କଟକ: ଓଡ଼ିଶା ହାଇକୋର୍ଟ ଏକ ଗୁରୁତ୍ଵପୂର୍ଣ୍ଣ ରାୟରେ ଦେଇଛନ୍ତି ଯେ, ମିଳିତ ସମ୍ପତ୍ତିରେ ଜଣେ ଅଂଶୀଦାର ଅନ୍ୟ ଅଂଶୀଦାରଙ୍କ ଅନୁମତି ବିନା ନିଜର ଅଂଶ ବିକ୍ରି କରିପାରିବେ। ଏହି ରାୟ ନ୍ୟାୟମୂର୍ତ୍ତି ଆନନ୍ଦ ଚନ୍ଦ୍ର ବେହେରା ଦେଇଛନ୍ତି। ଭଦ୍ରକ ଜିଲ୍ଲାର ବସୁଦେବପୁରର ସବ-ରେଜିଷ୍ଟ୍ରାର ପଦ୍ମିନୀ ବାରିକଙ୍କ ବିକ୍ରି ଦଲିଲ ଗ୍ରହଣ କରିବାକୁ ମନା କରିଥିଲେ। ପଦ୍ମିନୀ ଏହାକୁ ଚ୍ୟାଲେଞ୍ଜ କରି ହାଇକୋର୍ଟରେ ମାମଲା ଦାୟର କରିଥିଲେ। ବିଚାରପତି ଆନନ୍ଦ ଚନ୍ଦ୍ର ବେହେରା ଅଗଷ୍ଟ ୨୫ରେ ଦେଇଥିବା ରାୟରେ କହିଛନ୍ତି, ସମ୍ପତ୍ତି ହସ୍ତାନ୍ତର ଆଇନ, ୧୮୮୨ର ଧାରା ୪୪ ଅନୁସାରେ ଜଣେ ଅଂଶୀଦାର ଅନ୍ୟମାନଙ୍କ ଅନୁମତି ବିନା ନିଜର ଅଂଶ ବିକ୍ରି କରିପାରିବେ। ସବ-ରେଜିଷ୍ଟ୍ରାର ମୌଖିକ ଭାବେ ଦଲିଲ ଗ୍ରହଣ କରିବାକୁ ମନା କରିବା ଆଇନସଙ୍ଗତ ନୁହେଁ। ଯଦି ଦଲିଲ ନୋଟାରୀ ଅନୁଯାୟୀ ପଞ୍ଜୀକରଣ ପାଇଁ ଅଯୋଗ୍ୟ, ତେବେ ତା’ର କାରଣ ଲିଖିତ ଭାବେ ଦିଆଯିବା ଉଚିତ। ଏହା ଭାରତୀୟ ପଞ୍ଜୀକରଣ ଆଇନ, ୧୯୦୮ ଓ ଓଡ଼ିଶା ପଞ୍ଜୀକରଣ ନିୟମ, ୧୯୮୮ ଅନୁସାରେ ହେବା ଦରକାର। କୋର୍ଟ ନିର୍ଦ୍ଦେଶ ଅନୁସାରେ, ପଦ୍ମିନୀଙ୍କ ବିକ୍ରୟ ଦଲିଲ ପ୍ରଦାନ କଲେ ସବ-ରେଜିଷ୍ଟ୍ରାର ତାହା ଗ୍ରହଣ କରିବେ। ପଞ୍ଜୀକରଣ ପରେ ତିନି ଦିନ ମଧ୍ୟରେ ଦଲିଲ ଫେରାଇ ଦିଆଯିବ। ଏହି ରାୟ ଅଂଶୀଦାରଙ୍କ ଆଇନଗତ ଅଧିକାରକୁ ସୁଦୃଢ଼ କରିଛି। ତେବେ ଏହି ରାୟ ଆଗାମୀ ଦିନରେ ମିଳିତ ସମ୍ପତ୍ତିରେ ଅଂଶୀଦାରଙ୍କ ଅଧିକାରକୁ ଆହୁରି ସୁଦୃଢ଼ କରିବ ବୋଲି ଆଶା କରାଯାଉଛି।
Comments are closed, but trackbacks and pingbacks are open.