ନିର୍ମାଣାଧିନ ଦେବୀ ନଦୀ ସେତୁ କାର୍ଯ୍ୟ ତଦାରଖ କଲେ ପ୍ରମୁଖ ଶାସନ ସଚିବ ଶ୍ରୀ ସିଂ

ଭୁବନେଶ୍ୱର:ଗ୍ରାମ୍ୟ ଉନ୍ନୟନ ବିଭାଗର ପ୍ରମୁଖ ଶାସନ ସଚିବ ଶ୍ରୀ ସଂଜୟ କୁମାର ସିଂ ଆଜି ପୁରୀ ଜିଲ୍ଲା ଅସ୍ତରଙ୍ଗ ବ୍ଲକ୍‌ର ତାଳଦା ପଞ୍ଚାୟତରେ ନିର୍ମାଣାଧିନ ଦେବୀ ନଦୀ ସେତୁ କାର୍ଯ୍ୟ ତଦାରଖ କରିଛନ୍ତି । ମୁଖ୍ୟଯନ୍ତ୍ରୀ (କୋଠାବାଡ଼ି ଏବଂ ସେତୁ) ଶ୍ରୀ ରମେଶ ଚନ୍ଦ୍ର ବେହେରା, ମୁଖ୍ୟ ନିର୍ମାଣ ଯନ୍ତ୍ରୀ ଶ୍ରୀ ସତ୍ୟବ୍ରତ ବେହେରା ଏବଂ ଅଧିକ୍ଷଣ ଯନ୍ତ୍ରୀ ଶ୍ରୀ ସତ୍ୟଜିତ ଦଳାଇ ମଧ୍ୟ ପ୍ରମୁଖ ଶାସନ ସଚିବ ଶ୍ରୀ ସିଂ ସହ ସେତୁ କାର୍ଯ୍ୟର ଅଗ୍ରଗତି ତଦାରଖ କରିଥିଲେ । ଏହି ସେତୁର ମୋଟ ଲମ୍ବା ୮୩୦ ମିଟର । ତାଳଦା ପଞ୍ଚାୟତ ଏକ ଦ୍ୱୀପାଞ୍ଚଳ ହୋଇଥିବାରୁ ଏହି ସେତୁ ଖଣ୍ଡାସାହିରୁ ତାଳଦାକୁ ସଂଯୋଗ କରୁଅଛି । ଏହା ଦ୍ୱାରା ପୁରୀ ଓ ଜଗତସିଂହପୁର ଜିଲ୍ଲାର ନାଉଗାଁ, ତାଳଦା, ନଈଗୁଆଁ, ଲତାହରଣ, ଅଳଙ୍ଗପୁର, ଅସ୍ତରଙ୍ଗ ପ୍ରଭୂତି ଅଞ୍ଚଳର ପ୍ରାୟ ୨୨ ହଜାରରୁ ଅଧିକ ଲୋକ ଉପକୃତ ହୋଇପାରିବା ସହିତ ସେମାନଙ୍କ ଚାଷ, ବ୍ୟବସାୟ ଓ ଗମନାଗମନର ସୁବିଧା ହୋଇପାରିବ ।
ଏଥି ସହିତ ଗ୍ରାମ୍ୟ ଉନ୍ନୟନ ବିଭାଗରେ ପ୍ରଥମ କରି ନୂତନ ଜ୍ଞାନକୌଶଳରେ ନିର୍ମାଣ ଚାଲିଥିବା ୬୦ ମିଟର ଦୈର୍ଘ୍ୟ ବୋ ଷ୍ଟ୍ରିଙ୍ଗ ସେତୁ ପରିଦର୍ଶନ କରି ଯଥାଶୀଘ୍ର କାର୍ଯ୍ୟ ସଂପୂର୍ଣ୍ଣ କରିବା ପାଇଁ ପ୍ରମୁଖ ଶାସନ ସଚିବ ଶ୍ରୀ ସିଂ ପରାମର୍ଶ ଦେଇଥିଲେ ।