କୁନ୍ଦୁରି ଚାଷ

କୁନ୍ଦୁରିକୁ ତରକାରି କରି ଖିଆଯାଏ । ଏହାର ପତ୍ରର ରସ ସେବନ କଲେ ମଧୁମେହ ରୋଗ ଭଲ ହୋଇଥାଏ । କୁନ୍ଦୁରି ଚାଷ ପ୍ରଥମେ ଏସିଆ ମହାଦେଶରେ ଆରମ୍ଭ ହୋଇଥିବାର ଜଣାଯାଏ । କେତେକଙ୍କ ମତରେ ଏହା ଆଫ୍ରିକାରେ ଜନ୍ମ ନେଇଛି । ଭାରତର ବିଭିନ୍ନ ଅଞ୍ଚଳରେ କୁନ୍ଦୁରି ଚାଷ କରାଯାଇଥାଏ ।
ବର୍ଷାଦିନ ଆରମ୍ଭରେ କୁନ୍ଦୁରି ଲଗାଯାଏ । ଜୁଲାଇ ମାସରେ ଏହାକୁ ଲଗାଇଦେବା ଆବଶ୍ୟକ । କେତେକ ସ୍ଥାନରେ ଫେବୃଆରୀ-ମାର୍ଚ୍ଚ ମାସରେ ମଧ୍ୟ ଏହା ଲଗାଯାଇଥାଏ । ତେବେ ଏହି ସମୟରେ ପାଣି ମଡ଼ାଇବା ଆବଶ୍ୟକ ।
କୁନ୍ଦୁରି ଡାଳକୁ ବିହନ ଭାବେ ବ୍ୟବହାର କରାଯାଏ । ବିହନ ପାଇଁ ବ୍ୟବହାର କରାଯାଇଥିବା ଡାଳର ଲମ୍ବ ୧୨-୧୫ ସେଣ୍ଟିମିଟର ହୋଇଥିବା ଦରକାର । ଏଥିରେ ୫-୬ଟି ପତ୍ର ଥିବା ଆବଶ୍ୟକ । ମନ୍ଦା କରି ବା ନାଳ କରି କୁନ୍ଦୁରି ଲଗାଯାଏ । ଧାଡ଼ିକୁ ଧାଡ଼ି ୧୫୦ ସେଣ୍ଟିମିଟର ଓ ଗଛକୁ ଗଛ ୧୨୦ ସେଣ୍ଟିମିଟର ଦୂରତାରେ ଡାଳ ଲଗାଇବାକୁ ହେବ । ଗୋଟିଏ ସ୍ଥାନରେ ୨-୩ଟି ଡାଳ ପୋତାଯାଏ । ଏକ ଏକର ଜମିରେ ପ୍ରାୟ ୨୨୦୦ ମନ୍ଦା ହୋଇଥାଏ ।
ଲଗାଇଲାବେଳେ ଏକର ପ୍ରତି ପ୍ରାୟ ୪୦ କୁଇଣ୍ଟାଲ ସଢ଼ା ଗୋବରଖତ ବା କମ୍ପୋଷ୍ଟ ଦେବାକୁ ହେବ । ଏଥି ସହିତ ଏକର ପିଛା ୧୨ କିଲୋଗ୍ରାମ ଯବକ୍ଷାର, ୧୬ କିଲୋଗ୍ରାମ ଫସଫରସ ଓ ୮ କିଲୋଗ୍ରାମ ପଟାସ ଦେବାକୁ ପଡ଼ିବ । ଏଥିପାଇଁ ୨୬ କି.ଗ୍ରା. ୟୁରିଆ, ୧୦୦ କି.ଗ୍ରା. ସିଙ୍ଗଲ ସୁପର ଫସଫେଟ୍ ଓ ୧୩ କି.ଗ୍ରା. ମ୍ୟୁରେଟ୍ ଅଫ୍ ପଟାସ୍ ଦରକାର ହେବ । ହିସାବ କଲେ ମନ୍ଦା ପିଛା ପ୍ରାୟ ପ୍ରାୟ ୧୨ ଗ୍ରାମ ୟୁରିଆ, ୪୫ ଗ୍ରାମ ସିଙ୍ଗଲ ସୁପର ଫସଫେଟ୍ ଓ ୬ ଗ୍ରାମ ମ୍ୟୁରେଟ୍ ଅଫ୍ ପଟାସ ଦେବାକୁ ପନିବ । ଏହା ବଦଳରେ ଏକର ପ୍ରତି ୩୫ କି.ଗ୍ରା. ଡିଏପି, ୧୩ କି.