ୱାଶିଂଟନ୍: ବିଶ୍ୱ ରାଜନୀତିରେ ଆସିବାକୁ ଯାଉଛି ଏକ ବଡ଼ଧରଣର ପରିବର୍ତ୍ତନ। ଆସନ୍ତା ସପ୍ତାହରେ ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ, ରୁଷ ରାଷ୍ଟ୍ରପତି ଭ୍ଲାଦିମିର ପୁତିନ ଏବଂ ଚୀନ୍ ରାଷ୍ଟ୍ରପତି ସି ଜିନପିଙ୍ଗ୍ ଏକକାଳୀନ ଏକା ମଞ୍ଚରେ ତ୍ରିପାକ୍ଷିକ ବୈଠକରେ ଯୋଗଦେବେ। ଚୀନ୍ର ଶେନଝେନ୍ଠାରେ ଅନୁଷ୍ଠିତ ହେବାକୁ ଥିବା ଆପେକ୍ (APEC) ସମ୍ମିଳନୀ ଅବସରରେ ଏହି ପ୍ରମୁଖ ବୈଠକ ବସିବ ବୋଲି ହ୍ୱାଇଟ୍ ହାଉସ୍ ପକ୍ଷରୁ ସୂଚନା ଦିଆଯାଇଛି। ଗତ ୮୦ ବର୍ଷ ମଧ୍ୟରେ ଏହା ପ୍ରଥମ ଘଟଣା, ଯେଉଁଠାରେ ବିଶ୍ୱର ଏହି ତିନି ଶକ୍ତିଶାଳୀ ରାଷ୍ଟ୍ରର ମୁଖ୍ୟମାନେ ସୁରକ୍ଷା ଓ ରଣନୀତି ନେଇ ସିଧାସଳଖ ଆଲୋଚନା କରିବେ। ହ୍ୱାଇଟ୍ ହାଉସ୍ ସୂତ୍ରରୁ ଜଣାପଡ଼ିଛି ଯେ, ଏହି ବୈଠକର ମୁଖ୍ୟ ଏଜେଣ୍ଡା ପରମାଣୁ ଅସ୍ତ୍ରଶସ୍ତ୍ର ନିୟନ୍ତ୍ରଣ ଓ ହ୍ରାସ କରିବା ରହିବ। ଆମେରିକା ଓ ରୁଷ ମଧ୍ୟରେ ଥିବା ପୁରୁଣା ପରମାଣୁ ଚୁକ୍ତି ଗତ ଫେବୃଆରୀରେ ଶେଷ ହୋଇଥିବାବେଳେ, ଚୀନ୍ କ୍ରମାଗତ ଭାବେ ନିଜର ପରମାଣୁ ଭଣ୍ଡାର ବୃଦ୍ଧି କରୁଛି। ଏହି ପରିସ୍ଥିତିରେ ତିନି ଦେଶକୁ ନେଇ ଏକ ନୂତନ ପରମାଣୁ ନିୟନ୍ତ୍ରଣ ଚୁକ୍ତିର ବାଟ ଫିଟାଇବାକୁ ଟ୍ରମ୍ପ ପ୍ରୟାସ କରୁଛନ୍ତି। ଆମେରିକୀୟ ଅଧିକାରୀଙ୍କ ମତରେ, ଏହି ବୈଠକରୁ ତତକ୍ଷଣାତ୍ କୌଣସି ଚୁକ୍ତିନାମା ସ୍ୱାକ୍ଷର ହେବାର ସମ୍ଭାବନା ନଥିଲେ ମଧ୍ୟ ବିଶ୍ୱ ଶାନ୍ତି ଓ ଅସ୍ତ୍ର ନିୟନ୍ତ୍ରଣ ଦିଗରେ ଏହା ଏକ ଗୁରୁତ୍ୱପୂର୍ଣ୍ଣ ପଦକ୍ଷେପ ହେବ। ଏହାଛଡ଼ା ବୈଠକରେ ଇରାନ ପ୍ରସଙ୍ଗରେ ମଧ୍ୟ ବିଶେଷ ଆଲୋଚନା ହେବାର ସମ୍ଭାବନା ରହିଛି।
Comments are closed, but trackbacks and pingbacks are open.