ଲଙ୍କା ମରିଚ ଚାଷ

ଆମ ଦେଶର ପ୍ରାୟ ସବୁ ରାଜ୍ୟରେ ଲଙ୍କାମରିଚ ଚାଷ କରାଯାଏ । ତେବେ ଆନ୍ଧ୍ରପ୍ରଦେଶ, ମହାରାଷ୍ଟ୍ର, କର୍ଣ୍ଣାଟକ ଓ ତାମିଲନାଡ଼ୁ ରାଜ୍ୟରେ ଏହା ବିଶେଷ ଭାବେ ଚାଷ କରାଯାଏ । ଲଙ୍କାମରିଚ ପ୍ରଥମେ ଦକ୍ଷିଣ ଆମେରିକାରେ ଜନ୍ମ ନେଇଛି । ପେରୁଠାରେ ମିଳିଥିବା ପ୍ରାଗ୍‌ଐତିହାସିକ ଅବଶେଷରୁ ଲଙ୍କାମରିଚ ବିଷୟରେ ତଥ୍ୟ ମିଳିଛି । ଆମ ରାଜ୍ୟରେ ପ୍ରାୟ ୭୬,୦୦୦ ହେକ୍ଟର ଜମିରେ ଲଙ୍କାମରିଚ ଚାଷ କରାଯାଇଥାଏ ।
ଲଙ୍କାମରିଚକୁ ବିଭିନ୍ନ ଉଦ୍ଦେଶ୍ୟରେ ବ୍ୟବହାର କରାଯାଇଥାଏ । ଏହାକୁ ମସଲା, ଆଚାର, ସସ୍ ଆକାରରେ ଖିଆଯାଏ । କଞ୍ଚାଲଙ୍କାରେ ଶତକଡ଼ଶ ୮୫.୭ ଭାଗ ଜଳୀୟ ଅଂଶ ରହିଥାଏ । ଏହାଛଡ଼ଶ ଶତକଡ଼ା ୨.୯ ଭାଗ ପୁଷ୍ଟିସାର, ୧ ଭାଗ ଖଣିଜ ଲବଣ. ୬.୮ ଭାଗ ତନ୍ତୁ ଜାତୀୟ ପଦାର୍ଥ ଓ ୦.୬ ଭାଗ ସ୍ନେହସାର ଥାଏ । ପ୍ରତି ଶହେ ଗ୍ରାମ କଞ୍ଚା ଲଙ୍କାରେ ୧୧୧ ମିଲିଗ୍ରାମ ଜୀବନିକା ଥିବା ଜଣାଯାଏ । ଲଙ୍କାମରିଚରେ କାପସାସିନ୍ ନାମକ ଏକ ପଦାର୍ଥ ଥିବା ଯୋଗୁଁ ଏହା ରାଗ ଲାଗେ ।
ଦୁଇଟି ଉଦ୍ଦେଶ୍ୟରେ ଲଙ୍କା ଚାଷ କରାଯାଇଥାଏ । ସେଗୁଡ଼ିକ ହେଲା – କଞ୍ଚାଲଙ୍କା ଓ ଶୁଖିଲା ଲଙ୍କା । ଏଥିପାଇଁ ଭିନ୍ନଭିନ୍ନ କିସମ ବାହାର କରାଯାଇଛି । କଞ୍ଚାଲଙ୍କା ଅମଳ ପାଇଁ ୮୫-୯୦ ଦିନ ଲାଗେ । କିନ୍ତୁ ଶୁଖିଲା ଲଙ୍‌କା ୧୨୫-୧୪୫ ଦିନରେ ଅମଳ ହୋଇଥାଏ । କଞ୍ଚାଲଙ୍କା ପାଇଁ ଉପଯୁକ୍ତ କିସମଗୁଡ଼ିକ ହେଲା ପନ୍ଥସି୧, କଳା ସୂର୍ଯ୍ୟମୁଖୀ, ଉତ୍କଳ ଆଭା, ଉତ୍କଳ ରାଗିଣୀ ଇତ୍ୟାଦି । ସେହିପରି ଲାମ ଏକ୍ସ-୨୩୫, ପୁଷାଜ୍ୱାଳା, ଉତ୍କଳ ରଶ୍ମି, ସିନ୍ଦୁର, ପୁଷା ସଦାବାହାର କିସମଗୁଡ଼ିକ ଶୁଖିଲା ଲଙ୍କା ପାଇଁ ଚାଷ କରାଯାଇପାରିବ । ସ୍କର ଜାତୀୟ କିସମ ହିସାବରେ ତେଜସ୍ୱିନୀ, ଅଗ୍ନିବାଣ, ଅଗ୍ନି, ସୂର୍ଯ୍ୟ, ସୁଇଟ୍ ଗୋଲଡ୍ ସମର, ଚମ୍ପିଆନ୍ ଆଦି ବିହନ ବ୍ୟବହାର କରାଯାଇପାରେ ।
