ନୂଆଦିଲ୍ଲୀ: ସୁପ୍ରିମକୋର୍ଟ ଏବଂ ପ୍ରଧାନ ବିଚାରପତି (ସିଜେଆଇ) ସଞ୍ଜୀବ ଖାନ୍ନାଙ୍କ ସମ୍ପର୍କରେ ବିଜେପି ସାଂସଦ ନିଶିକାନ୍ତ ଦୁବେଙ୍କ ବିବାଦୀୟ ବିବୃତ୍ତି ଉପରେ ଏବେ ଆଇନଗତ କାର୍ଯ୍ୟାନୁଷ୍ଠାନର ଦାବି ବଢିବାରେ ଲାଗିଛି। ସୁପ୍ରିମକୋର୍ଟର ଜଣେ ଆଡଭୋକେଟ୍-ଅନ-ରେକର୍ଡ ‘ଅବମାନନା ପ୍ରକ୍ରିୟା’ ଆରମ୍ଭ କରିବାକୁ ଅନୁମତି ମାଗି ଆଟର୍ଣ୍ଣି ଜେନେରାଲ୍ (ଏଜି) କୁ ଚିଠି ଲେଖିଛନ୍ତି। ଆଇନ ଅନୁଯାୟୀ, 1971 ର ଅବମାନନା କୋର୍ଟ ଅଧିନିୟମର ଧାରା 15 (ଖ) ଅନୁଯାୟୀ, ଯଦି ଆଟର୍ଣ୍ଣି ଜେନେରାଲ କିମ୍ବା ସଲିସିଟର ଜେନେରାଲ ଅନୁମତି ଦିଅନ୍ତି ତେବେ ସୁପ୍ରିମକୋର୍ଟଙ୍କ ଅବମାନନା ପ୍ରକ୍ରିୟା ଆରମ୍ଭ ହୋଇପାରେ। ଶନିବାର ଦିନ ସୁପ୍ରିମକୋର୍ଟ ଏବଂ ପ୍ରଧାନ ବିଚାରପତିଙ୍କ ବିରୋଧରେ ବିଜେପି ସାଂସଦ ନିଶିକାନ୍ତ ଦୁବେ ଏକ ବିବାଦୀୟ ବିବୃତ୍ତି ଦେଇଛନ୍ତି, ଯାହା ପରେ ତାଙ୍କ ବିରୋଧରେ କାର୍ଯ୍ୟାନୁଷ୍ଠାନ ଦାବି ବଢିବାରେ ଲାଗିଛି। ବିଜେପି ସାଂସଦଙ୍କ ଏହି ବିବୃତ୍ତି ପରେ ବହୁ ବିରୋଧୀଦଳ ନେତା ମଧ୍ୟ ବିଜେପିକୁ ଟାର୍ଗେଟ କରିଛନ୍ତି। ତେବେ ବିଜେପି ଏହି ବିବୃତ୍ତିରୁ ନିଜକୁ ଦୂରେଇ ରଖିଛି ଏବଂ ନିଶିକାନ୍ତ ଦୁବେଙ୍କ ବିବୃତ୍ତିକୁ ସମର୍ଥନ କରିନାହିଁ। ଏହା ତାଙ୍କର ବ୍ୟକ୍ତିଗତ ମତ, ଏଥିରେ ବିଜେପି ର କୌଣସି ସମ୍ପର୍କ ନାହିଁ ବୋଲି ଦଳ କହିଛି। ଏହି ସମୟରେ ଏଭଳି ବିବୃତ୍ତି ନଦେବା ଲାଗି ନିଶିକାନ୍ତ ଡୁବେ ଏବଂ ଦଳର ସମସ୍ତ ସଦସ୍ୟଙ୍କୁ ବିଜେପି ରାଷ୍ଟ୍ରୀୟ ସଭାପତି ଜେପି ନଡ୍ଡା ନିର୍ଦ୍ଦେଶ ଦେଇଛନ୍ତି।
Comments are closed, but trackbacks and pingbacks are open.