ଭୁବନେଶ୍ୱର: ରାଜ୍ୟର ଜମିହୀନ ପରିବାରଙ୍କୁ ଘରଡିହ ଯୋଗାଇବା ପାଇଁ ସରକାର ବାର୍ଷିକ ପରିବାର ଆୟ ସୀମାକୁ ବୃଦ୍ଧି କରିଛନ୍ତି । ପୂର୍ବରୁ ଏହି ସୀମା ୧ ଲକ୍ଷ ଟଙ୍କା ଥିବାବେଳେ ଏବେ ଏହାକୁ ଦେଢ଼ ଲକ୍ଷ ଟଙ୍କାକୁ ବଢ଼ାଇ ଦିଆଯାଇଛି । ଏହି ନିଷ୍ପତ୍ତି ଫଳରେ ଅଧିକ ସଂଖ୍ୟକ ଜମିହୀନ ପରିବାର ବସୁନ୍ଧରା ଯୋଜନାରେ ଘରଡିହ ପାଇବାକୁ ଯୋଗ୍ୟ ବିବେଚିତ ହେବେ ଏବଂ ଅଙ୍ଗନବାଡ଼ି ଓ ଆଶା କର୍ମୀଙ୍କ ପରିବାର ମଧ୍ୟ ଏଥିରୁ ଉପକୃତ ହୋଇପାରିବେ । ଘର ନିର୍ମାଣ ନିମନ୍ତେ ଜମିହୀନଙ୍କୁ ସରକାରୀ ଜମି ଯୋଗାଇ ଦେବା ଉଦ୍ଦେଶ୍ୟରେ ବସୁନ୍ଧରା ଯୋଜନା କାର୍ଯ୍ୟକାରୀ ହେଉଛି । ଅଧିକରୁ ଅଧିକ ହିତାଧିକାରୀଙ୍କୁ ଏଥିରେ ସାମିଲ କରିବା ପାଇଁ ସରକାର ଜମିହୀନଙ୍କ ସଂଜ୍ଞାରେ ମଧ୍ୟ ପରିବର୍ତ୍ତନ ଆଣିଛନ୍ତି । ପୂର୍ବରୁ କେବଳ ଆଦୌ ଘରଡିହ ନଥିବା ପରିବାର ହିଁ ଏହି ସୁବିଧା ପାଉଥିବାବେଳେ ଏବେ ଅଳ୍ପ ପରିମାଣର ଘରଡିହ ଥିବା ଯୋଗ୍ୟ ପରିବାର ମଧ୍ୟ ଜମି ପାଇପାରିବେ । ଏଥିପାଇଁ ୨୦୨୫ ମସିହାରେ ଓଡ଼ିଶା ସରକାରୀ ଜମି ବନ୍ଦୋବସ୍ତ ନିୟମରେ ସଂଶୋଧନ କରାଯାଇ ଘରଡିହ ନଥିବା ବ୍ୟକ୍ତିଙ୍କ ସଂଜ୍ଞାକୁ ଅଧିକ ବ୍ୟାପକ କରାଯାଇଥିଲା ।
Comments are closed, but trackbacks and pingbacks are open.