IPL-2022-ଆଜିର ମ୍ୟାଚ – ମୁମ୍ବାଇ ଏବଂ କୋଲକାତା ମଧ୍ୟରେ ମୁକାବିଲା :

ଆଜି ଆଇପିଏଲ୍ ୨୦୨୨ ସଂସ୍କରଣର ୧୪ ତମ ମ୍ୟାଚ୍ ରେ ଫର୍ମ ରେ ଥିବା କୋଲକାତା ନାଇଟ୍ ରାଇଡର୍ସ ବିପକ୍ଷରେ ମୁମ୍ବାଇ ଇଣ୍ଡିଆନ୍ସ ଖେଳିବ | ପୁଣେର ମହାରାଷ୍ଟ୍ର କ୍ରିକେଟ୍ ଆସୋସିଏସନ୍ ଷ୍ଟାଡିୟମ୍ (MCA) ରେ ସନ୍ଧ୍ୟା ୭:୩୦ ରେ ମ୍ୟାଚ୍ ଆରମ୍ଭ ହେବ I ଏହି ମ୍ୟାଚରେ ସେମାନଙ୍କର ଆଇପିଏଲ୍ ଅଭିଯାନକୁ ଟ୍ରାକକୁ ଫେରାଇ ଆଣିବାକୁ ମୁମ୍ବାଇ ଦଳ ଚେଷ୍ଟା କରିବେ। ରୋହିତ ଶର୍ମାଙ୍କ ନେତୃତ୍ୱରେ ମୁମ୍ବାଇ ଇଣ୍ଡିଆନ୍ସ ଚଳିତ ସିଜନରେ ଏପର୍ଯ୍ୟନ୍ତ ଖେଳିଥିବା ଉଭୟ ମ୍ୟାଚ୍ ହାରିଛି।

ଅନ୍ୟପକ୍ଷରେ, ଶ୍ରେୟାସ ଆୟରଙ୍କ ନେତୃତ୍ୱରେ କୋଲକାତା ନାଇଟ୍ ରାଇଡର୍ସ ଏକ ସନ୍ତୁଳିତ ଦଳ ହୋଇ ଉଭା ହୋଇଛି । ନିଲାମ ସମୟରେ ଦଳର ଆବଶ୍ୟକତା ଅନୁଯାୟୀ ଖେଳାଳି ଯୋଡିବାର ପ୍ରଭାବ ପଡ଼ିଆରେ ସ୍ପଷ୍ଟ ଦେଖାଯାଏ | ପ୍ରଥମ ମ୍ୟାଚ୍‌ରେ ଚେନ୍ନାଇକୁ ୬ ୱିକେଟରେ ପରାସ୍ତ କରିବା ପରେ କୋଲକାତା ଦଳ ବାଙ୍ଗାଲୋରକୁ ୩ ୱିକେଟରେ ହରାଇଛି। ତା’ପରେ ପଞ୍ଜାବ କିଙ୍ଗସ ପରି ଏକ ଶକ୍ତିଶାଳୀ ଦଳ ବିରୁଦ୍ଧରେ ମାତ୍ର ୧୪.୩ ଓଭରରେ ୧୩୮ ର ଟାର୍ଗେଟକୁ ଗୋଡ଼ାଇ କେକେଆର ଅନ୍ୟ ସମସ୍ତ ଦଳକୁ ସେମାନଙ୍କର ଶକ୍ତିର ପରିଚୟ କରାଇଛି |

ବର୍ତ୍ତମାନ ପର୍ଯ୍ୟନ୍ତ ଉଭୟ ଦଳ ମଧ୍ୟରେ ୨୯ ଟି ମ୍ୟାଚ୍ ଖେଳାଯାଇଛି, ଯେଉଁଥିରେ ୨୨ ଥର ମୁମ୍ବାଇ ଜିତିଥିବା ବେଳେ ମାତ୍ର ୭ଟି ମ୍ୟାଚରେ କୋଲକାତା ଜିତିଛି । କୋଲକାତା ବିପକ୍ଷ ଇନିଂସରେ ମୁମ୍ବାଇ ସର୍ବାଧିକ ୨୧୦ ଏବଂ ସର୍ବନିମ୍ନ ୧୦୮ ରନ୍ କରିଛି। ଅନ୍ୟପକ୍ଷରେ କୋଲକାତା ମୁମ୍ବାଇ ବିପକ୍ଷରେ ସର୍ବାଧିକ ୨୩୨ ଏବଂ ଗୋଟିଏ ଇନିଂସରେ ସର୍ବନିମ୍ନ ୬୭ ରନ୍ ସଂଗ୍ରହ କରିଛି।

