ୱାୟନାଡ଼ରେ ଭୂସ୍ଖଳନ, ୧୦୬ ମୃତ

ୱାୟନାଡ: ଲଗାଣ ବର୍ଷା ଓ ତଦ୍‌ଜନିତ ଭୂସ୍ଖଳନ କେରଳରେ ମହାପ୍ରଳୟଙ୍କରୀ ପରିସ୍ଥିତି ସୃଷ୍ଟି କରିଛି । ଗତକାଲି ରାତିରେ ତିନି ଥର ଭୂସ୍ଖଳନ ହୋଇଛି । ପ୍ରଥମ ଭୂସ୍ଖଳନ ରାତି ୨ଟାରେ ହୋଇଥିବା ବେଳେ ପରବର୍ତ୍ତୀ ଭୂସ୍ଖଳନ ଭୋର ସାଢ଼େ ୪ଟା ଓ ପରେ ଆଉ ଏକ ଭୂସ୍ଖଳନ ଆଜି ସକାଳେ ହୋଇଥିବା ସୂଚନା ମିଳିଛି । ଭୂସ୍ଖଳନ ବେଳେ ଲୋକମାନେ ନିଜ ନିଜ ଘରେ ଶୋଇଥିବାରୁ ମୃତାହତଙ୍କ ସଂଖ୍ୟା ଅଧିକ ହୋଇଛି । ଗତକାଲି ୱାୟନାଡ଼ ଅଞ୍ଚଳରେ ୪୦୯ ମିମି ବର୍ଷା ଯୋଗୁ ପାଖ ପାହାଡ଼ରୁ ମାଟି ଅତଡ଼ା ଖସିବା ସହିତ ପଥର ଖଣ୍ଡମାନ ମଧ୍ୟ ଖସି ଆସିଛି । ଫଳରେ ଘରଦ୍ୱାର ଓ ରାସ୍ତାଘାଟ ପୋତି ହୋଇପଡ଼ିଛି । ବର୍ତ୍ତମାନ ସୁଦ୍ଧା କେରଳର ୱାୟନାଡ ଜିଲ୍ଳାରେ ଘଟିଥିବା ଭୂସ୍ଖଳନ ଯୋଗୁ ପ୍ରାୟ ୧୦୬ ଜଣ ପ୍ରାଣ ହରାଇଥିବା ସୂଚନା ମିଳିଛି । ସେହିପରି ୨୦୦ରୁ ଊର୍ଦ୍ଧ୍ୱ ଲୋକଙ୍କୁ ଉଦ୍ଧାର କରାଯାଇ ଡାକ୍ତରଖାନାରେ ଭର୍ତ୍ତି କରାଯାଇଛି । ଭୂସ୍ଖଳନ ସମୟରେ ପ୍ରାୟ ୪୦୦ରୁ ଊର୍ଦ୍ଧ୍ୱ ଲୋକ (୧୦୦ରୁ ଊର୍ଦ୍ଧ୍ୱ ପରିବାର) ଏକସଙ୍ଗେ ମାଟିତଳେ ପୋତି ହୋଇଯାଇଥିଲେ ବୋଲି ସ୍ଥାନୀୟ ଲୋକେ କହିଛନ୍ତି । ସୁତରାଂ ଆହୁରି ଅନେକ ଲୋକ ପୋତି ହୋଇ ରହିଥିବା ସନ୍ଦେହରେ ଏବେବି ଉଦ୍ଧାର ପ୍ରକ୍ରିୟା ଜୋରସୋରରେ ଜାରି ରହିଛି । ଅନ୍ୟପକ୍ଷରେ ଆଗକୁ ମୃତ୍ୟୁସଂଖ୍ୟା ଆହୁରି ବଢ଼ିପାରେ ବୋଲି ଆଶଙ୍କା କରାଯାଉଛି । ଏସବୁ ମଧ୍ୟରେ ଲଗାଣ ବର୍ଷା କାରଣରୁ ଉଦ୍ଧାର ପ୍ରକ୍ରିୟା ମଧ୍ୟ ସାମାନ୍ୟ ମନ୍ଥର ଗତିରେ ତ୍ୱରାନ୍ୱିତ କରାଯାଇପାରୁଛି । ତଥାପି ଉଦ୍ଧାରକାରୀ ଦଳ ଘଟଣାସ୍ଥଳରେ ଲୋକଙ୍କ ଉଦ୍ଧାର ପାଇଁ ନିୟମିତ ଭାବେ ଚେଷ୍ଟା