କେନ୍ଦ୍ର ସ୍ବରାଷ୍ଟ୍ର ମନ୍ତ୍ରୀଙ୍କ ଅଧ୍ୟକ୍ଷତାରେ ବନ୍ୟା ପରିଚାଳନା ପ୍ରସ୍ତୁତି ସମୀକ୍ଷା ପାଇଁ ଉଚ୍ଚସ୍ତରୀୟ ବୈଠକ
ନୂଆଦିଲ୍ଲୀ: କେନ୍ଦ୍ର ସ୍ବରାଷ୍ଟ୍ର ତଥା ସମବାୟ ମନ୍ତ୍ରୀ ଅମିତ ଶାହ ଆଜି ନୂଆଦିଲ୍ଲୀରେ ବନ୍ୟା ପରିଚାଳନା ପ୍ରସ୍ତୁତି ର ସମୀକ୍ଷା ପାଇଁ ଏକ ଉଚ୍ଚସ୍ତରୀୟ ବୈଠକରେ ଅଧ୍ୟକ୍ଷତା କରିଥିଲେ। ଦେଶରେ ବନ୍ୟା ବିପଦର ମୁକାବିଲା ପାଇଁ ଏକ ବ୍ୟାପକ ଏବଂ ସୁଦୂରପ୍ରସାରୀ ନୀତି ପ୍ରସ୍ତୁତ କରିବା ପାଇଁ ଦୀର୍ଘମିଆଦୀ ପଦକ୍ଷେପର ମଧ୍ୟ କେନ୍ଦ୍ର ସ୍ବରାଷ୍ଟ୍ରମନ୍ତ୍ରୀ ସମୀକ୍ଷା କରିଥିଲେ। ଏହି ବୈଠକରେ କେନ୍ଦ୍ର ଗୃହମନ୍ତ୍ରୀ ଗତବର୍ଷ ଅନୁଷ୍ଠିତ ବୈଠକରେ ନିଆଯାଇଥିବା ନିଷ୍ପତ୍ତି ଉପରେ ଗ୍ରହଣ କରାଯାଇଥିବା ପଦକ୍ଷେପର ସମୀକ୍ଷା କରିଥିଲେ। ଏହା ସହ ବନ୍ୟା ପରିଚାଳନା ପାଇଁ ସମସ୍ତ ଏଜେନ୍ସି ଦ୍ୱାରା ଗ୍ରହଣ କରାଯାଉଥିବା ନୂତନ ଜ୍ଞାନକୌଶଳ ଏବଂ ସେମାନଙ୍କ ନେଟୱାର୍କର ସମ୍ପ୍ରସାରଣ ଉପରେ ମଧ୍ୟ ବୈଠକରେ ଆଲୋଚନା ହୋଇଥିଲା । ଅମିତ ଶାହ ବରଫଖଣ୍ଡ ତରଳିବା ଜନିତ ବନ୍ୟା (ଜିଏଲଓଏଫ)ର ମୁକାବିଲା ପାଇଁ ପ୍ରସ୍ତୁତିର ସମୀକ୍ଷା କରିଥିଲେ । ଭାରତୀୟ ମହାକାଶ ଗବେଷଣା ସଂଗଠନ (ଇସ୍ରୋ) ଦ୍ୱାରା ବନ୍ୟା ଓ ଜଳ ପରିଚାଳନା ପାଇଁ ବିଭିନ୍ନ ଏଜେନ୍ସି ଦ୍ୱାରା ପ୍ରଦାନ କରାଯାଇଥିବା ଉପଗ୍ରହ ଚିତ୍ରର ସର୍ବୋତ୍ତମ ବ୍ୟବହାର ଉପରେ ସେ ଗୁରୁତ୍ୱାରୋପ କରିଥିଲେ । ପ୍ରଧାନମନ୍ତ୍ରୀ ଶ୍ରୀ ନରେନ୍ଦ୍ର ମୋଦୀଙ୍କ ନେତୃତ୍ୱରେ ଭାରତର ବିପର୍ଯ୍ୟୟ ପରିଚାଳନା ‘ଜିରୋ କାଜୁଆଲିଟି ଆଭିମୁଖ୍ୟ’ ସହିତ ଆଗେଇ ଚାଲିଛି ବୋଲି କେନ୍ଦ୍ର ସ୍ବରାଷ୍ଟ୍ରମନ୍ତ୍ରୀ ଏବଂ ସମବାୟ ମନ୍ତ୍ରୀ କହିଛନ୍ତି। ବନ୍ୟା ପରିଚାଳନା ପାଇଁ ଏନଡିଏମଏ ଜାରି କରିଥିବା