅଁଳା ଗଛ ତଳେ ରୋଷେଇ କରି ଭୋଜନ ଗ୍ରହଣ କରିବାର ମଧ୍ୟ ବିଶେଷ ପରମ୍ପରା ରହିଛି। ଉଦୟା ତିଥି ଅନୁସାରେ ଆଜି ସମଗ୍ର ରାଜ୍ୟରେ ଏହି ପବିତ୍ର ପର୍ବ ଭକ୍ତିଭାବ ସହକାରେ ପାଳନ କରାଯାଉଛି।

Comments are closed, but trackbacks and pingbacks are open.