ତ୍ରିପୁରା ପୌର ନିର୍ବାଚନ: ମତଦାନ ପୂର୍ବରୁ ବିଜେପିର ବାଜିମାତ୍, ୭୭ ପ୍ରାର୍ଥୀ ନିର୍ଦ୍ୱନ୍ଦ୍ୱରେ ବିଜୟୀ

ନୂଆଦିଲ୍ଲୀ: ତ୍ରିପୁରା ପୌର ନିର୍ବାଚନରେ ମତଦାନ ପୂର୍ବରୁ ହିଁ ରାଜ୍ୟର ଶାସକ ଭାରତୀୟ ଜନତା ପାର୍ଟି (ବିଜେପି) ଏକ ବିରାଟ ରାଜନୈତିକ ସଫଳତା ହାସଲ କରିଛି। ନଭେମ୍ବର ୨୭ ତାରିଖରେ ମତଦାନ ହେବାକୁ ଥିବା ବେଳେ ପ୍ରାର୍ଥିପତ୍ର ପ୍ରତ୍ୟାହାର ପ୍ରକ୍ରିୟା ସମ୍ପୂର୍ଣ୍ଣ ହେବା ପରେ ଦଳର ୭୭ ଜଣ ପ୍ରାର୍ଥୀ ନିର୍ଦ୍ୱନ୍ଦ୍ୱରେ ବିଜୟୀ ହୋଇଥିବା ନେଇ ରାଜ୍ୟ ନିର୍ବାଚନ ଆୟୋଗ ପକ୍ଷରୁ ଘୋଷଣା କରାଯାଇଛି। ସବିଶେଷ ତଥ୍ୟ ଅନୁଯାୟୀ, ରାଜ୍ୟର ୫ଟି ପୌରାଞ୍ଚଳର ମୋଟ ୬୫ଟି ଆସନରେ ବିଜେପି ବିରୁଦ୍ଧରେ ଅନ୍ୟ କୌଣସି ବିରୋଧୀ ଦଳ ପ୍ରାର୍ଥୀ ଦାଖଲ କରିପାରି ନଥିଲେ। ଏହି ଅଞ୍ଚଳଗୁଡ଼ିକ ମଧ୍ୟରେ ଦକ୍ଷିଣ ତ୍ରିପୁରାର ଶାନ୍ତିର ବଜାର, ପଶ୍ଚିମ ତ୍ରିପୁରାର ରାଣୀର ବଜାର ଏବଂ ଧଲାଇ ଜିଲ୍ଲାର କମଳପୁର, ଜିରାନିଆ ଓ ମୋହନପୁର ପୌରାଞ୍ଚଳ ଅନ୍ତର୍ଭୁକ୍ତ। ଏହା ବ୍ୟତୀତ ଧଲାଇ ଜିଲ୍ଲାର ଅମ୍ବାସା, ସିପାହିଜଲା ଜିଲ୍ଲାର ବିଶାଳଗଡ଼ ଏବଂ ଖୋୱାଇ ଜିଲ୍ଲାର ତେଲିଆମୁରା ପୌରାଞ୍ଚଳର ଆଉ ୧୨ଟି ଆସନରେ ମଧ୍ୟ ବିଜେପି ପ୍ରାର୍ଥୀମାନେ ବିନା ପ୍ରତିଦ୍ୱନ୍ଦ୍ୱିତାରେ ବିଜୟ ସୁନିଶ୍ଚିତ କରିଛନ୍ତି।ଅନ୍ୟପଟେ ଏହି ଏକପାଖିଆ ବିଜୟକୁ ନେଇ ରାଜ୍ୟ ରାଜନୀତି ସରଗରମ ହୋଇଉଠିଛି। ବିରୋଧୀ କଂଗ୍ରେସ ଏବଂ ସିପିଆଇ(ଏମ୍) କର୍ମୀମାନେ ଅଭିଯୋଗ କରିଛନ୍ତି ଯେ ଶାସକ ଦଳର ଭୟ ଓ ବଳ ପ୍ରୟୋଗ ଯୋଗୁଁ ସେମାନଙ୍କ ପ୍ରାର୍ଥୀମାନେ ନାମାଙ୍କନ ଦାଖଲ କରିବାରୁ ବଞ୍ଚିତ ହୋଇଛନ୍ତି।