ବେଜିଂ: ପହଲଗାମ୍ ଆତଙ୍କବାଦୀ ଆକ୍ରମଣ ପରେ, ଭାରତ ସିନ୍ଧୁ ଚୁକ୍ତିନାମାକୁ ସ୍ଥଗିତ ରଖି ପାକିସ୍ତାନକୁ ଯାଉଥିବା ପାଣି ବନ୍ଦ କରିବା ବିଷୟରେ କଥା ହୋଇଛି। ପାଣି ବନ୍ଦ କଲେ ପାକିସ୍ତାନ ଭାରତକୁ ଯୁଦ୍ଧ ଧମକ ଦେଇଛି। ଏହି ଉତ୍ତେଜନା ମଧ୍ୟରେ, ଚୀନ୍ ଷଡ଼ଯନ୍ତ୍ର ରଚି ଚୁପଚାପ୍ ଭାରତକୁ ଆସୁଥିବା ସତଲେଜ୍ ନଦୀର ପାଣିକୁ ଅବରୋଧ କରୁଛି। ରିପୋର୍ଟ ଅନୁଯାୟୀ, ଭୂସ୍ଥାନିକ ଗବେଷକ ଏବଂ ପୂର୍ବତନ ନାସା ଷ୍ଟେସନ ମ୍ୟାନେଜର ଡକ୍ଟର ୱାଇ ନିତ୍ୟାନନ୍ଦ ସତଲେଜ୍ ଜଳ ପ୍ରବାହର ସାଟେଲାଇଟ୍ ତଥ୍ୟ ଉପରେ ଗବେଷଣା କରିଛନ୍ତି। ତଥ୍ୟ ଦର୍ଶାଉଛି ଯେ, ଭାରତରେ ସତଲେଜନ ନଦୀର ଜଳସ୍ତରରେ ଏକ ବିରାଟ ହ୍ରାସ ଘଟିଛି। ତିବ୍ଦତରୁ ନଦୀ ଭାରତୀୟ ଅଞ୍ଚଳରେ ପ୍ରବେଶ କରିବା ପୂର୍ବରୁ ଜଳ ପ୍ରବାହରେ ଏହି ହ୍ରାସ ଘଟୁଛି। ଗତ ପାଞ୍ଚ ବର୍ଷ ମଧ୍ୟରେ ସତଲେଜ୍ ନଦୀରୁ ଭାରତକୁ ଆସୁଥିବା ପାଣିର ପରିମାଣ ୭୫ ପ୍ରତିଶତରୁ ଅଧିକ ହ୍ରାସ ପାଇଛି। ସତଲେଜ୍ ଦେଇ ଭାରତକୁ ପ୍ରବାହିତ ଜଳର ପରିମାଣ ୮,୦୦୦ ଗିଗାଲିଟରରୁ ୨,୦୦୦ ଗିଗାଲିଟରକୁ ହ୍ରାସ ପାଇଛି। ତଥ୍ୟ ବାଣ୍ଟିବା ସମୟରେ ସେ ପ୍ରଶ୍ନ ଉଠାଇଛନ୍ତି ଯେ, ଭାରତକୁ ଆସୁଥିବା ପାଣିକୁ ଚୀନ୍ ନିୟନ୍ତ୍ରଣ କରୁଛି କି? ସତଲେଜ୍ ଦେଇ ଭାରତକୁ ଆସୁଥିବା ପାଣିରେ ଏହି ବିଶାଳ ହ୍ରାସର ଦୁଇଟି ଗୁରୁତ୍ୱପୂର୍ଣ୍ଣ କାରଣ ହୋଇପାରେ। ପ୍ରଥମତଃ, ଚୀନ୍ ଜଳ ପ୍ରବାହକୁ ପରିବର୍ତ୍ତନ କରିଛି ଏବଂ ଦ୍ୱିତୀୟତଃ, ପ୍ରାକୃତିକ କାରଣରୁ ଜଳର ଏହି ଅଭାବ ଦେଖାଦେଇଛି। ଦ୍ୱିତୀୟ କାରଣଟି କମ୍ ସମ୍ଭାବନା ଅଛି କାରଣ ଜଳବାୟୁ ତଥ୍ୟ ଦର୍ଶାଉଛି ଯେ, ହିମାଳୟ ଦ୍ରୁତ ଗତିରେ ତରଳିଯାଉଛି। ଏପରି ପରିସ୍ଥିତିରେ, ନଦୀର ପ୍ରବାହ ହ୍ରାସ ପାଇବା ପରିବର୍ତ୍ତେ ବୃଦ୍ଧି ପାଇବା ଉଚିତ୍।
Comments are closed, but trackbacks and pingbacks are open.