କେନ୍ଦ୍ର ପର୍ଯ୍ୟଟନ ମନ୍ତ୍ରାଳୟ ପକ୍ଷରୁ ସାମୂହିକ ଭାବେ ପ୍ରଚାରପ୍ରସାର କରାଯାଉଥିବା ‘ଭାରତର ସପ୍ତ ମୁକ୍ତି କ୍ଷେତ୍ର’ରେ ମହାପ୍ରଭୁ ଶ୍ରୀଜଗନ୍ନାଥଙ୍କ ଧାମ ଶ୍ରୀକ୍ଷେତ୍ର ପୁରୀ ସ୍ଥାନିତ ହୋଇଛି। ଏଥିସହ ଅଯୋଧ୍ୟା, ମଥୁରା, ମାୟା (ହରିଦ୍ବାର), କାଶୀ(ବାରଣାସୀ), କାଞ୍ଚି ଅବନ୍ତିକା (ଉଜ୍ଜୈନ) ଓ ଦ୍ବାରାବତୀ (ଦ୍ବାରକା, ଗୁଜରାଟ) ଏହି ସପ୍ତ ମୁକ୍ତି କ୍ଷେତ୍ରରେ ରହିଛି।
କେନ୍ଦ୍ର ମନ୍ତ୍ରାଳୟ ପକ୍ଷରୁ ଦେଶର ବିଭିନ୍ନ ପର୍ଯ୍ୟଟନ ସ୍ଥାନ, ତୀର୍ଥସ୍ଥଳ ଓ ଉତ୍ପାଦଗୁଡ଼ିକୁ ନେଇ ଛାପା, ବୈଦ୍ୟୁତିକ ଓ ଡିଜିଟାଲ୍ ଗଣମାଧ୍ୟମ ମାଧ୍ୟମରେ ପ୍ରଚାରପ୍ରସାର ଅଭିଯାନ ଚାଲିଛି। ଏଥିସହ ମନ୍ତ୍ରାଳୟର ଅଫିସିଆଲ୍ ୱେବସାଇଟ୍ ସହ ସୋସିଆଲ୍ ମିଡିଆ ହାଣ୍ଡେଲ୍ ମଧ୍ୟମରେ ବି ଏହାର ପ୍ରଚାର କରାଯାଇଥାଏ।
ବିଭିନ୍ନ ରାଜ୍ୟ ତଥା କେନ୍ଦ୍ରଶାସିତ ଅଞ୍ଚଳ ଦ୍ବାରା ଚିହ୍ନିତ ତୀର୍ଥ ସ୍ଥାନ ଓ ଐତିହ୍ୟ ସ୍ଥଳଗୁଡ଼ିକର ସାମଗ୍ରିକ ବିକାଶ ନିମନ୍ତେ ‘ତୀର୍ଥଯାତ୍ରା କାର୍ଯ୍ୟକଳ୍ପ ଓ ଆଧ୍ୟାତ୍ମିକ, ଐତିହ୍ୟ ବିକାଶ ରାଷ୍ଟ୍ରୀୟ ଅଭିଯାନ(ପ୍ରସାଦ)’ ଅଧୀନରେ କେନ୍ଦ୍ର ସଂସ୍କୃତି ମନ୍ତ୍ରାଳୟ ପକ୍ଷରୁ ଆର୍ଥିକ ସହାୟତା ମଧ୍ୟ ଯୋଗାଇ ଦିଆଯାଉଛି। କେନ୍ଦ୍ର ସଂସ୍କୃତି ଓ ପର୍ଯ୍ୟଟନ ମନ୍ତ୍ରୀ ଜି କିଷନ ରେଡ୍ଡି ରାଜ୍ୟସଭାରେ ଏହି ଉତ୍ତର ରଖିଥିଲେ। ସେ ଆହୁରି କହିଥିଲେ, ଦେଶର ପର୍ଯ୍ୟଟନ ଭିତ୍ତିଭୂମି ବିକାଶ ପାଇଁ ‘ସ୍ବଦେଶ ଦର୍ଶନ’ ଯୋଜନାରେ ମଧ୍ୟ ଆର୍ଥିକ ସହାୟତା ପ୍ରଦାନ କରାଯାଉଛି। ପର୍ଯ୍ୟଟନ ଭିତ୍ତିଭୂମି ବିକାଶ ନିମନ୍ତେ ଯୋଜନାଗୁଡ଼ିକୁ ଅର୍ଥର ଉପଲବ୍ଧତା, ଉପଯୁକ୍ତ ତଥା ବିସ୍ତୃତ ଯୋଜନା ରିପୋର୍ଟ ପ୍ରସ୍ତୁତ କରିବା, ଯୋଜନାଗୁଡ଼ିକର ମାର୍ଗଦର୍ଶିକାକୁ ପାଳନ କରିବା ଓ ପୂର୍ବରୁ ପ୍ରଦାନ କରାଯାଇଥିବା ଅର୍ଥର ସଦୁପଯୋଗ ଆଦିକୁ ନଜରରେ ରଖି ସଂସ୍କୃତି ମନ୍ତ୍ରାଳୟ ପକ୍ଷରୁ ‘ସ୍ବଦେଶ ଦର୍ଶନ’ ଯୋଜନାରେ ଆର୍ଥିକ ସହାୟତା ଯୋଗାଇ ଦିଆଯାଇଥାଏ। ଏଥିସହ ଅଧିକ ମାତ୍ରାରେ ତଥା ବର୍ଷତମାମ୍ ପର୍ଯ୍ୟଟକ ଆସୁଥିବା ପର୍ଯ୍ୟଟନ ତଥା ତୀର୍ଥସ୍ଥଳଗୁଡ଼ିକର ବିକାଶ ପାଇଁ ସ୍ବଦେଶ ଦର୍ଶନ ଯୋଜନାକୁ ଏସ୍ଡି ୨.୦ ଭାବେ ନୂଆ ରୂପ ଦିଆଯାଇଛି। ଏହି ଯୋଜନାରେ ଏଥର ଦ୍ବାରକାକୁ ପୂର୍ଣ୍ଣ ରୂପରେ ବିକାଶ କରାଯିବାକୁ ମନୋନୀତ କରାଯାଇଛି।
Comments are closed, but trackbacks and pingbacks are open.