ମୁମ୍ବାଇ ଦଳ ସୂର୍ଯ୍ୟକୁମାର ଯାଦବଙ୍କ ଦଳକୁ ଫେରିବାର ଲାଭ ପାଇବ ବୋଲି ଆଶା କରାଯାଉଛି। ଗୁରୁତ୍ୱପୂର୍ଣ୍ଣ ପ୍ରଥମ ଡାଉନ୍ ସ୍ଥିତିରେ ଅନମୋଲପ୍ରୀତ ସିଂଙ୍କ ବିଫଳତା ମୁମ୍ବାଇର ଖରାପ ପ୍ରଦର୍ଶନ ପାଇଁ ଏକ ପ୍ରମୁଖ କାରଣ ହୋଇଛି | ମୁମ୍ବାଇ ପାଇଁ ଦ୍ୱିତୀୟ ସମସ୍ୟା ହେଉଛି ଏହାର ବିସ୍ଫୋରକ ବ୍ୟାଟ୍ସମ୍ୟାନ୍ କିରନ୍ ପୋଲାର୍ଡଙ୍କ ଖରାପ ଫର୍ମ | ରାଜସ୍ଥାନ ବିପକ୍ଷ ଇନିଂସର ଶେଷ ବଲରେ ଆଉଟ ହେବା ପୂର୍ବରୁ ସେ ୨୪ ବଲରେ କେବଳ୨୨ ରନ୍ କରି ପାରିଥିଲେ । ଏହାର ଫଳ ସ୍ୱରୂପ, ୧୯୪ ର ଟାର୍ଗେଟକୁ ଗୋଡ଼ାଇ ମୁମ୍ବାଇ ୨୦ ଓଭରର ଶେଷରେ ୮ ୱିକେଟ୍ ହରାଇବା ପରେ ମାତ୍ର ୧୭୦ ରନ୍ ସ୍କୋର କରି ପାରିଥିଲା I

ଚଳିତ ସିଜିନ୍ ରେ ହାର୍ଦିକ ପାଣ୍ଡ୍ୟା ଦଳରୁ ଯିବାପରେ ପୋଲାର୍ଡ ଅଧିକ ଦାୟିତ୍ୱ ଗ୍ରହଣ କରିବେ ବୋଲି ଆଶା କରାଯାଉଥିଲା କିନ୍ତୁ ସେ ବୋଲିଂ କିମ୍ବା ବ୍ୟାଟିଂ କେଉଁଥିରେ ମଧ୍ୟ ଆଶାନୁରୂପକ ପ୍ରଦର୍ଶନ କରିପାରୁ ନାହାନ୍ତି। ଏହା ବ୍ୟତୀତ ଜୋଫ୍ରା ଆର୍ଚରଙ୍କ ଆଗାମୀ ସିଜନରେ ଦଳରେ ଯୋଗଦେବା ମଧ୍ୟ ମୁମ୍ବାଇର ବୋଲିଂର ଧାରକୁ ଖଣ୍ଡିତ କରୁଛି। ଟ୍ରେଣ୍ଟ ବୋଲ୍ଟଙ୍କ ବିଦାୟ ପରେ ଡାନିଏଲ୍ ସାମସ୍ ସେହି ଖାଲିସ୍ଥାନକୁ କୌଣସି ପ୍ରକାରେ ପୂରଣ କରିପାରୁ ନାହାନ୍ତି I ଡାନିଏଲ୍ ସାମସ୍ ଙ୍କ ସ୍ଥାନରେ ଫାବିଆନ୍ ଆଲେନ୍ ଆଜିର ଖେଳାଳି ଏକାଦଶରେ ସାମିଲ ହୋଇ ପାରନ୍ତି |