ଗ୍ରା. ମ୍ୟୁରେଟ୍ ଅଫ୍ ପଟାସ ଓ ୧୩ କି.ଗ୍ରା. ୟୁରିଆ ଦରକାର ହେବ । ମନ୍ଦା ପ୍ରତି ପ୍ରାୟ ୧୬ ଗ୍ରାମ ଡିଏପି, ୬ ଗ୍ରାମ ମ୍ୟୁରେଟ୍ ଅଫ୍ ପଟାସ ଓ ୬ ଗ୍ରାମ ୟୁରିଆ ପ୍ରୟୋଗ କରିବାକୁ ପଡ଼ିବ । ଏହା ବଦଳରେ ହିସାବ କରି ଅନ୍ୟାନ୍ୟ ସାର ମଧ୍ୟ ପ୍ରୟୋଗ କରାଯାଇପାରେ ।
ଗଛ ଲଗାଇବାହର ଦୁଇ ମାସ ପରେ ଏକର ପ୍ରତି ୧୨ କି.ଗ୍ରା. ଯବକ୍ଷାର ଓ ୮ କି.ଗ୍ରା. ପଟାସ ପ୍ରୟୋଗ କରିବାକୁ ପଡ଼ିବ । ଏଥିପାଇଁ ୨୬ କି.ଗ୍ରା. ୟୁରିଆ ଓ ୧୩ କି.ଗ୍ରା. ମ୍ୟୁରେଟ୍ ଅଫ୍ ପଟାସ ଆବଶ୍ୟକ ହେବ । ମନ୍ଦା ପ୍ରତି ପ୍ରାୟ ୧୨ ଗ୍ରାମ ୟୁରିଆ ଓ ୬ ଗ୍ରାମ ମ୍ୟୁରେଟ୍ ଅଫ୍ ପଟାସ ଦରକାର ପଡ଼ିବ ।
ଲଗାଇବାର ଏକ ମାସ ଓ ଦୁଇ ମାସ ପରେ ମାଟିକୁ ଖୁସାଇ ଦେଇ ଘାସ ବାଛିବା ଆବଶ୍ୟକ । ରଞ୍ଜା ପୋତି ତା ଉପରକୁ ଗଛ ମଡ଼ାଇଦେଲେ ଅଧିକ ଅମଳ ମିଳିଥାଏ । ବର୍ଷାଦିନେ ପାଣି ନିଗିଡ଼ିଯିବା ପାଇଁ ବ୍ୟବସ୍ଥା କରିବା ଉଚିତ ।
କୁନ୍ଦୁରି ଗଛରେ ପାଉଁଶିଆ ରୋଗ ଦେଖାଯାଏ । ଏହି ରୋଗ ହେଲେ ପତ୍ରର ତଳ ଅଂଶରେ ଧଳା ଗୁଣ୍ଡ ଲାଗିବା ପରି ଦେଖାଯାଏ । ପତ୍ର ଉପରେ ମଧ୍ୟ ପାଉଁଶିଆ ଦେଖାଯାଏ । ଏହାକୁ ଦମନ କରିବାପାଇଁ ଏକର ପ୍ରତି ୬୦୦ ଗ୍ରାମ ଇଣ୍ଡୋଫିଲ ଏମ୍‌-୪୫ ବା ୨୦୦ ଗ୍ରାମ ବାଭିଷ୍ଟିନକୁ ୨୦୦ ଲିଟର ପାଣି ସହ ମିଶାଇ ସ୍ପ୍ରେ କରିବାକୁ ପଡ଼ିବ । ଏହି ଗଛରେ ଜଉପୋକ ଓ ଦିବାଲି ପୋକ ଲାଗିଥାନ୍ତି । ଏମାନେ ଗଛରୁ ରସ ଶୋଷି ଖାଇବା ଯୋଗୁଁ ଗଛ ରୁଗ୍‌ଣ ହୋଇଯାଏ । ଏହାକୁ ଦମନ କରିବା ପାଇଁ ଏକର ପ୍ରତି ୨୦୦ ଗ୍ରାମ ଲାନେଟ୍ ବା ଡନେଟ୍ ଔଷଧକୁ ୨୦୦ ଲିଟର ପାଣି ସହ ମିଶାଇ ସ୍ପ୍ରେ କରିବାକୁ ପଡ଼ିବ । ଗଛରେ ଫୁଲ, ଫଳ ହୋଇଥିବା ବେଳେ ପୋକ ଦମନ ପାଇଁ ଏକର ପ୍ରତି ୪୦୦ ମିଲିଲିଟର ମାଲାଥିଅନ ସ୍ପ୍ରେ କରାଯାଇପାରିବ ।