ଭୁବନେଶ୍ୱର: ନିର୍ବାଚନ ପୂର୍ବରୁ ଓଲିଉଡ କଳାକାରଙ୍କୁ ଟାର୍ଗେଟ କରିଥିବା ଅଭିଯୋଗରେ ଭାରତୀୟ ଜନତା ପାର୍ଟି (ବିଜେପି) ବିଜୁ ଜନତା ଦଳ (ବିଜେଡି)କୁ ତୀବ୍ର ସମାଲୋଚନା କରିଛି ।
ବିଜେପି ନେତ୍ରୀ ତଥା ଓଲିଉଡ ଅଭିନେତ୍ରୀ ପିଙ୍କି ପ୍ରଧାନ କହିଛନ୍ତି, ଅନୁଭବ ମହାନ୍ତି, ସିଦ୍ଧାନ୍ତ ମହାପାତ୍ର ଓ ଅରିନ୍ଦମ ରାୟଙ୍କ ଭଳି ସେଲିବ୍ରିଟିଙ୍କୁ ବିଜେପିରେ ସାମିଲ କରିବା ପରେ ବିଚଳିତ ହୋଇ ବିଜେଡି ହତାଶ ହୋଇ ଓଲିଉଡ କଳାକାରଙ୍କୁ ବୈଠକ ପାଇଁ ଡାକିଥିବା ସେ କହିଛନ୍ତି।
ନବୀନ ନିବାସରେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଓ ଭିକେ ପାଣ୍ଡିଆନଙ୍କୁ ଭେଟିବା ପାଇଁ ଶାସକ ବିଜେଡି ଓଡ଼ିଆ ଚଳଚ୍ଚିତ୍ର ଜଗତର ଅନେକ ଅଭିନେତା, ହାସ୍ୟ ଅଭିନେତା ଓ କଣ୍ଠଶିଳ୍ପୀଙ୍କୁ ନିମନ୍ତ୍ରଣ କରିଛି ବୋଲି ପିଙ୍କି ପ୍ରଧାନ କହିଛନ୍ତି। ନିଜ ଦଳରେ ଷ୍ଟାର ପ୍ରଚାରକଙ୍କ ଅନୁପସ୍ଥିତିକୁ ନେଇ ବିଜେଡି ସଂଘର୍ଷ କରୁଥିବା ବେଳେ ଏଭଳି ପଦକ୍ଷେପ ନିଆଯାଇଛି ବୋଲି ପିଙ୍କି କହିଛନ୍ତି।
ନବୀନ ପଟ୍ଟନାୟକ ତାଙ୍କର ଏକମାତ୍ର ଷ୍ଟାର ପ୍ରଚାରକ ବୋଲି ବିଜେଡିର ପୂର୍ବରୁ ଦାବି କରି ଆସୁଥିବା ବେଳେ ଏବେ ହଠାତ ଅନ୍ୟ ଓଲିଉଡ ତାରକାଙ୍କୁ ବିଜେଡି ସାମିଲ କରିବାକୁ ଆଗ୍ରହ ପ୍ରକାଶ କରିବାର ଅର୍ଥ “ହୃଦୟ ପରିବର୍ତ୍ତନ ନୁହେଁ କି?” ବୋଲି ସେ ପ୍ରଶ୍ନ କରିଛନ୍ତି।
ଉଲ୍ଲେଖଯୋଗ୍ୟ, ଗତକାଲି ଅଭିନେତା ବାବୁଶାନ୍, ପପୁ ପମ୍ ପମ୍, ଅମ୍ଲାନ ଦାସ, ଶୈଳେନ୍ଦ୍ର, ଅଶ୍ୱିନୀ ତ୍ରିପାଠୀ, ଭୂମିକା, ସୁପ୍ରିୟା, ପ୍ରେରଣା, କମେଡିଆନ୍ ପ୍ରଜ୍ଞା, କଣ୍ଠଶିଳ୍ପୀ ତାରିକ୍ ଅଜିଜ୍ ଙ୍କ ଭଳି ପ୍ରମୁଖ ବ୍ୟକ୍ତି ନବୀନ ନିବାସ ଯାଇଥିଲେ।
ବୈଠକର ଉଦ୍ଦେଶ୍ୟ ବିଜେଡି ସ୍ପଷ୍ଟ କରିନଥିବା ବେଳେ କଳାକାରମାନେ କିଛି ତଥ୍ୟ ପ୍ରଦାନ କରିଛନ୍ତି। ପପୁ ପମ୍ ପମଙ୍କ କହିବା ଅନୁଯାୟୀ, ଓଡ଼ିଆ ଫିଲ୍ମ ଇଣ୍ଡଷ୍ଟ୍ରି ଓ ଏହାର ଅଭିବୃଦ୍ଧିକୁ କେନ୍ଦ୍ର କରି ଚର୍ଚ୍ଚା ହୋଇଥିଲା। ନିର୍ବାଚନ ପ୍ରଚାର କିମ୍ବା ବିଜେଡିକୁ ପ୍ରୋତ୍ସାହନ ଦେବା ସହ ଏହାର କୌଣସି ସମ୍ପର୍କ ନାହିଁ ବୋଲି ସେ କହିଛନ୍ତି।
ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଏବଂ ଭିକେ ପାଣ୍ଡିଆନଙ୍କ ଠାରୁ ନିମନ୍ତ୍ରଣ ପାଇଥିବା ଅଭିନେତ୍ରୀ ସୁପ୍ରିୟା କହିଛନ୍ତି ଯେ ଏହି ବୈଠକରେ ଆଗାମୀ ଦଶନ୍ଧିରେ ଓଡ଼ିଶାର ବିକାଶର ମାର୍ଗ ନିର୍ଦ୍ଧାରଣ ଉପରେ ଗୁରୁତ୍ୱ ଦିଆଯାଇଛି।
Comments are closed, but trackbacks and pingbacks are open.