ଡାଏରୀ ଖୋଲିବ ଗୁମର :ଶର୍ମିଷ୍ଠା ଓ ଝୁନାଙ୍କୁ ପୁଣି ୩ ଦିନିଆ ରିମାଣ୍ଡରେ ନେଲା କ୍ରାଇମବ୍ରାଞ୍ଚ

ଡାଏରୀ ଖୋଲିବ ଗୁମର I ବହୁ ଚର୍ଚ୍ଚିତ କ୍ୟାମେରାମ୍ୟାନ୍ ମାନସ ସ୍ୱାଇଁ ହତ୍ୟା ମାମଲାରେ ମୁଖ୍ୟ ଷଡ଼ଯନ୍ତ୍ର କାରୀ ଶର୍ମିଷ୍ଠା ରାଉତ ରହୁଥିବା ଫ୍ଲାଟ ରୁ ଜବତ ହୋଇଛି ଅନ୍ୟତମ ଅଭିଯୁକ୍ତ ନିରଞ୍ଜନ ସେଠୀର ଡାଏରୀ I ଡାଏରୀ ସମ୍ପର୍କରେ ଅଧିକ ରୁ ଅଧିକ ତଥ୍ୟ ହାସଲ କରିବା ପାଇଁ ଶର୍ମିଷ୍ଠା ଓ ତାର ମୁଖ୍ୟ ସହଯୋଗୀ ଝୁନା ଭୋଇଙ୍କୁ ତିନି ଦିନିଆ ରିମାଣ୍ଡରେ ନେଇଛି କ୍ରାଇମବ୍ରାଞ୍ଚ । ଆଜିଠୁ ପୁଣି ଏମାନଙ୍କୁ ପଚରାଉଚରା କରିବ କ୍ରାଇମବ୍ରାଞ୍ଚ । ଫୋକସରେ ରହିବ ନିରଞ୍ଜନଙ୍କ ଡାଏରୀ । ନିରଞ୍ଜନଙ୍କ ଡାଏରୀରୁ ମିଳିଥିବା ତଥ୍ୟକୁ ନେଇ ଜେରା କରିବ କ୍ରାଇମବ୍ରାଞ୍ଚ । ଏହା ସହ ସଂପୂର୍ଣ୍ଣ ୱେବ ଚ୍ୟାନେଲ ଅଫିସ୍ କମ୍ପ୍ୟୁଟରରୁ ମିଳିଥିବା ତଥ୍ୟକୁ ନେଇ ମଧ୍ୟ କ୍ରାଇମବ୍ରାଞ୍ଚ ଖୋଳତାଡ କରିବ । ତେବେ ନିରଞ୍ଜନ ସେଠୀର ଡାଏରୀ କିପରି ଶର୍ମିଷ୍ଠା ଅଫିସ କୁ ଆସିଲା ଏ ବିଷୟରେ ନିରଞ୍ଜନ କିଛି ଜଣେ ନାହିଁ ବୋଲି ନିଜ ସଫେଇରେ କହିଛି I ତେବେ ଏହି ଡାଏରିରେ ଶର୍ମିଷ୍ଠା ପାଇଁ ନିରଞ୍ଜନ ପ୍ରେମ କବିତା ଲେଖିଥିବା କ୍ରାଇମବ୍ରାଞ୍ଚ ଦେଖିବାକୁ ପାଇଛି ।ଅନ୍ୟପଟେ ମିଳିଥିବା ଡାଏରୀରେ ଅନେକ ବଡ଼ ମୁଣ୍ଡି ଙ୍କ ର ନାଁ ଉଲ୍ଲେଖ ଥିବା କଥା ଜଣା ପଡିଛି I ଏ ସବୁ ଦିଗରେ ଖୋଳତାଡ଼ କରି ତଥ୍ୟ ହାସଲ କରିବ କ୍ରାଇମବ୍ରାଞ୍ଚ I
ସେହିପରି ଦ୍ବିତୀୟ ପର୍ଯ୍ୟାୟ ରିମାଣ୍ଡରେ ଆଣିବା ପରେ କ୍ରାଇମବ୍ରାଞ୍ଚ କେଉଁଦିଗ ପ୍ରତି ଗୁରୁତ୍ବ ଦେବ, ତାହାକୁ ନେଇ ଆଲୋଚନା ଆରମ୍ଭ ହୋଇଛି । ଶୁଣିବାକୁ ମିଳୁଛି ଯେ ‘ମେରୋରି କାର୍ଡ’ ଉପରେ କ୍ରାଇମବ୍ରାଞ୍ଚର ତଦନ୍ତକାରୀ ଦଳ ଅଧିକ ଗୁରୁତ୍ବ ଦେବେ । ଯେଉଁ ଅଶ୍ଳୀଳ ଭିଡିଓ ଥିବା ‘ମେମୋରି କାର୍ଡ’ ପାଇଁ ମାନସଙ୍କୁ ପିଟି ପିଟି ହତ୍ୟା କରାଯାଇଥିଲା, ତାହା ବର୍ତ୍ତମାନ ସୁଦ୍ଧା ଶର୍ମିଷ୍ଠା ନିକଟରେ ନଥିବା ସେ ବୟାନ ଦେଇସାରିଛି । ଯେଉଁଥିପାଇଁ କୋର୍ଟରେ ହତ୍ୟାକାଣ୍ଡର କାରଣ ଉପସ୍ଥାପନ କରିବାକୁ କ୍ରାଇମବ୍ରାଞ୍ଚ ପାଇଁ ସମସ୍ୟା ହୋଇପାରେ ।
ତେବେ ଶର୍ମିଷ୍ଠା ଷ୍ଟୁଡିଓରେ କଣ୍ଠଶିଳ୍ପୀଙ୍କୁ ଡାକି ଗୀତ ବି ରେକର୍ଡ କରୁଥିବା ଫଟୋ ଏବେ ଭାଇରାଲ୍ ହୋଇଛି । ଏହି ଗୀତ ରେକର୍ଡ ସମୟରେ ମାନସ ଏହାର ମ୍ୟୁଜିକ ଭିଡିଓ ପ୍ରସ୍ତୁତ କରୁଥିଲେ । ଅନେକ ଯୁବତୀ ଏହି କାରବାରରେ ବି ନିୟୋଜିତ ହୋଇଥିବା କୁହାଯାଉଛି ।