ବାଲିଆ ଦୋରସା ଓ ପଟୁ ପଡ଼ିଥିବା ନିଗିଡ଼ା ଉର୍ବର ଜମି ଲଙ୍କାମରିଚ ଚାଷ ପାଇଁ ଭଲ । ସନ୍ତସନ୍ତିଆ ଜମିରେ ଗଛ ଭଲ ବଢ଼େନାହିଁ । ଅଧିକ ଅମ୍ଳୀୟ ଜମିରେ ଲଙ୍କା ଭଲ ହୁଏନାହିଁ । ଆମ ରାଜ୍ୟରେ ବର୍ଷସାରା ଲଙ୍କା ଚାଷ କରାଯାଇ ପାରିବ । ଶୀତ ଓ ଖରାଦିନେ ପାଣି ମଡ଼ାଇବାର ସୁବିଧା ଥିବା ଦରକାର । ବାୟୁମଣ୍ଡଳର ଉତ୍ତାପ ୨୦-୨୫ ଡିଗ୍ରୀ ସେଲସିୟସ୍ ରହିଲେ ଲଙ୍କାଗଛ ଭଲ ବଢ଼େ । ଜୁନ୍‌-ଜୁଲାଇ ମାସ, ଅକ୍ଟୋବର ଏବଂ ଫେବୃୟାରୀ ମାସରେ ଲଙ୍କା ଲଗାଯାଇ ପାରିବ । ଅତ୍ୟଧିକ ଶୀତ ପଡ଼ୁଥିଲେ ଲଙ୍କାଗଛ ଭଲ ବଢ଼ିପାରେ ନାହିଁ ।
ଜମିକୁ ଭଲ ଭାବେ ହଳ କରି ମାଟି ଗୁଣ୍ଡ କରିଦେବା ଉଚିତ । ଏକ ଏକର ପାଇଁ ପ୍ରାୟ ୩୦୦ ଗ୍ରାମ ମଞ୍ଜି ଦରକାର ହୁଏ । ସଙ୍କର ଜାତୀୟ କିସମ ପାଇଁ ୧୦୦ ଗ୍ରାମ ମଞ୍ଜି ଯଥେଷ୍ଟ ହୋଇଥାଏ । ବିହନକୁ କିଲୋଗ୍ରାମ ପିଛା ୩ ଗ୍ରାମ ଥିରାମ ବା ଦେଢ଼ ଗ୍ରାମ ବାଭିଷ୍ଟିନ୍ ସହ ଗୋଳାଇ ବିଶୋଧନ କରାଯାଏ । ବିହନକୁ ତଳି ଘରାରେ ପକାଯାଇ ଚାରା ଉତ୍ତାରିବାକୁ ହୁଏ । ତଳିଗୁଡ଼ିକ ଚାରି ସପ୍ତାହର ହୋଇଗଲେ ରୋଇବା ପାଇଁ ଉପଯୁକ୍ତ ହୁଏ । ଧାଡ଼ିକୁ ଧାଡ଼ି ୬୦ ସେଣ୍ଟିମିଟର ଓ ଗଛକୁ ଗଛ ୩୦-୪୫ ସେଣ୍ଟିମିଟର ବ୍ୟବଧାନରେ ତଳି ରୋଇବା ଦରକାର ।
ଅଧିକ ଅମଳ ପାଇବା ପାଇଁ ଏକର ପ୍ରତି ୪-୫ ଟନ୍ ସଢ଼ା ଗୋବର ଖତ ପ୍ରୟୋଗ କରିବା ଉଚିତ । ଏହା ବ୍ୟତୀତ ଚାରା ଲଗାଇଲା ବେଳୋ ଏକର ପ୍ରତି ୨୨ କିଲୋଗ୍ରାମ ଯବକ୍ଷାର, ୨୮ କିଲୋଗ୍ରାମ ଫସଫରସ୍ ଓ ୩୦ କିଲୋଗ୍ରାମ ପଟାସ ସାର ପ୍ରୟୋଗ କରିବା ଉଚିତ । ଏଥିପାଇଁ ଏକର ପ୍ରତି ୧୭୫ କି.