ନୂଆଦିଲ୍ଲୀ: ଆଗାମୀ କିଛି ଦିନ ପର୍ଯ୍ୟନ୍ତ ଦେଶର ବିଭିନ୍ନ ରାଜ୍ୟରେ ବର୍ଷାର ପ୍ରଭାବ ଜାରି ରହିବ। ଭାରତୀୟ ପାଣିପାଗ ବିଭାଗ (IMD)ର ବରିଷ୍ଠ ବୈଜ୍ଞାନିକ ଡକ୍ଟର ଶଶିକାନ୍ତ ଗଣମାଧ୍ୟମକୁ ସୂଚନା ଦେଇ କହିଛନ୍ତି ଯେ, ଚଳିତ ବର୍ଷ ଏପର୍ଯ୍ୟନ୍ତ ଦେଶରେ ସ୍ୱାଭାବିକ ଠାରୁ କମ୍ ବର୍ଷା ରେକର୍ଡ ହୋଇଥିଲେ ହେଁ ଆଗକୁ ଅନେକ ଅଞ୍ଚଳରେ ପ୍ରବଳ ବର୍ଷା ହେବାର ସମ୍ଭାବନା ରହିଛି। ଡକ୍ଟର ଶଶିକାନ୍ତଙ୍କ କହିବା ଅନୁଯାୟୀ, ଆଗାମୀ ଦିନରେ ମଧ୍ୟ ଭାରତ ଏବଂ ଦକ୍ଷିଣ ଭାରତର ଅନେକ ସ୍ଥାନରେ ଭଲ ବର୍ଷା ହୋଇପାରେ। ସେହିପରି ଉତ୍ତର ଭାରତରେ ମଧ୍ୟ ମୌସୁମୀ ସକ୍ରିୟ ରହିବ। ଆସନ୍ତା କିଛି ଦିନ ମଧ୍ୟରେ ଦିଲ୍ଲୀ, ହରିୟାଣା ଏବଂ ଉତ୍ତର ପ୍ରଦେଶରେ ବର୍ଷା ହେବାର ଅନୁମାନ କରାଯାଉଛି। ଏହା ବ୍ୟତୀତ ଉତ୍ତର-ପୂର୍ବ ଭାରତର କେତେକ ରାଜ୍ୟ ସହ ଉପକୂଳ କର୍ଣ୍ଣାଟକ, କେରଳ ଓ ତାମିଲନାଡୁରେ ପ୍ରବଳ ବର୍ଷା ଜାରି ରହିପାରେ। ଜୁଲାଇ ୯ ତାରିଖ ସୁଦ୍ଧା ସାରା ଦେଶରେ ମୌସୁମୀ ବାୟୁ ସମ୍ପୂର୍ଣ୍ଣ ଭାବେ ସକ୍ରିୟ ହୋଇସାରିଥିବାରୁ ଏହାର ପ୍ରଭାବ ଏବେ ପ୍ରାୟ ସମସ୍ତ ରାଜ୍ୟରେ ଅନୁଭୂତ ହେଉଛି। ଗତ କିଛି ଦିନ ମଧ୍ୟରେ ଗୁଜରାଟ ଏବଂ ମହାରାଷ୍ଟ୍ରର କେତେକ ଅଞ୍ଚଳରେ ରେକର୍ଡ ପରିମାଣର ପ୍ରବଳ ବର୍ଷା ହୋଇଯାଇଛି। ବର୍ତ୍ତମାନ ମଧ୍ୟ ଭାରତରେ ମୌସୁମୀ ସକ୍ରିୟ ଥିବାରୁ ବିଭିନ୍ନ ସ୍ଥାନରେ ଭଲ ବର୍ଷା ହେଉଛି। ଆଇଏମଡିର ଆକଳନ ଅନୁଯାୟୀ, ଆସନ୍ତା ସାତ ଦିନ ମଧ୍ୟରେ ଉତ୍ତର ପ୍ରଦେଶ, ବିହାର ଏବଂ ଉତ୍ତର-ପୂର୍ବ ଭାରତର ରାଜ୍ୟଗୁଡ଼ିକରେ ବର୍ଷାର ପରିମାଣ ସ୍ୱାଭାବିକ କିମ୍ବା ସ୍ୱାଭାବିକ ଠାରୁ ଅଧିକ ରହିବ। ତେବେ ଉତ୍ତର ଭାରତର କେତେକ ସୀମିତ ଅଞ୍ଚଳରେ ମୌସୁମୀ ଜନିତ ବର୍ଷା ସ୍ୱାଭାବିକ ଠାରୁ ସାମାନ୍ୟ କମ୍ ରହିପାରେ ବୋଲି ସେ ପ୍ରକାଶ କରିଛନ୍ତି।
Comments are closed, but trackbacks and pingbacks are open.