ନୂଆଦିଲ୍ଲୀ: ଦିନକୁ ଦିନ ବଢ଼ି ଚାଲିଥିବା ମହଙ୍ଗା ମାଡ଼ର ପ୍ରଭାବ ଏବେ ସାଧାରଣ ଜନତାଙ୍କ ଦୈନନ୍ଦିନ ଜୀବନ ଉପରେ ସିଧାସଳଖ ପଡ଼ିଛି। ଘରର ରୋଷେଇ ଘରୁ ଆରମ୍ଭ କରି ବାହାରେ ହୋଟେଲ ଓ ରେଷ୍ଟୁରାଣ୍ଟର ଡାଇନିଂ ଟେବୁଲ୍ ପର୍ଯ୍ୟନ୍ତ ସବୁକିଛି ଏବେ ଚଡ଼ାମୂଲ୍ୟ ହୋଇଯାଇଛି। ଯଦି ଆପଣ ପ୍ରତିଦିନ ବାହାରେ ସାଙ୍ଗସାଥୀଙ୍କ ସହ କଫି ପିଇବାକୁ କାଫେ ଯାଉଛନ୍ତି କିମ୍ବା ରେଷ୍ଟୁରାଣ୍ଟରେ ଜଳିଖିଆ, ଦୋସା, ଇଡଲି ଓ ଅନ୍ୟାନ୍ୟ ସୁଆଦିଆ ଖାଦ୍ୟ ଖାଇବାକୁ ପସନ୍ଦ କରୁଛନ୍ତି, ତେବେ ଆପଣଙ୍କୁ ଏଣିକି ଅଧିକ ଅର୍ଥ ଗଣିବାକୁ ପଡ଼ିବ। ଖାଦ୍ୟ ପ୍ରସ୍ତୁତିରେ ବ୍ୟବହୃତ ମୁଖ୍ୟ ସାମଗ୍ରୀ ଯଥା କ୍ଷୀର, ଘିଅ, ବଟର, ବିଭିନ୍ନ ପ୍ରକାରର ପନିପରିବା, ଚାଉଳ ଏବଂ ଡାଲି ସହିତ ରୋଷେଇ ଗ୍ୟାସ୍, ବିଦ୍ୟୁତ୍, ଇନ୍ଧନ ଓ କର୍ମଚାରୀଙ୍କ ବେତନ ଖର୍ଚ୍ଚ କ୍ରମାଗତ ଭାବେ ବଢ଼ିବାରେ ଲାଗିଛି। ଏହି ସମସ୍ତ ଅତିରିକ୍ତ ଖର୍ଚ୍ଚ ବୃଦ୍ଧି ପାଇବା ଯୋଗୁଁ ଦେଶର ଅଧିକାଂଶ ରେଷ୍ଟୁରାଣ୍ଟ ଓ ହୋଟେଲଗୁଡ଼ିକ ସେମାନଙ୍କର ମେନୁ ଦରରେ ୫ରୁ ୧୦ ପ୍ରତିଶତ ପର୍ଯ୍ୟନ୍ତ ବୃଦ୍ଧି କରିବାକୁ ବାଧ୍ୟ ହୋଇଛନ୍ତି। ପୂର୍ବପରି ପୁରୁଣା ଦରରେ ଖାଦ୍ୟ ବିକ୍ରି କରିବା କର୍ତ୍ତୃପକ୍ଷଙ୍କ ପାଇଁ କଷ୍ଟକର ହୋଇପଡ଼ିଥିବାରୁ ଏଭଳି ପଦକ୍ଷେପ ନିଆଯାଇଛି। ବିଶେଷ କରି ଦକ୍ଷିଣ ଭାରତୀୟ ପାରମ୍ପରିକ ଖାଦ୍ୟ, ଗରମାଗରମ କଫି, ଦୁଗ୍ଧଜାତ ପାନୀୟ ଏବଂ ବିଭିନ୍ନ ପ୍ରକାରର ମିଲ୍ ଉପରେ ଏହି ଦରବୃଦ୍ଧିର ସ୍ପଷ୍ଟ ପ୍ରଭାବ ଦେଖିବାକୁ ମିଳୁଛି। ବାହାରେ ଖାଇବା ଅଭ୍ୟାସ ଏବଂ ସାଧାରଣ ଲୋକଙ୍କ ବଜେଟ୍ ଉପରେ ଏହା ଏକ ବଡ଼ ଆର୍ଥିକ ବୋଝ ହୋଇ୍ ଠିଆ ହୋଇଛି।
Comments are closed, but trackbacks and pingbacks are open.