ଭୁବନେଶ୍ୱର: ରାଜ୍ୟରେ ଆଉ ଜଣେ କୋଭିଡ୍-୧୯ ପଜିଟିଭ୍ ଚିହ୍ନଟ ହେବା ପରେ ସକ୍ରିୟ ରୋଗୀଙ୍କ ସଂଖ୍ୟା ୩କୁ ବୃଦ୍ଧି ପାଇଛି। ସୂଚନାଯୋଗ୍ୟ, ଗତ ୭ ଦିନ ମଧ୍ୟରେ ୩ ଜଣ ପଜିଟିଭ୍ ଚିହ୍ନଟ ହୋଇଛନ୍ତି।
ଅନ୍ୟପକ୍ଷରେ ଗତ ୨୪ ଘଣ୍ଟା ମଧ୍ୟରେ ଭାରତରେ ୬୨୮ ନୂଆ କୋଭିଡ୍-୧୯ ସଂକ୍ରମଣ ରେକର୍ଡ କରାଯାଇଛି। ଯାହା ଫଳରେ ଦେଶବ୍ୟାପୀ ସକ୍ରିୟ ଆକ୍ରାନ୍ତଙ୍କ ସଂଖ୍ୟା ୪୦୦୦ ଟପିଛି। ଦୁଃଖର କଥା ହେଉଛି, ଗତକାଲି କେରଳରେ ଜଣେ ବ୍ୟକ୍ତି ଏହି ମାରାତ୍ମକ ଭୂତାଣୁରେ ପ୍ରାଣ ହରାଇଛନ୍ତି।
କୋଭିଡ୍-୧୯ର ସବ୍ ଭାରିଆଣ୍ଟ ଜେଏନ୍.୧କୁ ଦୃଷ୍ଟିରେ ରଖି ଓଡ଼ିଶା ସରକାର ଏକ ଆଡଭାଇଜରି ଜାରି କରି ବାହାରକୁ ବାହାରିବା ସମୟରେ କେତେକ ବର୍ଗର ଲୋକଙ୍କୁ ମୁହଁରେ ମାସ୍କ ପିନ୍ଧିବାକୁ ଅନୁରୋଧ କରିଛନ୍ତି। ବିଶେଷ କରି ବୟସ୍କ ବ୍ୟକ୍ତି ଓ ଅନ୍ୟ ରୋଗରେ ପୀଡ଼ିତ ବ୍ୟକ୍ତିମାନେ ବାହାରକୁ ଯିବା ସମୟରେ ମୁହଁରେ ମାସ୍କ ପିନ୍ଧିବା ସହ ଜନଗହଳିପୂର୍ଣ୍ଣ ସ୍ଥାନରୁ ଦୂରେଇ ରହିବାକୁ ସ୍ବାସ୍ଥ୍ୟ ଓ ପରିବାର କଲ୍ୟାଣ ବିଭାଗ ପକ୍ଷରୁ ପରାମର୍ଶ ଦିଆଯାଇଛି।
ସ୍ୱାସ୍ଥ୍ୟ ବିଭାଗ ଏହାର ଅଫିସିଆଲ ଟ୍ୱିଟର ହ୍ୟାଣ୍ଡେଲ ଜରିଆରେ ଏହି ସୂଚନା ଦେଇ ସତର୍କ କରାଇଦେଇଛି ଯେ ଯଦିଓ ଜେଏନ.୧ ଭାରିଏଣ୍ଟ ମାମଲା ସାମାନ୍ୟ ରହିଛି। ତଥାପି ସତର୍କ ରହିବା ଜରୁରୀ । ଦେଶର ଅନ୍ୟ ରାଜ୍ୟରେ ମଧ୍ୟ ନୂଆ ଜେଏନ୍.୧ ଭାରିଏଣ୍ଟର ମାମଲା ସାମ୍ନାକୁ ଆସୁଥିବା ବେଳେ କୋଭିଡ୍ ମାମଲା ବୃଦ୍ଧି ନେଇ ଚିନ୍ତା ବଢ଼ିବାରେ ଲାଗିଛି। ତଥାପି ସଚେତନ ରହିବା ଏବଂ ଆବଶ୍ୟକ ସତର୍କତା ଅବଲମ୍ବନ କରିବା ଉପରେ ବିଶେଷଜ୍ଞମାନେ ଗୁରୁତ୍ୱାରୋପ କରିଛନ୍ତି।
Comments are closed, but trackbacks and pingbacks are open.