ଭିତ୍ତିଭୂମି ଅଭାବରୁ ଭାରତରେ ପାଇଲଟ୍ ସମସ୍ୟା

ନୂଆଦିଲ୍ଲୀ: ଆଭିଏସନ୍ ସେକ୍ଟର (ବିମାନ ଚଳାଚଳ କ୍ଷେତ୍ର)ରେ ଦ୍ରୁତ ବିକାଶ ଘଟୁଥିବାରୁୁ ଭାରତରେ ବର୍ଷକୁ ପ୍ରାୟ ୧୦୦୦ ପାଇଲଟ୍‌ଙ୍କ ଆବଶ୍ୟକତା ପଡୁଛି । ଆଗାମୀ ପାଞ୍ଚବର୍ଷ ପର୍ଯ୍ୟନ୍ତ ଏହି ପ୍ରକ୍ରିୟା ଜାରି ରହିଲେ, ବିଭିନ୍ନ ଏୟାରଲାଇନ୍ସର ବିମାନ ସେବା କାର୍ଯ୍ୟକ୍ରମ ସୁରୁଖୁରୁରେ ଚାଲିବ ବୋଲି ଆଶା ମଧ୍ୟ କରାଯାଉଛି । ତେବେ ଭିତ୍ତିଭୂମିର ଅଭାବ ଯୋଗୁଁ ଦେଶରେ ଆବଶ୍ୟକ ସଂଖ୍ୟକ ତାଲିମପ୍ରାପ୍ତ ପାଇଲଟ୍ ନିଯୁକ୍ତ ହୋଇପାରୁନଥିବା କୁହାଯାଇଛି । ବିଗତ କିଛିବର୍ଷ ମଧ୍ୟରେ ଯେଉଁ ପାଇଲଟ୍‌ଙ୍କୁ କମର୍ସିଆଲ ଲାଇସେନ୍ସ ପ୍ରଦାନ କରାଯାଇଛି, ତାହା ଚାହିଦାକୁ ପୂରଣ କରିବାରେ ବିଫଳ ହୋଇଥିବା ଜଣାପଡିଛି । କେନ୍ଦ୍ର ବେସାମରିକ ବିମାନ ଚଳାଚଳ ମନ୍ତ୍ରଣାଳୟ ରିପୋର୍ଟ ଅନୁଯାୟୀ ୨୦୧୯ରେ ଦେଶରେ ୭୪୪ ଜଣ ପାଇଲଟ୍‌ଙ୍କୁ କମର୍ସିଆଲ ଲାଇସେନ୍ସ ପ୍ରଦାନ କରାଯାଇଥିଲା । ୨୦୨୦ରେ ଏଭଳି ପାଇଲଟ୍‌ଙ୍କ ସଂଖ୍ୟା ୫୭୮କୁ ହ୍ରାସ ପାଇଥିବାବେଳେ ୨୦୨୧ରେ ଏହା ପୁଣି ୮୬୨କୁ ବୃଦ୍ଧି ପାଇଥିଲା । ଜଣେ ବରିଷ୍ଠ ପାଇଲଟ୍‌ଙ୍କ କହିବା ଅନୁଯାୟୀ ପ୍ରତିବର୍ଷ ପ୍ରାୟ ୨୦୦ ପାଇଲଟ୍ ଅବସର ଗ୍ରହଣ କରୁଥିବାରୁ ନୂଆ ପାଇଲଟ୍‌ଙ୍କ ଆବଶ୍ୟକତା ଦିନକୁ ଦିନ ବୃଦ୍ଧି ପାଉଛି । ତେବେ ଉପଯୁକ୍ତ ତାଲିମ ପ୍ରଦାନ କରିବାକୁ ଦେଶରେ ଭିତ୍ତିଭୂମିର ଅଭାବ ଏହି ସମସ୍ୟାକୁ ଦ୍ୱିଗୁଣିତ କରୁଥିବା ସେ କହିଛନ୍ତି । ଫଳରେ ଭାରତର ଶତାଧିକ ଆଶାୟୀ ପାଇଲଟ୍‌ଙ୍କୁ ତାଲିମ ପାଇଁ ବିଦେଶ ଯିବାକୁ ପଡୁଛି । ବିଦେଶରୁ ତାଲିମ ନେଇ ଫେରିବାପରେ ସଂପୃକ୍ତ ପାଇଲଟ୍‌ଙ୍କୁ କମର୍ସିଆଲ ଲାଇସେନ୍ସ ପାଇବାକୁ ସର୍ବନିମ୍ନ ୨୦ ଘଣ୍ଟା ବିମାନ ଉଡାଇବାକୁ ପଡୁଛି । ଭାରତରେ ପାଇଲଟ୍‌ଙ୍କ ଅଭାବ ନାହିଁ ବୋଲି ମନ୍ତ୍ରଣାଳୟ ଦାବି କରୁଥିବାବେଳେ ବାସ୍ତବ ସ୍ଥିତି କିନ୍ତୁ ଭିନ୍ନ ପ୍ରକାର ବୋଲି ପାଇଲଟ୍ ସଂଘ ପକ୍ଷରୁ କୁହାଯାଇଛି । ସରକାର କହୁଛନ୍ତି ଯେ କେତେକ ଟାଇପ୍‌ର ବିମାନ ଉଡାଇବାକୁ ଭାରତରେ କମାଣ୍ଡର (ସିନିୟର ପାଇଲଟ୍ ଅଥବା କ୍ୟାପଟେନ୍‌)ଙ୍କ ଅଭାବ ରହିଛି । ତେବେ ଫରେନ୍ ଏୟାରକ୍ରିଉ ଟେମ୍ପରାରି ଅଥରାଇଜେସନ (ଫାଟା) ଚୁକ୍ତି ଜରିଆରେ ଭାରତରେ ବିଦେଶୀ ପାଇଲଟ୍‌ଙ୍କୁ ନିଯୁକ୍ତି ଦିଆଯାଇ ଏହି ସମସ୍ୟାର ସମାଧାନ କରାଯାଉଛି । ୨୦୨୨ ଜୁନ୍ ୩୦ ସୁଦ୍ଧା ଭାରତରେ ମୋଟ ୯ ହଜାର ପାଇଲଟ୍ ଥିବାବେଳେ କେବଳ ୮୨ ଜଣ ବିଦେଶୀ ପାଇଲଟ୍ ବିଭିନ୍ନ ଏୟାରଲାଇନ୍ସ ବିମାନ ଉଡାଉଛନ୍ତି । ନିକଟରେ ବୋଇଂ ୭୭୭ ବିମାନ ଉଡାଇବାକୁ ବିଦେଶୀ ପାଇଲଟ୍ ନିଯୁକ୍ତ କରିବା ପାଇଁ ଏୟାର ଇଣ୍ଡିଆ ଯୋଜନା କରୁଥିବା ଜଣାପଡିଛି । ଏହି ବିଦେଶୀ ପାଇଲଟ୍‌ଙ୍କୁ ଅଧିକ ବେତନ ଓ ଅନ୍ୟାନ୍ୟ ସୁବିଧା ସୁଯୋଗ ଯୋଗାଇଦେବାକୁ ପ୍ରଲୋଭିତ କରାଯାଉଛି । ତେବେ ଏୟାର ଇଣ୍ଡିଆର ଏଭଳି ଆଭିମୁଖ୍ୟକୁ ଏକାଧିକ ବରିଷ୍ଠ ପାଇଲଟ୍ ନାପସନ୍ଦ କରିଛନ୍ତି । ବୋଇଂ ୭୭୭ ବିମାନ ଉଡାଇବାକୁ ଭାରତରେ ଦକ୍ଷ ଓ ଅଭିଜ୍ଞ ପାଇଲଟ୍ ଥିବାବେଳେ ବିଦେଶରୁ ଅଧିକ ବେତନରେ ସେମାନଙ୍କୁ ନିଯୁକ୍ତି ଦେବାର କୌଣସି ଯଥାର୍ଥତା ନାହିଁ ବୋଲି ସେମାନେ କହିଛନ୍ତି । ଭାରତରେ ଭିତ୍ତିଭୂମିକୁ ଉନ୍ନତ କରିବାକୁ ଏୟାରପୋର୍ଟସ ଅଥରିଟୀ ଅଫ୍ ଇଣ୍ଡିଆ ପକ୍ଷରୁ ୨୦୨୦ରେ ଏଫଟିଓ (ଫ୍ଲାଇଟ୍ ଟ୍ରେନିଂ ଅର୍ଗାନାଇଜେସନ) ପାଇଁ ଉଦ୍ଦିଷ୍ଟ ନୀତି ନିୟମକୁ କୋହଳ କରାଯାଇଛି । ୨୦୨୧ରେ ଟେଣ୍ଡର ପ୍ରକ୍ରିୟା ଚୂଡାନ୍ତ କରାଯାଇ ଏୟାରପୋର୍ଟସ ଅଥରିଟି ଦେଶର ୫ଟି ଏୟାରପୋର୍ଟ ଯଥା ବେଲାଗାଭି (କର୍ଣ୍ଣାଟକ), ଜଲଗାଓଁ (ମହାରାଷ୍ଟ୍ର), କାଲାବୁରାଗି (କର୍ଣ୍ଣାଟକ), ଖଜୁରାହୋ (ମଧ୍ୟପ୍ରଦେଶ) ଏବଂ ଲୀଲାବାଡି (ଆସାମ)ରେ ଏଫ୍‌ଟିଓ ପ୍ରତିଷ୍ଠା ପାଇଁ ମଞ୍ଜୁରୀ ଦେଇଥିବା ପ୍ରକାଶ ।