ଗ୍ରା. ସିଙ୍ଗଲ ସୁପର ଫସଫେଟ୍ ଓ ୫୦ କି.ଗ୍ରା. ମ୍ୟୁରେଟ୍ ଅଫ୍ ପଟାସ ସହିତ ୪୮ କି.ଗ୍ରା. ୟୁରିଆ ବା ୮୮ କି.ଗ୍ରା. କାଲସିଅମ୍ ଆମୋନିଅମ୍ ନାଇଟ୍ରେଟ୍ ବା ୧୧୦ କି.ଗ୍ରା. ଆମୋନିଆ ସଲଫେଟ୍ ସାର ମିଶାଇ ବ୍ୟବହାର କରିବାକୁ ପଡ଼ିବ । ଏହା ବଦଳରେ ଏକର ପ୍ରତି ୧୪୭ କି.ଗ୍ରା. ଶ୍ୟାମଳା, ୩୭ କି.ଗ୍ରା. ସିଙ୍ଗଲ ସୁପର ଫସଫେଟ୍ ଓ ୧୩ କି.ଗ୍ରା. ମ୍ୟୁରେଟ୍ ଅଫ୍ ପଟାସ ଦରକାର । ଏା ବଦଳରେ ଏକର ପ୍ରି ୩୮ କି.ଗ୍ରା. ସିଙ୍ଗଲ ସୁପର ସଫେଟ୍ ଓ ୫୦ କି.ଗ୍ରା. ମ୍ୟୁରେଟ୍ ଅଫ୍ ପଟାସ ସହ ୭୯ କି.ଗ୍ରା. ଗ୍ରୋମୋର (୨୮-୨୮-୦) କିମ୍ବା ୧୧୦ କି.ଗ୍ରା. ସୁଫଳା (୨୦-୨୦-୦) ସାର ମିଶାଇ ବ୍ୟବହାର କରାଯାଇ ପାରିବ । ଏହା ବଦଳରେ ଏକର ପ୍ରତି ୧୦୮ କି.ଗ୍ରା. ଏନ୍‌ପିକେ (୧୦-୨୬-୨୬), ୨୪ କି.ଗ୍ରା. ୟୁରିଆ ଓ ୩ କି.ଗ୍ରା. ମ୍ୟୁରେଟ୍ ଅଫ୍ ପଟାସ ଦରକାର ହେବ । ଏହା ବଦଳରେ ଏକର ପ୍ରତି ୮୦ କି.ଗ୍ରା. ଗ୍ରୋମୋର (୧୪-୩୫-୧୪), ୨୩ କି.ଗ୍ରା. ୟୁରିଆ ଓ ୩୧ କି.ଗ୍ରା. ମ୍ୟୁରେଟ୍ ଅଫ୍ ପଟାସ ଆବଶ୍ୟକ ହେବ । ସାରୁଗୁଡ଼ିକୁ ମାଟି ସହ ଭଲ ଭାବେ ମିଶାଇ ଦେବା ଆବଶ୍ୟକ । ଚାରା ଲଗାଇବାର ଦେଢ଼ ମାସ ପରେ ଏକର ପିଛା ୨୨ କି.ଗ୍ରା. ଯବକ୍ଷାର ବା ୪୮ କି.ଗ୍ରା. ୟୁରିଆ ସାର ପ୍ରୟୋଗ କରି ହୁଡ଼ା ଟେକିଦେବା ଉଚିତ ।
ଘାସ ଦମନ ପାଇଁ ନିୟମିତ ବ୍ୟବଧାନରେ ଜମିକୁ ଖୁସାଇ ଦେବା ଦରକାର । ବିଶେଷ କରି ବର୍ଷାଦିନିଆ ଫସଲରେ ଘାସ ଦମନ କରିବା ଉଚିତ । ଚାରା ଲଗାଇବାର ଦେଢ଼ ମାସ ପରେ ଯବକ୍ଷାର ସାର ପ୍ରୟୋଗ କରି ହୁଡ଼ା ଟେକିଦେବା ଆବଶ୍ୟକ । ବର୍ଷାଦିନିଆ ଫସଲରେ ଜଳ ନିଷ୍କାସନ ବ୍ୟବସ୍ଥା କରିବା ଆବଶ୍ୟକ । ଶୀତ ଓ ଖରାଦିନେ ପାଣି ମଡ଼ାଇବା ଉଚିତ । ମାଟିର ଅବସ୍ଥା ଦେଖି ୧୦-୧୨ ଦିନ ଅନ୍ତରରେ ପାଣି ମଡ଼ାଇବା ଆବଶ୍ୟକ । ଗଛରେ ଫୁଲ ଧରିବା ବେଳେ ପାଣି ଅଭାବ ହେଲେ ଅମଳ କମି ଯାଇଥାଏ । ଲଙ୍କାମରିଚ ଫସଲ ପାଇଁ ପ୍ରାୟ ୭୫ ସେଣ୍ଟିମିଟର ଜଳସେଚନ ଦରକାର ହୋଇଥାଏ । ଏହି ଫସଲରେ ହାରାହାରି ୧୦-୧୨ ଥର ପାଣି ମଡ଼ାଇବା ଆବଶ୍ୟକ ।
ଲଙ୍କାମରିଚ ଫସଲରେ ଥିପ୍‌ସ ପୋକ ଲାଗିଲେ ଗଛ ପୋଡ଼ାଳିଆ ଦେଖାଯାଏ । ପତ୍ର ମୋଡ଼ି ହୋଇ ହଳଦିଆ ପଡ଼ିଯାଏ । ସେମାନଙ୍କୁ ଦମନ କରିବା ପାଇଁ ଏକର ପିଛା ୪୦୦ ମିଲିଲିଟର କୁଇନାଲଫସ୍ ବା ମାଲାଥିଅନ ଔଷଧକୁ ୨୦୦ ଲିଟର ପାଣି ସହ ମିଶାଇ ସ୍ପ୍ରେ କରିବା ଉଚିତ ।
ଲଙ୍କାମରିଚ ଫସଲରେ ବୀଜାଣୁଜନିତ ଝାଉଁଳା ରୋଗ ଦେଖାଗଲେ ଗଛ ଝାଉଁଳି ମରିଯାଏ । ଏହାକୁ ଦମନ କରିବା ପାଇଁ ଏକର ପିଛା ୫୦୦ ଗ୍ରାମ ବ୍ଲାଇଟକ୍‌ସ-୫୦ ସହ ୨୦୦ ଗ୍ରାମ ପ୍ଲାଣ୍ଟୋମାଇସିନ୍ ମିଶାଇ ସ୍ପ୍ରେ କରାଯାଇପାରେ । ଛୋଟପତ୍ର ରୋଗ ହେଲେ ଗଛଗୁଡ଼ିକୁ ଉପାଡ଼ି ଦେବା ଦରକାର । ଏହି ରୋଗର ବାହକ ଧଳାମାଛିକୁ ଦମନ କରିବା ପାଇଁ ମାଲାଥିଅନ ବା କ୍ଲୋରୋପାଇରିଫସ୍ ଔଷଧକୁ ଏକର ପିଛା ୪୦୦ ମିଲିଲିଟର ହିସାବରେ ସ୍ପ୍ରେ କରାଯାଇପାରେ ।
ପାକଳ ହେଲେ ଲଙ୍କା ଅମଳ କରାଯାଏ । ଏକ ଏକର ଜମିରୁ ୨୦-୨୨ କ୍ୱିଣ୍ଟାଲ କଞ୍ଚାଲଙ୍କା ମିଳିଥାଏ । ଶୁଖିôଲା ଲଙ୍କା ଏକର ପିଛା ୮-୧୦ କ୍ୱିଣ୍ଟାଲ ଅମଳ ହୋଇଥାଏ । ବିହନ ପାଇଁ ଚାଷ କରୁଥିଲେ ୧୦୦ ମିଟର ବ୍ୟବଧାନ ମଧ୍ୟରେ ଅନ୍ୟ କିସମର ଲଙ୍କା ରହିବା ଉଚିତ ନୁହେଁ । ଏକ ଏକର ଜମିରୁ ୨୦୦-୨୫୦ କିଲୋଗ୍ରାମ ଲଙ୍କା ମଞ୍ଜି ମିଳିଥାଏ । ଏକ କିଲୋଗ୍ରାମ ଶୁଖିଲା ଲଙ୍କାରୁ ପ୍ରାୟ ୨୫୦-୩୦୦ ଗ୍ରାମ ମଞ୍ଜି ମିଳିପାରିବ । ବିହନ ଉତ୍ପାଦନ ପାଇଁ ଲଙ୍କାଗୁଡ଼ିକ ଗଛରେ ଭଲ ଭାେବେ ପାଚିଯିବା ଦରକାର । ଏହାକୁ ଶୁଖାଇ ବିହନ ଉତ୍ପାଦନ କରାଯାଏ ।