ବର୍ତମାନ ଯଦି ସୁଦାମା ଶ୍ରୀ କୃଷ୍ଣଙ୍କୁ ଚାଉଳ ଦେଇଥାନ୍ତେ ତେବେ ତାଙ୍କ ଉପରେ ମଧ୍ୟ ଭ୍ରଷ୍ଟାଚାରର ଆରୋପ ଲାଗିଥାଆନ୍ତା: ମୋଦୀ

ଲକ୍ଷ୍ନୌ: ଉତ୍ତରପ୍ରଦେଶର ସମ୍ୱଲରେ କଳ୍କି ଧାମର ଭିତ୍ତିପ୍ରସ୍ତର ସ୍ଥାପନ ସମାରୋହରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ କହିଛନ୍ତି ଯେ, ଆଜି ଉତ୍ତରପ୍ରଦେଶର ମାଟିରୁ ଭକ୍ତି ଓ ଆଧ୍ୟାତ୍ମିକତାର ଆଉ ଏକ ସ୍ରୋତ ପ୍ରବାହିତ ହେଉଛି। ଆଜି ଅନ୍ୟ ଏକ ପବିତ୍ର ସ୍ଥାନର ଭିତ୍ତିପ୍ରସ୍ତର ସ୍ଥାପନ କରାଯାଉଛି। ମୋତେ ଭବ୍ୟ କଳ୍କି ଧାମର ମୂଳଦୁଆ ପକାଇବାର ସୌଭାଗ୍ୟ ମିଳିଛି | ମୋର ବିଶ୍ୱାସ ଅଛି ଯେ, କଳ୍କି ଧାମ ଭାରତୀୟ ବିଶ୍ଵାସର ଅନ୍ୟ ଏକ ମହାନ କେନ୍ଦ୍ର ଭାବରେ ଉଭା ହେବ। ଆଜିର ଭାରତ ବିକାଶ ପଥରେ ଦ୍ରୁତ ଗତିରେ ଆଗକୁ ବଢୁଛି। ଉତ୍ତରପ୍ରଦେଶର ସମ୍ୱଲରେ ଶ୍ରୀ କଳ୍କି ଧାମ ମନ୍ଦିରର ମୂଳଦୁଆ ପକାଇବା ସମାରୋହର ଅଂଶ ଗ୍ରହଣ କରିବା ସୌଭାଗ୍ୟର କଥା ।

ଏହି ଅବସରରେ ପ୍ରଧାନମନ୍ତ୍ରୀ ମୋଦୀ ବିରୋଧୀଙ୍କୁ ଟାର୍ଗେଟ କରି କହିଛନ୍ତି ଯେ, କଳିଯୁଗରେ ଯଦି ସୁଦାମା ଶ୍ରୀ କୃଷ୍ଣଙ୍କୁ ଚାଉଳ ଦେଇଥାନ୍ତେ ତେବେ ତାଙ୍କ ଭିଡିଓ ମଧ୍ୟ ଭାଇରାଲ ହୋଇଥାନ୍ତା । ଏହି ମାମଲାକୁ ନେଇ ସୁପ୍ରିମକୋର୍ଟରେ ମଧ୍ୟ ଏଲ ପିଟିସନ ଜାରି ହୋଇଥାଆନ୍ତା । ଯେଉଁଥିରେ ଭଗବାନ କୃଷ୍ଣଙ୍କ ଉପରେ ଭ୍ରଷ୍ଟାଚାରର ଆରୋପ ଲାଗିଥାଆନ୍ତା ଏବଂ ଏକ ନିର୍ଦ୍ଦେଶ ଜାରି କରାଯାଇଥାନ୍ତା ।

ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ କହିଛନ୍ତି, “ମୁଁ ପ୍ରମୋଦ କୃଷ୍ଣଙ୍କୁ ଏକ ରାଜନୈତିକ ବ୍ୟକ୍ତି ଭାବରେ ଜାଣିଥିଲି କିନ୍ତୁ କିଛି ଦିନ ପୂର୍ବରୁ ଯେତେବେଳେ ମୁଁ ତାଙ୍କୁ ଭେଟିଥିଲି, ସେତେବେଳେ ମୁଁ ଜାଣିଲି ଯେ ସେ ଏପରି ଧାର୍ମିକ-ଆଧ୍ୟାତ୍ମିକ କାର୍ଯ୍ୟରେ କେତେ ପରିଶ୍ରମ କରନ୍ତି। କଳ୍କି ମନ୍ଦିର ପାଇଁ ପୂର୍ବ ସରକାରଗୁଡିକ ସମୟରେ ସେମାନଙ୍କୁ ଏକ ଦୀର୍ଘ ଯୁଦ୍ଧ କରିବାକୁ ପଡୁଥିଲା ଏବଂ ଏପରିକି କୋର୍ଟର ଦ୍ଵାରସ୍ତ ମଧ୍ୟ ହେବାକୁ ପଡୁଥିଲା। ଆଜି ଆମ ସରକାରରେ ସେମାନେ ମାନସିକ ଶାନ୍ତି ସହିତ ଏହି କାର୍ଯ୍ୟ ଆରମ୍ଭ କରିବାରେ ସକ୍ଷମ ହୋଇଛନ୍ତି ବୋଲି କହିଛନ୍ତି ପ୍ରଧାନମନ୍ତ୍ରୀ ମୋଦୀ ।