ନରୱେ ରାଜଧାନୀର ଏକ ବାର ରେ ଆଖିବୁଜା ଗୁଳିମାଡ଼ : ୨ ମୃତ, ଅନେକ ଗୁରୁତର
ଓସଲୋ : ନରୱେର ରାଜଧାନୀ ଓସଲୋରେ ଏକ ସମଲିଙ୍ଗୀ ବାର ରେ ଆଖିବୁଜା ଗୁଳିମାଡ଼ । ଏହି ଗୁଳିକାଣ୍ଡରେ ଏପର୍ଯ୍ୟନ୍ତ ୨ ଜଣ ଲୋକ ମୃତ୍ୟୁବରଣ କରିଥିବା ବେଳେ ୧୪ ଜଣ ଗୁରୁତର ହୋଇଛନ୍ତି। ଗୁରୁତର ୧୪ ଜଣଙ୍କ ମଧ୍ୟରୁ ୫ ଜଣଙ୍କ ଅବସ୍ଥା ଅତ୍ୟନ୍ତ ସଙ୍କଟାପନ୍ନ ରହିଛି। ଆହତଙ୍କୁ ତୁରନ୍ତ ହସପିଟାଲରେ ଭର୍ତ୍ତି କରାଯାଇଥିଲା। ଜଣେ ବନ୍ଧୁକଧାରୀ ସାଧାରଣ ଲୋକଙ୍କୁ ଗୁଳିମାଡ଼ କରିଥିବା କୁହାଯାଉଛି । ସେହିପରି ପୁଲିସ୍ ମଧ୍ୟ ଆକ୍ରମଣକାରୀକୁ ଗିରଫ କରି ଅଧିକ ତଦନ୍ତ କରୁଛି। ପୁଲିସ୍ ମୁଖପାତ୍ର ଟୋର ବାରଷ୍ଟାଡ କହିଛନ୍ତି, ଲଣ୍ଡନ ପବ ଦେଇ ନିକଟସ୍ଥ କ୍ଲବ ଓ ଏହାର ଆଖପାଖ ଅଞ୍ଚଳରେ ଗୁଳିମାଡ଼ ଯୋଗୁ ଆତଙ୍କ ସୃଷ୍ଟି ହୋଇଥିଲା।
ଲଣ୍ଡନ ପବଟି କେନ୍ଦ୍ରୀୟ ଓସଲୋର ସମଲିଙ୍ଗୀ(ଗେ) ବାର ଓ ନାଇଟ କ୍ଲବ ପାଇଁ ବେଶ ପରିଚିତ। ଏହାକୁ ଟାର୍ଗେଟ କରି ଆକ୍ରମଣ କରାଯାଇଥିବା ସନ୍ଦେହ କରାଯାଉଥିବା ସେ କହିଛନ୍ତି। ପ୍ରତ୍ୟକ୍ଷଦର୍ଶୀଙ୍କ କହିବାନୁଯାୟୀ, ଜଣେ ବ୍ୟକ୍ତି କ୍ଲବ ଭିତରେ ବସି ବନ୍ଧୁକ କାଢି ଆଖିବୁଜା ଗୁଳିଚାଳନା କରିଥିଲା। ଲୋକମାନେ କୌଣସି ପ୍ରକାର ଜୀବନ ବଞ୍ଚାଇ ଏଣେତେଣେ ଦୌଡିଥିଲେ। ହେଲେ ଦୁଇଜଣଙ୍କର ଘଟଣାରେ ପ୍ରାଣ ଚାଲିଯାଇଥିଲା। ଗୁଳିକାଣ୍ଡର କାରଣ ମଧ୍ୟ ଅସ୍ପଷ୍ଟ ଥିବା ଜଣାପଡିଛି ପୁଲିସ୍ ଘଟଣାସ୍ଥଳରେ ପହଞ୍ଚି ବାର କୁ ଚାରିପଟୁ ବନ୍ଦ କରିଦେଇଥିଲା ଓ ସ୍ଥିତିକୁ ନିୟନ୍ତ୍ରଣ କରିବାକୁ ଚେଷ୍ଟା କରିଥିଲା। ଗୁଳିକାଣ୍ଡ ବିଷୟରେ ଅଧିକ ତଦନ୍ତ ଚଳାଇଛି ପୋଲିସ। ଏହାପରେ ଜରୁରୀ ସେବାରେ ନିୟୋଜିତ କର୍ମଚାରୀ ଓ ଆମ୍ବୁଲାନ୍ସ ମଧ୍ୟ ଘଟଣାସ୍ଥଳରେ ପହଞ୍ଚିଥିଲେ। ଓସଲୋର ଲଣ୍ଡନ ପବ ଉପରେ ହେଲିକପ୍ଟର ବୁଲିବା ସହ ପୁଲିସ୍ ସାଇରନ ବଜାଇ ସହରବାସୀଙ୍କୁ ସତର୍କ କରାଇଥିଲା। ଆକ୍ରମଣର କିଛି ସମୟ ମଧ୍ୟରେ ହିଁ ଆକ୍ରମଣକାରୀକୁ ଗିରଫ କରାଯାଇଥିବା ପୋଲିସ ସୂତ୍ରରୁ ଜଣ ପଡିଛି I
Comments are closed, but trackbacks and pingbacks are open.