ଗାଜା ସିଟି: ଶନିବାର ରାତିରେ କେନ୍ଦ୍ରୀୟ ଗାଜାରେ ଥିବା ଏକ ଶରଣାର୍ଥୀ ଶିବିରରେ ଇସ୍ରାଏଲ୍ ବୋମାବର୍ଷଣ ଯୋଗୁଁ ୩୦ରୁ ଊର୍ଦ୍ଧ୍ବ ଲୋକଙ୍କର ମୃତ୍ୟୁ ଘଟିଛି ବୋଲି ହମାସ୍ ପରିଚାଳିତ ସ୍ବାସ୍ଥ୍ୟ ମନ୍ତ୍ରାଳୟ କହିଛି।ସ୍ବାସ୍ଥ୍ୟ ମନ୍ତ୍ରାଳୟ ମୁଖପାତ୍ର ଅଶ୍ରଫ୍ ଅଲ୍-କୁଦ୍ରା ଜାରି କରିଥିବା ବିବୃତିରେ କହିଛନ୍ତି: କେନ୍ଦ୍ରୀୟ ଗାଜା ଷ୍ଟ୍ରିପ୍ସ୍ଥିତ ଅଲ୍-ମଗାଜୀ ଶିବିରରେ ନରସଂହାର କାରଣରୁ ଦେଇର୍ ଅଲ୍-ବଲାଗସ୍ଥିତ ‘ଅଲ୍-ଅସ୍କା ସହିଦ ଚିକିତ୍ସାଳୟ’ରେ ୩୦ରୁ ଅଧିକ ଶବ ପହଞ୍ଚିଛି।
‘ଟେଲିଗ୍ରାମ୍’ରେ ପୋଷ୍ଟ୍ କରିଥିବା ବିବୃତିରେ ହମାସ୍ କହିଛି, ଇସ୍ରାଏଲ୍ ପ୍ରତ୍ୟକ୍ଷଭାବେ ସାଧାରଣ ନାଗରିକମାନଙ୍କ ଘର ଉପରେ ବୋମା ଫିଙ୍ଗୁଛି। ମରିଥିବା ବ୍ୟକ୍ତିମାନଙ୍କ ମଧ୍ୟରୁ ଅଧିକାଂଶ ମହିଳା ଓ ଶିଶୁ।‘ତୁର୍କୀସ୍ ଅନାଦୋଲୁ ଏଜେନ୍ସି’ ପାଇଁ କାମ କରୁଥିବା ୩୭ ବର୍ଷିୟ ସାମ୍ବାଦିକ ମହମ୍ମଦ ଆଲାଲୌଲ୍ କହିଛନ୍ତି, ଅଲ୍-ମଗାଜୀ ଶିବିରରେ ମୋ ପଡ଼ିଶା ଘର ଉପରେ ଇସାଏଲ୍ ବିମାନ ଆକ୍ରମଣ କରିବାରୁ ତାହା ଆଂଶିକ ଭାଙ୍ଗିଯାଇଛି। ଇସ୍ରାଏଲ୍ ଆକ୍ରମଣରେ ମୋର ୧୩ ବର୍ଷିୟ ପୁଅ ଅହମଦ୍, ୪ ବର୍ଷିୟ ପୁଅ କ୍ବାଇସ୍ ମରିଯାଇଛନ୍ତି। ସ୍ତ୍ରୀ, ମାଆ ଓ ଆଉ ଦୁଇଜଣ ପିଲା ବି ଆହତ ହୋଇଛନ୍ତି।
‘ଇଣ୍ଡିଆ ଟୁଡେ’ ରିପୋର୍ଟ ଅନୁସାରେ, ଶନିବାର ରାତିରେ କେନ୍ଦ୍ରୀୟ ଗାଜା ଷ୍ଟ୍ରିପ୍ରେ ଥିବା ମଗାଜୀ ଶରଣାର୍ଥୀ ଶିବିରରେ ଇସ୍ରାଏଲ୍ ଆକ୍ରମଣ ଯୋଗୁଁ ୫୧ଜଣ ପାଲେଷ୍ଟିନୀୟ ମରିଛନ୍ତି। ସେମାନଙ୍କ ମଧ୍ୟରୁ ଅଧିକାଂଶ ହେଉଛନ୍ତି ମହିଳା ଓ ପିଲା। ଶନିବାର ରାତି ସାରା ‘ଇସ୍ରାଏଲ୍ ଡିଫେନ୍ସ୍ ଫୋର୍ସ’ ଗାଜା ଉପରେ ବୋମା ବର୍ଷଣ ଜାରି ରଖିଥିଲା। ଇସ୍ରାଏଲ୍ ସ୍ଥଳବାହିନୀ ଆକ୍ରମଣରେ ବି ଅନେକ ଆବାସିକ ବାସଭବନ ମଧ୍ୟ ନଷ୍ଟ ହୋଇଯାଇଛି।
Comments are closed, but trackbacks and pingbacks are open.