ଜାରି ରଖିଛନ୍ତି । ରିପୋର୍ଟ ଅନୁସାରେ ମାଟିତଳୁ ଉଦ୍ଧାର ହୋଇଥିବା ମୃତଦେହଙ୍କ ମଧ୍ୟରେ କିଛି ଶିଶୁ ଏବଂ ମହିଳାଙ୍କ ଶବ ମଧ୍ୟ ସାମିଲ ରହିଛି । ରାଜ୍ୟ ବିପର୍ଯ୍ୟୟ ପରିଚାଳନା ପ୍ରାଧିକରଣ (କେଏସ୍‌ଡିଏମ୍‌ଏ) କହିଛି, ଗୋଟିଏ ପରେ ଗୋଟିଏ କରି ନିୟମିତ ବ୍ୟବଧାନରେ ପ୍ରାୟ ତିନୋଟି ସ୍ଥାନ (ମୋପ୍ପାଡି, ମୁବାଡକାଇ ଏବଂ ଚୁରାଲ ମାଲା ପାହାଡିଆ ଅଞ୍ଚଳ)ରେ ଭୂସ୍ଖଳନ ହୋଇଥିଲା । ଏହାଦ୍ୱାରା ରାସ୍ତା-ଘାଟ, ଘର-ଦ୍ୱାର ସବୁ ଧୋଇ ହୋଇଯାଇଛି । ବିଳମ୍ବିତ ରାତି ପ୍ରାୟ ୨ଟା ସମୟରେ ମୁବାଡକାଇ ଅଞ୍ଚଳରେ ପ୍ରଥମ ଭୂସ୍ଖଳନ ହୋଇଥିଲା । ଏହାପରେ ଭୋର ସମୟରେ ଏହି ଜିଲ୍ଲାର ଅନ୍ୟ ଦୁଇଟି ସ୍ଥାନ ମୋପ୍ପାଡି ଏବଂ ଚୁରାଲ ମାଲା ଅଞ୍ଚଳରେ ଆଉ ଦୁଇଟି ଭୂସ୍ଖଳନ ହୋଇଥିଲା । ଫଳରେ ଏସବୁ ଅଞ୍ଚଳରେ ଅନେକ ଘର-ଦ୍ୱାର ତଥା ରାସ୍ତାଘାଟ ସବୁ ଧୋଇଯାଇ ବାହ୍ୟ ଅଞ୍ଚଳରୁ ବିଛିନ୍ନ ହୋଇଯାଇଛି । ଶହ ଶହ ଘରେ ମାଟିରେ ମିଶିଯାଇଛି । ଅନେକ ଗାଡ଼ି ଭାସିଯାଇଛି କିମ୍ବା ପୋତି ହୋଇଯାଇଛି । ରାସ୍ତାଘାଟ ଭାଙ୍ଗିଯାଇ ସେଠାରେ ନାଳ ସୃଷ୍ଟି ହୋଇଛି । ମୁଣ୍ଡୁକାଇ, ଚୁରାଲମାଳ, ଆତ୍ତାମାଳ ଓ ନୁଲୁପୁଝା, ଯାହା ଦିନେ ପର୍ଯ୍ୟଟକଙ୍କର ଆକର୍ଷଣର କେନ୍ଦ୍ରବିନ୍ଦୁ ଥିଲା ଆଜି ତାହା ଛାରଖାର ହୋଇଯାଇଛି । ପ୍ରତିଦିନ ଏହି ଅଞ୍ଚଳକୁ ଶହ ଶହ ଦର୍ଶକ ଆସୁଥିଲେ । ଭୂସ୍ଖଳନ ବେଳେ ସେଠାରେ ମଧ୍ୟ ଅନେକ ପର୍ଯ୍ୟଟକ ବିଭିନ୍ନ ହୋଟେଲରେ ଥିଲେ । ଏବେ ସେମାନଙ୍କର ପତ୍ତା ମିଳୁନାହିଁ । ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଘଟଣା ସମ୍ପର୍କରେ ମୁଖ୍ୟମନ୍ତ୍ରୀ ପିନାରାଇ ବିଜୟନ୍‌ଙ୍କ ସହ କଥା ହୋଇଛନ୍ତି । ଗଭୀର ଦୁଃଖ ତଥା ଶୋକ ବ୍ୟକ୍ତ କରିବା ସହ ପ୍ରଧାନମନ୍ତ୍ରୀ ମୃତକଙ୍କ ପରିବାର ପାଇଁ ୨ଲକ୍ଷ ଲେଖାଏ ଏବଂ ଆହତଙ୍କୁ ୫୦ହଜାର ଲେଖାଏ ଟଙ୍କାର ଅନୁକମ୍ପା ରାଶି ଘୋଷଣା କରିଛନ୍ତି । ପ୍ରକୃତିର ଏହି କରାଳ ବିତ୍ପତ୍ତି ସମୟରେ କେନ୍ଦ୍ର ସରକାରଙ୍କ ପକ୍ଷରୁ ରାଜ୍ୟ ସରକାରଙ୍କୁ ସମସ୍ତ ପ୍ରକାର ସହାୟତା ଯୋଗାଇ ଦେବାକୁ ମୋଦୀ, ପିନାରାଇଙ୍କୁ ପ୍ରତିଶ୍ରୁତି ଦେଇଛନ୍ତି । ସାମ୍ପ୍ରତିକ ପରିସ୍ଥିତି ସମ୍ପର୍କରେ ପ୍ରଧାନମନ୍ତ୍ରୀ ମୋଦୀ, ବିଜେପି ସଭାପତି ଜେପି ନଡ୍ଡାଙ୍କ ସହ ଏବଂ କେନ୍ଦ୍ରମନ୍ତ୍ରୀ ସୁରେଶ ଗୋପୀଙ୍କ ସହ କଥା କହିଛନ୍ତି । ଅନ୍ୟପକ୍ଷେ କେରଳ ସରକାର ରାଜ୍ୟବ୍ୟାପୀ ୨ଦିନିଆ ଶୋକ ଘୋଷଣା କରିଛନ୍ତି । ପ୍ରଭାବିତ ଅଞ୍ଚଳଗୁଡ଼ିକରେ ଅଗ୍ନିଶମ ବାହିନୀ ଏବଂ ଜାତୀୟ ବିପର୍ଯ୍ୟୟ ମୁକାବିଲା ଫୋର୍ସ (ଏନ୍‌ଡିଆରଏଫ) ଦଳ ନିୟୋଜିତ ହୋଇଛନ୍ତି । ଏନ୍‌ଡିଆରଏଫ୍‌ର ଏକ ଅତିରିକ୍ତ ଦଳଙ୍କୁ ୱାୟନାଡ ପଠାଯାଇଛି । ବାୟୁସେନାର ଦୁଇଟି ହେଲିକପ୍ଟର ମଧ୍ୟ ଉଦ୍ଧାର କାର୍ଯ୍ୟରେ ନିୟୋଜିତ ରହିଛି । ୩୦୦ ଯବାନ ଉଦ୍ଧାର କାର୍ଯ୍ୟରେ ଲାଗିଛନ୍ତି । ସେନାର ସନ୍ଧାନୀ କୁକୁରଙ୍କୁ ମଧ୍ୟ କାର୍ଯ୍ୟରେ ନିୟୋଜିତ କରାଯାଇଛି । ସେହିପରି ରାଜ୍ୟ ପ୍ରଶାସନ ପକ୍ଷରୁ ଜରୁରୀକାଳୀନ ସହାୟତା ଯୋଗାଇଦେବା ପାଇଁ ହେଲ୍ପଲାଇନ ନମ୍ବର ଜାରି କରାଯାଇଥିବା କେରଳ ସ୍ୱାସ୍ଥ୍ୟମନ୍ତ୍ରୀ ବୀଣା ଜର୍ଜ କହିଛନ୍ତି । ପରିସ୍ଥିତିର ମୁକାବିଲା କରିବା ପାଇଁ ରାଜ୍ୟର ଭିଥିରୀ, କାଲାପାଟ୍ଟା, ମେପ୍ପାଡି ଏବଂ ମନନ୍ତୱାଡି ହସ୍ପିଟାଲ ସମେତ ସମସ୍ତ ହସ୍ପିଟାଲ ପ୍ରସ୍ତୁତ ଅଛି । ସମସ୍ତ ସ୍ୱାସ୍ଥ୍ୟ କର୍ମୀଙ୍କୁ ଡ୍ୟୁଟିରେ ଯୋଗଦେବା ପାଇଁ ନିର୍ଦ୍ଦେଶ ଦିଆଯାଇଛି ।