ମହାକୁମ୍ଭରେ ଭୀଷଣ ଅଗ୍ନିକାଣ୍ଡ, ଜଳିଗଲା ୨୦ ଶିବିର, ସମସ୍ତ ଶ୍ରଦ୍ଧାଳୁ ସୁରକ୍ଷିତ

ପ୍ରୟାଗରାଜ : ପ୍ରୟାଗରାଜ ମହାକୁମ୍ଭ ମେଳା ଅଞ୍ଚଳରେ ରବିବାର ଅପରାହ୍ଣରେ ଏକ ଭୟଙ୍କର ଅଗ୍ନିକାଣ୍ଡ ଘଟିଛି। ଏଥିରେ ପ୍ରାୟ ୧୮ରୁ ୨୦ଟି ଷ୍ଟଲ୍ ଜଳିଯାଇଥିବା କୁହାଯାଉଛି। ତେବେ ଏହି ଅଘଟଣରେ କେହି ମୃତାହତ ହୋଇନଥିବା ପ୍ରଶାସନ ପକ୍ଷରୁ ସ୍ପଷ୍ଟ କରାଯାଇଛି। ରୋଷେଇ ପାଇଁ ରଖାଯାଇଥିବା ଏକ ଗ୍ୟାସ୍ ସିଲିଣ୍ଡର ହଠାତ୍ ବିସ୍ଫୋରଣ ହେବାରୁ ନିଆଁ ଲାଗିଯାଇଥିଲା ବୋଲି କୁହାଯାଇଛି। ଅନ୍ୟପକ୍ଷେ ରିପୋର୍ଟ ଲେଖାହେବା ବେଳକୁ ନିଆଁକୁ ସମ୍ପୂର୍ଣ୍ଣ ନିୟନ୍ତ୍ରଣ କରାଯାଇପାରିଥିବା ସୂଚନା ମିଳିଛି। ଅଗ୍ନିଶମ ବିଭାଗ ସହ ଏନ୍‌ଡିଆର୍‌ଏଫ୍ ଏବଂ ଏସ୍‌ଡିଆର୍‌ଏଫ୍ ଟିମ୍ ମିଳିତ ଭାବେ ନିଆଁ ଲିଭାଇବା କାର୍ଯ୍ୟକୁ ତ୍ୱରାନ୍ୱିତ କରିଥିଲେ। ଯୋଗୀ ଆଦିତ୍ୟନାଥ ଏହି ଅଗ୍ନିକାଣ୍ଡ ଘଟଣାକୁ ଗୁରୁତ୍ୱର ସହିତ ନେଇ ନିଜେ ଘଟଣାସ୍ଥଳ ପରିଦର୍ଶନ କରି ଅଧିକାରୀ ଓ ଅଗ୍ନିଶମ ଟିମ୍ ସହ କଥା ହେବା ପରେ ତଦନ୍ତ ନିର୍ଦ୍ଦେଶ ଦେଇଛନ୍ତି। ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ମଧ୍ୟ ଯୋଗୀ ଆଦିତ୍ୟନାଥଙ୍କ ସହ ଫୋନ୍ ଯୋଗେ କଥାହୋଇ ମହାକୁମ୍ଭରେ ଅଗ୍ନିକାଣ୍ଡ ସମ୍ପର୍କରେ ପଚାରି ବୁଝିଛନ୍ତି। କୁମ୍ଭମେଳାର ମୁଖ୍ୟ ଅଗ୍ନିଶମ ଅଧିକାରୀ ପ୍ରମୋଦ ଶର୍ମା କହିଛନ୍ତି, ମହାକୁମ୍ଭ ଟେଣ୍ଟ ସିଟିର (ମୋଟ୍ ୨୪ଟି ସେକ୍ଟର୍‌) ସେକ୍ଟର ୧୯ରେ ଏହି ଅଗ୍ନିକାଣ୍ଡ ଘଟିଛି। ଏଠାରେ ଥିବା ଗୀତା ପ୍ରେସ୍ ଟେଣ୍ଟରେ ଅପରାହ୍ଣ ପ୍ରାୟ ୪.୩୦ ସମୟରେ ସର୍ବପ୍ରଥମେ ନିଆଁ ଲାଗିଥିଲା ଏବଂ କ୍ଷଣକ ମଧ୍ୟରେ ଏହା ଅନ୍ୟ ଟେଣ୍ଟଗୁଡ଼ିକୁ ସମ୍ପ୍ରସାରିତ ହୋଇଯାଇଥିଲା। ତେବେ ତମ୍ବୁରେ ଲାଗିଥିବା ନିଆଁକୁ ଆୟତ୍ତ କରିବା ପାଇଁ ୧୫ଟି ଦମକଳ ବାହିନୀ ନିୟୋଜିତ ହୋଇଥିଲେ। ପ୍ରୟାଗରାଜ ଜିଲ୍ଲା ମାଜିଷ୍ଟ୍ରେଟ୍ ରବୀନ୍ଦ୍ର କୁମାର କହିଛନ୍ତି ଯେ ଘଟଣାସ୍ଥଳରୁ ସମସ୍ତ ସିଲିଣ୍ଡର୍‌ଗୁଡ଼ିକୁ ହଟାଇ ଦିଆଯାଇଛି ଏବଂ ଯୁଦ୍ଧକାଳୀନ ଭିତ୍ତିରେ ଏସବୁ ସ୍ଥାନରେ ସଫେଇ କାର୍ଯ୍ୟ ଶେଷ ସହ ନୂଆ ଟେଣ୍ଟ ନିର୍ମାଣ କାର୍ଯ୍ୟ ଜାରି କରାଯିବ। ଜାନୁଆରୀ ୧୩ ତାରିଖରୁ ଆରମ୍ଭ ହୋଇଥିବା ମହାକୁମ୍ଭ ଫେବୃଆରୀ ୨୬ ତାରିଖ ପର୍ଯ୍ୟନ୍ତ ଚାଲିବ। ଜାନୁଆରୀ ୧୮ତାରିଖ ସୁଦ୍ଧା ମହାକୁମ୍ଭ ୨୦୨୫ରେ ୭.୨ କୋଟିରୁ ଅଧିକ ଶ୍ରଦ୍ଧାଳୁ ସଙ୍ଗମ ତ୍ରିବେଣୀରେ ସ୍ନାନ କରିଛନ୍ତି। ରବିବାର ୪୬.୯୫ ଲକ୍ଷରୁ ଅଧିକ ଶ୍ରଦ୍ଧାଳୁ ସ୍ନାନ କରିଥିବା ପ୍ରୟାଗରାଜ ପ୍ରଶାସନ ପକ୍ଷରୁ ସୂଚନା ଦିଆଯାଇଛି।