ସିଦ୍ଧୁଙ୍କ ହତ୍ୟା ପରେ ବଢ଼ିଲା ଗାୟକ ମିକା ସିଂ ଙ୍କ ସୁରକ୍ଷା

ବଲିଉଡ ସିଙ୍ଗର ମିକା ସିଂ ଙ୍କ ସୁରକ୍ଷା ବଢ଼ିଲା Iପଞ୍ଜାବ ର ପ୍ରସିଦ୍ଧ ଗାୟକ ତଥା କଂଗ୍ରେସ ନେତା ସିଦ୍ଧୁ ମୁସେୱାଲାଙ୍କ ହତ୍ୟା ପରେ ବଲିଉଡ ର ପଞ୍ଜାବୀ ଗାୟକ ମିକା ସିଂ ଙ୍କ ସୁରକ୍ଷା ବ୍ୟବସ୍ଥାକୁ ବଢ଼ାଇ ଦିଆଯାଇଛି I ଲୋରେନ୍ସ ବିଷ୍ଣୋଇ ଗ୍ୟାଙ୍ଗ ତରଫରୁ ମିକାଙ୍କ ଜୀବନ ପ୍ରତି ବିପଦ ଆଶଙ୍କା ରହିଛି । ତେଣୁ ତାଙ୍କର ସୁରକ୍ଷା ବ୍ୟବସ୍ଥାକୁ କଡାକଡି କରାଯାଇଛି । ଗତ ୧୫ ଦିନ ହେବ ମିକା ସିଂ ଯୋଧପୁରରେ ଏକ ରିଆଲିଟି ସୋ’ସ୍ଵୟମ୍ବର ମିଆ ଦି ଭାଟି’ରର ସୁଟିଂରେ ବ୍ୟସ୍ତ ଅଛନ୍ତି । ସୁରକ୍ଷାକୁ ଦୃଷ୍ଟିରେ ରଖି ଯୋଧପୁରରେ ମିକା ରହୁଥିବା ହୋଟେଲରେ ସଶସ୍ତ୍ର ପୋଲିସକୁ ମୁତୟନ କରାଯାଇଛି । ମିକାଙ୍କ ସୁରକ୍ଷା ସୁନିଶ୍ଚିତ କରିବାକୁ ହୋଟେଲ ଚାରିପଟେ ପଇଁତରା ମାରୁଛନ୍ତି ସଶସ୍ତ୍ର ପୋଲିସ ବାହିନୀ । ଆଉ ଆକାଶରେ ଉଡୁଛି ଡ୍ରୋନ କ୍ୟାମେରା । ହୋଟେଲକୁ ଯିବା ଆସିବା କରୁଥିବା ପ୍ରତି ଲୋକଙ୍କ ଉପରେ ରଖୁଛି ନଜର । ସେମାନଙ୍କୁ ନିକିନିଖି ଯାଞ୍ଚ କରାଯିବା ପରେ ହୋଟେଲକୁ ଛଡାଯାଉଛି ।