ନୂଆଦିଲ୍ଲୀ : ଖଲିସ୍ତାନୀ ଆତଙ୍କବାଦୀଙ୍କୁ ସମର୍ଥନ ଜଣାଇ ଆସୁଥିବା କାନାଡାକୁ ଏଫଏଟିଏଫ୍ ପରିସରଭୁକ୍ତ କରିବା ଲାଗି ଭାରତ ଯୋଜନା କରୁଛି। ଭାରତ ଅଭିଯୋଗ କରିଛି ଯେ କାନାଡା ସରକାର ଆତଙ୍କବାଦୀ ସଂଗଠନଗୁଡିକ ପ୍ରତି କୋହଳ ମନୋଭାବ ପ୍ରଦର୍ଶନ କରିଆସୁଛନ୍ତି। ବିଶେଷକରି ସ୍ବତନ୍ତ୍ର ଖଲିସ୍ତାନ ରାଷ୍ଟ୍ରଗଠନ ନିମନ୍ତେ ଆନ୍ଦୋଳନ ଚଳାଇଥିବା ସଂଗଠନଗୁଡିକ ପ୍ରତି କାନାଡା କୋହଳ ମନୋଭାବ ପ୍ରଦର୍ଶନ କରୁଛି। ଖଲିସ୍ତାନ ସଂଗଠନଗୁଡିକର କାର୍ଯ୍ୟକଳାପକୁ ପରିଚାଳନା ନିମନ୍ତେ କାନାଡା ସରକାର ପାଣ୍ଠି ଯୋଗାଣ କରିଥିବା ନେଇ ଭାରତ ପ୍ରମାଣ ଉପସ୍ଥାପନ କରିଛି।
ଏପରିକି କାନାଡା ମାଟିରେ କାର୍ଯ୍ୟ କରୁଥିବା ଖଲିସ୍ତାନୀ ସଂଗଠନଗୁଡିକ ବିରୋଧରେ ଏଠାକାର ସରକାର କୌଣସି ପଦକ୍ଷେପ ନେଉ ନାହିଁ। କାନାଡା ବିରୋଧରେ ଭାରତ ଏଫଏଟିଏଫ୍ ନିକଟରେ ବିଧିବଦ୍ଧ ଅଭିଯୋଗ କରିବାକୁ ନିଷ୍ପତ୍ତି ନେଇଛି। ଏପରିକି କାନାଡାକୁ ଏଫଏଟିଏଫ୍ର ଧୂସର ତାଲିକାରେ ସ୍ଥାନୀତ କରିବାକୁ ଭାରତ ଦାବି କରିବ। କାନାଡା ଯଦି ଏଫଏଟିଏଫ୍ର ଧୂସର ତାଲିକାଭୁକ୍ତ ହୁଏ ତେବେ ଏହା ଆନ୍ତର୍ଜାତିକ ଆର୍ଥିକ କଟକଣାର ସମ୍ମୁଖୀନ ହେବ। ଆତଙ୍କବାଦୀ ସଂଗଠନଗୁଡିକ ପ୍ରତି କୋହଳ ମନୋଭାବ ଯୋଗୁଁ ୨୦୧୮ ଜୁନ୍ରୁ ୨୦୨୧ ଅକ୍ଟୋବର ପର୍ଯ୍ୟନ୍ତ ପାକିସ୍ତାନ ଏଫଏଟିଏଫ୍ର ଧୂସର ତାଲିକାରେ ରହିଥିଲା।
ଫାଇନାନ୍ସିଆଲ ଆକ୍ସନ ଟାକ୍ସ ଫୋର୍ସ (ଏଫଏଟିଏଫ୍) ହେଉଛି ଏକ ଆନ୍ତର୍ଜାତିକ ସଂଗଠନ। ୧୯୮୯ରେ ଏହାକୁ ପ୍ରତିଷ୍ଠା କରାଯାଇଥିଲା। ଏହି ସଂଗଠନରେ ଏବେ ୩୯ଟି ଦେଶ ଓ ୨ଟି ଆଞ୍ଚଳିକ ସଂଗଠନ ସଦସ୍ୟ ରହିଛନ୍ତି। ଏଫଏଟିଏଫ୍ ବିଶ୍ବ ଆତଙ୍କବାଦୀ କାର୍ଯ୍ୟକଳାପକୁ ନିୟନ୍ତ୍ରଣ କରିଥାଏ। ଏହା ଆତଙ୍କବାଦୀ ସଂଗଠନକୁ ପାଣ୍ଠି ଯୋଗାଣ ବିରୋଧରେ କାର୍ଯ୍ୟାନୁଷ୍ଠାନ ନେଇଥାଏ। ଆତଙ୍କବାଦୀ କାର୍ଯ୍ୟକଳାପକୁ ନିୟନ୍ତ୍ରଣ କରିବା ଲାଗି ଏଫଏଟିଏଫ୍ ୪୦ଟି ପ୍ରସ୍ତାବ ଦେଇଥାଏ।
Comments are closed, but trackbacks and pingbacks are open.