ଭୁବନେଶ୍ଵର: ବଣ୍ଡାଘାଟିର ଲୋକଙ୍କ ସମସ୍ୟାର ସମାଧାନ ପାଇଁ ରାସ୍ତାଘାଟ, ଆବାସ ଗୃହ, ପାନୀୟ ଜଳ, ମୋବାଇଲ ଟାୱାର ପ୍ରତିଷ୍ଠା ସହ ପର୍ଯ୍ୟଟନ ବିକାଶ ସ୍ଥଳୀର ପାଇଁ ରାଜ୍ୟ ସରକାର ବଦ୍ଧ ପରିକର ବୋଲି ଉପ ମୁଖ୍ୟମନ୍ତ୍ରୀ ତଥା ମହିଳା, ଶିଶୁ ବିକାଶ, ମିଶନ ଶକ୍ତି ଓ ପର୍ଯ୍ୟଟନ ମନ୍ତ୍ରୀ ପ୍ରଭାତୀ ପରିଡ଼ା ପ୍ରକାଶ କରିଛନ୍ତି। ମାଲକାନଗିରି ଜିଲ୍ଲାର ଖଇରପୁଟ ବ୍ଲକ ଅନ୍ତର୍ଗତ ମୁଦୁଲିପଡ଼ା ସ୍ଥିତ ବଣ୍ଡା ଉନ୍ନୟନ ସଂସ୍ଥା କାର୍ଯ୍ୟଳୟ ପରିସରରେ ଅନୁଷ୍ଟିତ ବ୍ୟକ୍ତିଗତ, ଗୋଷ୍ଠୀଗତ ଜଙ୍ଗଲ ଜମି ପଟ୍ଟା ଓ ବସୁନ୍ଧରା ଯୋଜନା ଅନ୍ତର୍ଗତ ଘରବାରୀ ପଟ୍ଟା ବଣ୍ଟନ ଉତ୍ସବରେ ଯୋଗ ଦେଇ ସେ ଏହା ପ୍ରକାଶ କରିଛନ୍ତି। ବଣ୍ଡା ଜନଜାତିଙ୍କ ପାଇଁ ଆବାସ ଯୋଜନାରେ ଅତିରିକ୍ତ ୫୦ ହଜାର ଟଙ୍କା ପ୍ରଦାନ ପାଇଁ ମୁଖ୍ୟମନ୍ତ୍ରୀ ଘୋଷଣା କରିଥିବା ଉପ ମୁଖ୍ୟମନ୍ତ୍ରୀ ଶ୍ରୀମତୀ ପରିଡ଼ା ପ୍ରକାଶ କରିଥିଲେ। ଏହାବ୍ୟତୀତ ବଣ୍ଡାଘାଟିରେ ହାଟ, ସଂଗ୍ରହାଳୟ ପ୍ରତିଷ୍ଠା ସହ ବଣ୍ଡା ଜନଜାତି ପାଇଁ ଭୁବନେଶ୍ୱରର ମିଶନ ଶକ୍ତି ବଜାରରେ ଏକ ଷ୍ଟଲ ଯୋଗାଇ ଦିଆଯିବ। ବଣ୍ଡା ଜନଜାତିର କିଛି ହିତାଧିକାରୀ ସୁଭଦ୍ରା ଯୋଜନାରୁ ବଞ୍ଚିତ ହେବା ଜଣାପଡିବା ପରେ ସେଗୁଡିକୁ ଠିକ ଭାବେ ଯାଞ୍ଚ କରିବା ସହ ସର୍ଭେ କରିବାକୁ ଜିଲ୍ଲା ପ୍ରଶାସନକୁ ସେ ନିର୍ଦେଶ ଦେଇଛନ୍ତି। ଏଣୁ ଆସନ୍ତା ୨୫ ତାରିଖରେ ସୁଭଦ୍ରା ଯୋଜନାର ଚତୁର୍ଥ ପର୍ଯ୍ୟାୟ ଅର୍ଥ ସହାୟତାକୁ ସ୍ଥଗିତ କରାଯାଇଥିବା ସେ ପ୍ରକାଶ କରିଛନ୍ତି। ଏ ଅବସରରେ ଉପ ମୁଖ୍ୟମନ୍ତ୍ରୀ ଶ୍ରୀମତୀ ପରିଡ଼ା ୧୫ ଜଣଙ୍କୁ ବ୍ୟକ୍ତିଗତ, ଗୋଷ୍ଠୀଗତ ଜଙ୍ଗଲ ଜମି ପଟ୍ଟା ଓ ବସୁନ୍ଧରା ଯୋଜନା ଅନ୍ତର୍ଗତ ଘରବାରୀ ପଟ୍ଟା ବଣ୍ଟନ କରିଥିଲେ। ଏଥିପୂର୍ବରୁ ଉପ ମୁଖ୍ୟମନ୍ତ୍ରୀ ଶ୍ରୀମତୀ ପରିଡ଼ା ମୁଦୁଲିପଡାସ୍ଥିତ ସ୍ୱତନ୍ତ୍ର ଦକ୍ଷତା ତାଲିମ କାର୍ଯ୍ୟକ୍ରମ ଅଧିନରେ ଅଳଙ୍କାର ତିଆରି କେନ୍ଦ୍ର, ଅଙ୍ଗନବାଡ଼ି କେନ୍ଦ୍ର ଓ ସରକାରୀ ଏସ.ଏସ.ଡି ଉଚ୍ଚ ବିଦ୍ୟାଳୟ ପରିଦର୍ଶନ କରି ଆଲୋଚନା କରିଥିଲେ। ଏଥିସହ ସୀତାକୁଣ୍ଡ ପର୍ଯ୍ୟଟନ ସ୍ଥଳୀ ପରିଦର୍ଶନ କରି ପୂଜାର୍ଚ୍ଚନା କରିଥିଲେ। ଏଥିରେ ମାଲକାନଗିରି ବିଧାୟକ ନରସିଂହ ମାଡ଼କାମୀ, ଚିତ୍ରକୋଣ୍ଡା ବିଧାୟକ ମଙ୍ଗୁ ଖିଲ, ଖାଇରପୁଟ ବ୍ଲକ ଅଧ୍ୟକ୍ଷ ବିଘ୍ନ କିରସାନି, ପୂର୍ବତନ ବିଧାୟକ ଦମ୍ବୁରୁ ସୀସା, ଜିଲ୍ଲାପାଳ ଆଶିଷ ଈଶ୍ୱର ପାଟିଲ ଓ ଆରକ୍ଷୀ ଅଧିକ୍ଷକ ବିବେକାନନ୍ଦ ଶର୍ମା ଯୋଗ ଦେଇଥିଲେ।
Comments are closed, but trackbacks and pingbacks are open.