ଶେଷ ହେଲା ରେଡ; ଜଣାନ୍ତୁ ଜବତ ହେଲା କେତେ ଧନ?

ବଲାଙ୍ଗୀର: କଂଗ୍ରେସ ରାଜ୍ୟସଭା ସାଂସଦ ଧୀରଜ ପ୍ରସାଦ ସାହୁ ଓ ତାଙ୍କ ପରିବାର ନିକଟରୁ ୩୫୩.୫ କୋଟି ଟଙ୍କା ଜବତ କରିଛି ଆୟକର ବିଭାଗ। ୫୦ ବ୍ୟାଙ୍କ ଅଧିକାରୀ ଏବଂ ୪୦ ନୋଟ୍ ଗଣତି ମେସିନ୍ ଦ୍ୱାରା ପାଞ୍ଚ ଦିନ ଧରି କରାଯାଇଥିବା ଏହି ଅଭୂତପୂର୍ବ କାରବାର ଭାରତର କୌଣସି ଅନୁସନ୍ଧାନକାରୀ ସଂସ୍ଥା ଦ୍ୱାରା ଜବତ ହୋଇଥିବା ସବୁଠାରୁ ବଡ଼ ଟଙ୍କାକୁ ଚିହ୍ନଟ କରିଛି।

ଝାଡଖଣ୍ଡ ଓ ଓଡିଶାରେ ହୋଇଥିବା ଏହି ଚଢାଉରେ ଓଡିଶାର ଏକ ଡିଷ୍ଟିଲରୀ ବୌଦ୍ଧ ଡିଷ୍ଟିଲରୀ ପ୍ରାଇଭେଟ ଲିମିଟେଡ ସମେତ ସାହୁ ପରିବାର ସହ ଜଡିତ ସମ୍ପତ୍ତିରେ ଆୟକର ଟିମ୍ ରେଡ୍ କରିଥିଲା। ବଲାଙ୍ଗୀର ଜିଲ୍ଲାରେ ସର୍ବାଧିକ ୩୦୫ କୋଟି, ସମ୍ବଲପୁରରେ ୩୭.୫ କୋଟି ଓ ଟିଟିଲାଗଡ଼ରେ ୧୧ କୋଟି ଟଙ୍କା ଜବତ ହୋଇଛି।

ଜବତ ଟଙ୍କାକୁ ବଲାଙ୍ଗୀର ଷ୍ଟେଟ ବ୍ୟାଙ୍କ ମୁଖ୍ୟ ଶାଖାରେ ଜମା କରିବା ପାଇଁ ଆୟକର ବିଭାଗ ପକ୍ଷରୁ ଏବେ ପ୍ରକ୍ରିୟା ଜାରି ରହିଛି। ଏସବିଆଇର ଆଞ୍ଚଳିକ ପରିଚାଳକ ଭଗତ ବେହେରା ଏହି ପ୍ରକ୍ରିୟା ସମୟରେ ସାଧାରଣ ଲୋକଙ୍କ ପାଇଁ ବ୍ୟାଙ୍କ କାର୍ଯ୍ୟକ୍ଷମ ରହିବ ବୋଲି ସୂଚନା ଦେଇଛନ୍ତି।

ଆଜି ସୁଦ୍ଧା ଜବତ ନଗଦ ଟଙ୍କା ଥିବା ୧୭୬ଟି ବସ୍ତା ମଧ୍ୟରୁ ୧୪୦ଟି ବସ୍ତାକୁ ଗଣତି କରାୟାଇଥିବା ବେଳେ ବାକି ୩୬ଟି ବସ୍ତାକୁ ପ୍ରକ୍ରିୟାକରଣ ପାଇଁ ଧାର୍ଯ୍ୟ କରାଯାଇଛି। ଆମେ ୧୭୬ ବସ୍ତା ପାଇଥିଲୁ ଓ ସେଥିରୁ ୧୪୦ ବସ୍ତା ଗଣତି ହୋଇସାରିଛି, ବାକି ବସ୍ତା ଆଜି ଗଣତି ହେବ। ୩ଟି ବ୍ୟାଙ୍କର ଅଧିକାରୀ ଗଣତି ପ୍ରକ୍ରିୟାରେ ସାମିଲ ଅଛନ୍ତି, ଏବଂ ଆମର ୫୦ ଜଣ ଅଧିକାରୀ ଏଥିରେ ସାମିଲ ଅଛନ୍ତି। ପ୍ରାୟ ୪୦ (ନୋଟ୍ ଗଣତି) ମେସିନ ଏଠାରେ ଅଣାଯାଇଥିଲା, ୨୫ ଟି ବ୍ୟବହାର ହେଉଛି ଏବଂ ୧୫ ଟି ବ୍ୟାକଅପ୍ ଭାବରେ ରଖାୟାଇଛି ବୋଲି ବ୍ୟାଙ୍କ ଅଧିକାରୀ କହିଛନ୍ତି।

ଧୀରଜ ସାହୁଙ୍କ ପରିବାର ସହ ସମ୍ପୃକ୍ତ ଥିବା ବଳଦେବ ସାହୁ ଇନଫ୍ରା ପ୍ରାଇଭେଟ୍ ଲିମିଟେଡ୍ ନାମକ ଏକ କମ୍ପାନି ଉପରେ ଗତକାଲି ଆୟକର ବିଭାଗ ତଦନ୍ତକୁ ବ୍ୟାପକ କରିଛି। ବିପୁଳ ପରିମାଣର ନଗଦ ଟଙ୍କା ଦେଶୀ ମଦ ବିକ୍ରିରୁ ମିଳିଥିବା ଆୟକୁ ଦର୍ଶାଉଛି ବୋଲି କର୍ତ୍ତୃପକ୍ଷ ସନ୍ଦେହ କରୁଛନ୍ତି।