ଅନ୍ୟ ପକ୍ଷରେ କୋଲକାତା ନାଇଟ୍ ରାଇଡର୍ସ ଏହି ସଂସ୍କରଣରେ ସବୁ କ୍ଷେତ୍ରରେ ଉନ୍ନତ ପ୍ରଦର୍ଶନ କରି ଚାଲିଛି | ଉମେଶ ଯାଦବଙ୍କ ଗତି ଏବଂ ସୁଇଙ୍ଗ ବ୍ୟାଟ୍ସମ୍ୟାନ୍ ମାନଙ୍କ ପାଇଁ ସମସ୍ୟା ସୃଷ୍ଟି କରୁଛି। ଗତ ବର୍ଷର କମଳା କ୍ୟାପ୍ ବିଜେତା ରୁତୁରାଜ ଗାଏକୱାଡଙ୍କୁ ସିଜିନର ଉଦଘାଟନୀ ମ୍ୟାଚରେ ଶୁନ୍ୟରେ ଆଉଟ କରିବା ପରେ ଉମେଶ ଆଉ ଅଟକି ନାହାଁନ୍ତି। ଉମେଶ ଏପର୍ଯ୍ୟନ୍ତ ଖେଳାଯାଇଥିବା ୩ଟି ମ୍ୟାଚରେ ୮ଟି ୱିକେଟ୍ ନେଇଛନ୍ତି। ଏଭଳି ପରିସ୍ଥିତିରେ ତାଙ୍କୁ ଏଡାଇବା ମୁମ୍ବାଇ ବ୍ୟାଟ୍ସମ୍ୟାନ୍ ମାନଙ୍କ ପାଇଁ ଏକ ବଡ଼ ଆହ୍ୱାନ ହେବ। ଉମେଶଙ୍କ ସାଥୀ ଭାବରେ ଟିମ୍ ସାଉଥୀଙ୍କ ଆଗମନ ହେବାଦ୍ୱାରା କୋଲକାତା ଉଭୟ ମୁଣ୍ଡରୁ ମାରାତ୍ମକ ବୋଲିଂ କରିବାରେ ସକ୍ଷମ ହୋଇ ପାରିଛି।

ବ୍ୟାଟ୍ସମ୍ୟାନ୍ ମାନେ ସୁନୀଲ ନାରାୟନ ଏବଂ ବରୁଣ ଚକ୍ରବର୍ତ୍ତୀଙ୍କ ସ୍ପିନ୍ ବୋଲିଂ ଆଗରେ ହାତ ଖୋଲି ଖେଳିବାକୁ ଡରୁଛନ୍ତି । ପଞ୍ଜାବ ବିପକ୍ଷ ଶେଷ ମ୍ୟାଚରେ ବରୁଣ ଚକ୍ରବର୍ତ୍ତୀ ୪ ଓଭରରେ ମାତ୍ର ୧୪ ରନ୍ ବ୍ୟୟ କରିଥିବାବେଳେ ସୁନୀଲ ନାରାୟଣ ତାଙ୍କ କୋଟାରୁ ମାତ୍ର ୨୩ ରନ୍ ବ୍ୟୟ କରିଛନ୍ତି। ଶିବମ ମାଭି ଏବଂ ଆଣ୍ଡ୍ରେ ରସେଲଙ୍କ ସହିତ ଏହି ବୋଲିଂ ୟୁନିଟ୍ ଏକ ସମ୍ପୂର୍ଣ୍ଣ ପ୍ୟାକେଜ୍ ପରି ଦେଖାଯାଉଛି | ବ୍ୟାଟିଂ ସମୟରେ କେତେକ ସମସ୍ୟା ନିଶ୍ଚିତ ଭାବରେ ଶୀର୍ଷ କ୍ରମରେ ଉଭା ହୋଇଛି | ପ୍ରଥମ ମ୍ୟାଚ୍ ପରଠାରୁ ଅଜିଙ୍କ୍ୟ ରାହାନେ ଙ୍କ ବ୍ୟାଟ୍ ଚୁପ୍ ରହିଛି। ଭେଙ୍କଟେଶ ଆୟରଙ୍କ ଖରାପ ଫର୍ମ ମଧ୍ୟ ଅବ୍ୟାହତ ରହିଛି | ଏପରି ପରିସ୍ଥିତିରେ, କେକେଆର୍ ଦଳ ଆୟର ଙ୍କୁ ମଧ୍ୟକ୍ରମରେ ପଠାଇବାକୁ ମଧ୍ୟ ବିଚାର କରିପାରନ୍ତି | ଆଣ୍ଡ୍ରେ ରସେଲ ନିଶ୍ଚିତ ଭାବରେ ପଞ୍ଜାବ କିଙ୍ଗ୍ସ ବିପକ୍ଷରେ ଫର୍ମରେ ପ୍ରତ୍ୟାବର୍ତ୍ତନ କରିଛନ୍ତି, ଉକ୍ତ ମ୍ୟାଚରେ ସେ ୮ ଟି ଛକା ଏବଂ ୨ଟି ଚୌକାସହାୟତାରେ ୩୧ ଟି ବଲରୁ ଅପରାଜିତ ୭୦ ରନ୍ କରିଛନ୍ତି।

ଆଜିର ମ୍ୟାଚରେ କେଉଁଦଳ ଶ୍ରେଷ୍ଠ ପ୍ରଦର୍ଶନ କରିବେ ତାହା ଦେଖିବା ପାଇଁ ଦର୍ଶକମାନେ ଉତ୍ସାହର ସହିତ ଅପେକ୍ଷା କରିଛନ୍ତି I

                                                                                    (ସୌଜନ୍ୟ : ଏସ.ଏନ.ଡ଼ି.ସି.ଆର.ଏ.)