ନୂଆଦିଲ୍ଲୀ: କେସି ତ୍ୟାଗୀ ଜେଡିୟୁ ଜାତୀୟ ମୁଖପାତ୍ର ପଦରୁ ଇସ୍ତଫା ଦେଇଛନ୍ତି। ବ୍ୟକ୍ତିଗତ କାରଣ ଦର୍ଶାଇ କେସି ତ୍ୟାଗୀ ମୁଖପାତ୍ର ପଦରୁ ଇସ୍ତଫା ଦେଇଛନ୍ତି। ରାଜୀବ ରଂଜନ ପ୍ରସାଦ ବର୍ତ୍ତମାନ ଜେଡିୟୁ ର ଜାତୀୟ ମୁଖପାତ୍ର ହେବେ। ଦଳର ସାଧାରଣ ସମ୍ପାଦକ ଆଫାକ ଅହମ୍ମଦ ଖାନ ଆଜି ଏକ ଚିଠି ଜାରି କରି ଏ ସମ୍ପର୍କରେ ସୂଚନା ଦେଇଛନ୍ତି। ଜେଡିୟୁ ସାଧାରଣ ସମ୍ପାଦକ ଆଫାକ ଅହମ୍ମଦ ଖାନଙ୍କ ଦ୍ୱାରା ଦିଆଯାଇଥିବା ଚିଠିରେ ଲେଖାଯାଇଛି ଯେ, ‘ଜନତା ଦଳ (ୟୁନାଇଟେଡ୍) ର ରାଷ୍ଟ୍ରୀୟ ସଭାପତି ନୀତୀଶ କୁମାର (ମୁଖ୍ୟମନ୍ତ୍ରୀ, ବିହାର) ରାଜୀବ ରଂଜନ ପ୍ରସାଦଙ୍କୁ ଜାତୀୟ ମୁଖପାତ୍ର ପଦରେ ନିଯୁକ୍ତ କରିଛନ୍ତି। କେସି ତ୍ୟାଗି ବ୍ୟକ୍ତିଗତ କାରଣରୁ ଦଳର ମୁଖପାତ୍ର ପଦରୁ ଇସ୍ତଫା ଦେଇଛନ୍ତି।
ପ୍ରକାଶ ଯେ, କେସି ତ୍ୟାଗୀ ଜେଡିୟୁ ର ଜଣେ ବରିଷ୍ଠ ଏବଂ ଶକ୍ତିଶାଳୀ ନେତା ଭାବରେ ବିବେଚନା କରାଯାଏ। ମୁଖ୍ୟମନ୍ତ୍ରୀ ନୀତୀଶଙ୍କର ସେ ଅତି ଘନିଷ୍ଠ। ପ୍ରତ୍ୟେକ ପ୍ରସଙ୍ଗରେ ସେ ଖୋଲାଖୋଲି ଭାବେ ନିଜର ମତ ପ୍ରକାଶ କରନ୍ତି। ଏଥି ସହିତ ବିହାର ବିଧାନସଭା ନିର୍ବାଚନ ପୂର୍ବରୁ କେସି ତ୍ୟାଗୀ ଜାତୀୟ ମୁଖପାତ୍ର ପଦରୁ ଇସ୍ତଫା ଦେବା ଦଳ ପାଇଁ ଏକ ଝଟକା ବୋଲି ବିବେଚନା କରାଯାଉଛି। ଗୋଟିଏ ପଟେ ମୁଖ୍ୟମନ୍ତ୍ରୀ ନୀତୀଶ ଆଜିକାଲି ପାର୍ଟୀରେ ବହୁତ ସକ୍ରିୟ ଥିବା ଜଣାପଡିଛି। ଗୋଟିଏ ପଟେ ପଦାଧିକାରମାନଙ୍କର ଲଗାତାର ପରିବର୍ତ୍ତନ କରି ସଂଗଠନକୁ ମଜବୁତ କରିବାକୁ ଚେଷ୍ଟା କରୁଥିବାବେଳେ ଅନ୍ୟପକ୍ଷରେ କେସି ତ୍ୟାଗୀଙ୍କ ଇସ୍ତଫା ଦଳ ପାଇଁ କ୍ଷତିକାରକ ହୋଇପାରେ। ଏଥି ସହିତ, କିଛି ଦିନ ପୂର୍ବରୁ କେସି ତ୍ୟାଗୀ ଇସ୍ରାଏଲ ପ୍ରସଙ୍ଗରେ ବିରୋଧୀଙ୍କ ସହ ହାତ ମିଳାଇଥିଲେ। ପ୍ରଧାନମନ୍ତ୍ରୀ ମୋଦୀଙ୍କୁ ପରାମର୍ଶ ଦେବାବେଳେ ସେ କହିଥିଲେ ଯେ, କେନ୍ଦ୍ର ସରକାର ତୁରନ୍ତ ଇସ୍ରାଏଲକୁ ସହାୟତା ବନ୍ଦ କରିବା ଉଚିତ। ଏବେ ତାଙ୍କ ଇସ୍ତଫା ସାମ୍ନାକୁ ଆସିଛି। ଏହି କାରଣରୁ JDU ସମ୍ବନ୍ଧରେ ରାରାଜନୈତିକ ମହଲାରେ ବିଭିନ୍ନ ପ୍ରକାରର ଆଲୋଚନା ଆରମ୍ଭ ହୋଇଛି।
Comments are closed, but trackbacks and pingbacks are open.