ମାର୍ଗଦର୍ଶିକାକୁ ଠିକ୍ ସମୟରେ କାର୍ଯ୍ୟକାରୀ କରିବାକୁ ସ୍ବରାଷ୍ଟ୍ରମନ୍ତ୍ରୀ ସମସ୍ତ ରାଜ୍ୟ ଓ କେନ୍ଦ୍ର ଶାସିତ ଅଞ୍ଚଳକୁ ନିବେଦନ କରିଛନ୍ତି । ବନ୍ୟା ପୂର୍ବାନୁମାନରେ ବ୍ୟବହୃତ ସମସ୍ତ ଉପକରଣର ଆଧୁନିକୀକରଣ ପ୍ରକ୍ରିୟା ଯଥାଶୀଘ୍ର ଶେଷ କରିବାକୁ ସେ ଭାରତୀୟ ପାଣିପାଗ ବିଭାଗ (ଆଇଏମଡି) ଏବଂ କେନ୍ଦ୍ରୀୟ ଜଳ ଆୟୋଗ (ସିଡବ୍ଲ୍ୟୁସି)କୁ ନିର୍ଦ୍ଦେଶ ଦେଇଛନ୍ତି। ସିକ୍କିମ୍ ଓ ମଣିପୁରରେ ସାମ୍ପ୍ରତିକ ବନ୍ୟା ସମ୍ପର୍କରେ ବିସ୍ତୃତ ଅଧ୍ୟୟନ କରି ଗୃହ ମନ୍ତ୍ରଣାଳୟକୁ ରିପୋର୍ଟ ପ୍ରଦାନ କରିବାକୁ ଶ୍ରୀ ଶାହ ସଂପୃକ୍ତ ବିଭାଗଗୁଡ଼ିକୁ ନିର୍ଦ୍ଦେଶ ଦେଇଛନ୍ତି। ସମସ୍ତ ପ୍ରମୁଖ ଡ୍ୟାମର ବନ୍ୟା ଗେଟ୍ ଗୁଡ଼ିକ ଯେପରି ଭଲ ଅବସ୍ଥାରେ ରହିବ ସେଥିପ୍ରତି ଦୃଷ୍ଟି ଦେବାକୁ ସେ ନିର୍ଦ୍ଦେଶ ଦେଇଛନ୍ତି। ଶ୍ରୀ ଶାହ କହିଛନ୍ତି ଯେ ସିଡବ୍ଲୁସିର ବନ୍ୟା ନିରୀକ୍ଷଣ କେନ୍ଦ୍ର ଗୁଡ଼ିକ ଆମର ଆବଶ୍ୟକତା ଏବଂ ଅନ୍ତର୍ଜାତୀୟ ମାନର ହେବା ଉଚିତ୍ । କେନ୍ଦ୍ର ସ୍ବରାଷ୍ଟ୍ରମନ୍ତ୍ରୀ କହିଛନ୍ତି ଅସମୟରେ ଜଳ ପ୍ରବାହିତ ହେଉଥିବା ନଦୀଗୁଡ଼ିକରେ ଅଧିକ ମାଟି କ୍ଷୟ ଓ ମାଟି ଖସିବା ଆଶଙ୍କା ରହିଛି, ଯାହା ଫଳରେ ବନ୍ୟା ପରିସ୍ଥିତି ସୃଷ୍ଟି ହୋଇଥାଏ। ଉନ୍ନତ ବନ୍ୟା ପରିଚାଳନା ପାଇଁ ନଦୀଗୁଡ଼ିକର ଜଳସ୍ତରର ପୂର୍ବାନୁମାନ ବ୍ୟବସ୍ଥାକୁ ଉନ୍ନତ କରିବା ପାଇଁ ପ୍ରୟାସ କରିବାକୁ ସେ ନିର୍ଦ୍ଦେଶ ଦେଇଛନ୍ତି। ଶ୍ରୀ ଶାହ କହିଛନ୍ତି ଯେ ବନ୍ୟା ପରିସ୍ଥିତିରେ ରାସ୍ତା ଜଳମଗ୍ନ ହେବାର ମୁକାବିଲା ପାଇଁ ପ୍ରାକୃତିକ ଡ୍ରେନେଜ୍ ବ୍ୟବସ୍ଥା ରାସ୍ତା ନିର୍ମାଣର ଡିଜାଇନର ଏକ ଅବିଚ୍ଛେଦ୍ୟ ଅଙ୍ଗ ହେବା ଉଚିତ୍ । ଶ୍ରୀ ଶାହ କହିଛନ୍ତି ଯେ ଉତ୍ତର-ପୂର୍ବରେ ଅତି କମରେ ୫୦ଟି ବୃହତ ପୋଖରୀ ନିର୍ମାଣ କରାଯିବା ଉଚିତ ଯାହାଦ୍ୱାରା ବ୍ରହ୍ମପୁତ୍ର ନଦୀର ଜଳକୁ ଅନ୍ୟତ୍ର ସ୍ଥାନାନ୍ତର କରାଯାଇ ସେହି ପୋଖରୀଗୁଡିକରେ ସଂରକ୍ଷଣ କରାଯାଇପାରିବ । ଏହା ଦ୍ବାରା ସେହି ଅଞ୍ଚଳରେ କମ୍ ଖର୍ଚ୍ଚରେ କୃଷି, ଜଳସେଚନ ଓ ପର୍ଯ୍ୟଟନର ବିକାଶ ହେବା ସହ ବନ୍ୟା ମୁକାବିଲା ରେ ସହାୟକ ହେବ ଏବଂ ଶେଷରେ ସ୍ଥାନୀୟ ଅର୍ଥନୀତି ଉପକୃତ ହେବ ବୋଲି ସେ କହିଛନ୍ତି। ଶ୍ରୀ ଅମିତ ଶାହ ଜାତୀୟ ବିପର୍ଯ୍ୟୟ ପରିଚାଳନା ପ୍ରାଧିକରଣ (ଏନଡିଏମଏ) ଏବଂ ପରିବେଶ, ଜଙ୍ଗଲ ଓ ଜଳବାୟୁ ପରିବର୍ତ୍ତନ ମନ୍ତ୍ରଣାଳୟକୁ ଜଙ୍ଗଲରେ ନିଆଁ ଲାଗିବା ଘଟଣାକୁ ରୋକିବା ପାଇଁ ଉପଯୁକ୍ତ ସତର୍କତାମୂଳକ ପଦକ୍ଷେପ ଗ୍ରହଣ କରିବାକୁ ନିର୍ଦ୍ଦେଶ ଦେଇଛନ୍ତି । ଏଥିପାଇଁ ନିୟମିତ ଭାବେ ଯେଉଁସବୁ ଅଞ୍ଚଳରେ ବାରମ୍ବାର ଅଗ୍ନକାଣ୍ଡ ଘଟୁଛି ତାହାକୁ ଚିହ୍ନଟ କରିବା, ଶୁଖିଲା ପତ୍ର ହଟାଇବା ଏବଂ ସ୍ଥାନୀୟ ବାସିନ୍ଦା ଓ ବନ କର୍ମଚାରୀଙ୍କ ସହ ସମୟ ସମୟରେ ମକ୍ ଡ୍ରିଲ୍ କରିବା ଉପରେ ସ୍ବରାଷ୍ଟ୍ରମନ୍ତ୍ରୀ ଗୁରୁତ୍ୱାରୋପ କରିଥିଲେ। ଏହା ସହ ସେହି ସ୍ଥାନରେ ବାରମ୍ବାର ଜଙ୍ଗଲରେ ନିଆଁ ଲାଗିବା ଘଟଣାର ବିଶ୍ଳେଷଣ କରିବାକୁ ମଧ୍ୟ କହିଥିଲେ। ଜଙ୍ଗଲରେ ନିଆଁ ଲାଗିବା ଘଟଣାର ମୁକାବିଲା ପାଇଁ ଏକ ବିସ୍ତୃତ ମାନୁଆଲ ପ୍ରସ୍ତୁତ କରିବାକୁ ସ୍ବରାଷ୍ଟ୍ରମନ୍ତ୍ରୀ ଏନଡିଏମଏକୁ କହିଛନ୍ତି। ବଜ୍ରପାତ ସମ୍ପର୍କରେ ଆଇଏମଡିର ସତର୍କ ସୂଚନାକୁ ଏସଏମଏସ, ଟିଭି, ଏଫଏମ ରେଡିଓ ଏବଂ ଅନ୍ୟାନ୍ୟ ମାଧ୍ୟମରେ ଠିକ୍ ସମୟରେ ଜନସାଧାରଣଙ୍କ ନିକଟରେ ପହଞ୍ଚାଇବାକୁ କେନ୍ଦ୍ର ସ୍ବରାଷ୍ଟ୍ରମନ୍ତ୍ରୀ ନିର୍ଦ୍ଦେଶ ଦେଇଛନ୍ତି । ବିଭିନ୍ନ ବିଭାଗ ଦ୍ୱାରା ବିକଶିତ ପାଣିପାଗ, ବୃଷ୍ଟିପାତ ଏବଂ ବନ୍ୟା ସତର୍କସୂଚନା ସମ୍ବନ୍ଧୀୟ ଆପସ୍ଗୁଡିକୁ ସମନ୍ୱିତ କରିବା ର ଆବଶ୍ୟକତା ଉପରେ ସେ ଗୁରୁତ୍ୱାରୋପ କରିଥିଲେ, ଯାହାଦ୍ୱାରା ଏହାର ସୁଫଳ ନିର୍ଦ୍ଧାରିତ ଲୋକଙ୍କ ପାଖରେ ପହଞ୍ଚିପାରିବ । ଯେହେତୁ ବନ୍ୟା ସମେତ ଯେକୌଣସି ବିପର୍ଯ୍ୟୟ ସମୟରେ ଗୋଷ୍ଠି ହିଁ ପ୍ରଥମ ପ୍ରଭାବିତ ହୋଇଥାନ୍ତି, ତେଣୁ ବିଭିନ୍ନ ଏଜେନ୍ସି ଦ୍ୱାରା ପରିଚାଳିତ ଗୋଷ୍ଠୀ ସଚେତନତା କାର୍ଯ୍ୟକ୍ରମରେ ସମନ୍ୱୟ ଓ ସମନ୍ୱୟ ରହିବା ଉଚିତ, ଯାହାଦ୍ୱାରା ଏହାର ସର୍ବାଧିକ ପ୍ରଭାବ ପଡ଼ିପାରିବ ବୋଲି ଶ୍ରୀ ଶାହ ନିର୍ଦ୍ଦେଶ ଦେଇଥିଲେ। ବୈଠକରେ ଆଇଏମଡି, ସିଡବ୍ଲ୍ୟୁସି, ଏନଡିଆରଏଫ ଓ ଏନଡିଏମଏ ବିସ୍ତୃତ ତଥ୍ୟ ଉପସ୍ଥାପନା କରିଥିଲେ । ଗତବର୍ଷ ଅନୁଷ୍ଠିତ ବନ୍ୟା ସମୀକ୍ଷା ବୈଠକରେ କେନ୍ଦ୍ର ଗୃହମନ୍ତ୍ରୀ ଦେଇଥିବା ନିର୍ଦ୍ଦେଶକ୍ରମେ ନିଆଯାଇଥିବା ପଦକ୍ଷେପ ସମ୍ପର୍କରେ ମଧ୍ୟ ସମ୍ପୃକ୍ତ ବିଭାଗ ସୂଚନା ଦେଇଥିଲେ। ଚଳିତ ମୌସୁମୀ ଋତୁ ପାଇଁ ସେମାନଙ୍କ ପ୍ରସ୍ତୁତି ଏବଂ ଭବିଷ୍ୟତ କାର୍ଯ୍ୟ ଯୋଜନା ବିଷୟରେ ମଧ୍ୟ ସେମାନେ ଅବଗତ କରାଇଥିଲେ। କେନ୍ଦ୍ର ଜଳଶକ୍ତି ମନ୍ତ୍ରୀ ସିଆର ପାଟିଲ, ଗୃହ ରାଷ୍ଟ୍ରମନ୍ତ୍ରୀ ନିତ୍ୟାନନ୍ଦ ରାୟ, କେନ୍ଦ୍ର ସ୍ବରାଷ୍ଟ୍ର ସଚିବ, ନଦୀ ବିକାଶ ଏବଂ ଗଙ୍ଗା ପୁନରୁଦ୍ଧାର, ଭୂ ବିଜ୍ଞାନ, ପରିବେଶ, ଜଙ୍ଗଲ ଓ ଜଳବାୟୁ ପରିବର୍ତ୍ତନ, ସଡ଼କ ପରିବହନ ଏବଂ ରାଜପଥ ମନ୍ତ୍ରଣାଳୟ ଏବଂ ବିଭିନ୍ନ ବିଭାଗର ସଚିବ, ରେଳବୋର୍ଡ ଅଧ୍ୟକ୍ଷ, ଏନଡିଏମଏର ସଦସ୍ୟ ଏବଂ ବିଭାଗୀୟ ମୁଖ୍ୟ, ଏନଡିଆରଏଫ ଏବଂ ଆଇଏମଡିର ମହାନିର୍ଦ୍ଦେଶକ, ଏନ୍ଏଚ୍ଏଆଇ ଅଧ୍ୟକ୍ଷ ଏବଂ ସିଡବ୍ଲ୍ୟୁସି ସମେତ ଅନ୍ୟାନ୍ୟ ସଂପୃକ୍ତ ବିଭାଗର ବରିଷ୍ଠ ଅଧିକାରୀମାନେ ବୈଠକରେ ଉପସ୍ଥିତ ଥିଲେ।
