୨୯ରୁ ଭୁବନେଶ୍ୱରରେ ଡିଜିପି କନ୍‌ଫରେନ୍ସ: ଯୋଗଦେବେ ପ୍ରଧାନମନ୍ତ୍ରୀ ଓ ଗୃହମନ୍ତ୍ରୀ

ଭୁବନେଶ୍ୱର: ପ୍ରଥମ ଥର ପାଇଁ ଓଡ଼ିଶାରେ ହେବାକୁ ଯାଉଛି ସର୍ବଭାରତୀୟ ପୁଲିସ୍ ଡିଜି କନଫରେନ୍ସ। ଯୋଗ ଦେବେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ସହ ଗୃହମନ୍ତ୍ରୀ ଅମିତ ଶାହ ଏବଂ ଜାତୀୟ ସୁରକ୍ଷା ପରାମର୍ଶଦାତା ଅଜିତ ଡୋଭାଲ୍‌। ସମସ୍ତ ରାଜ୍ୟର ପୁଲିସ୍ ଡିଜିଙ୍କ ସହ ଅର୍ଦ୍ଧସାମରିକ ବାହିନୀଗୁଡ଼ିକର ମୁଖ୍ୟମାନେ ଏଥିରେ ଯୋଗଦେବେ। ସୀମା ସହିତ ଅନ୍ତରୀଣ ସୁରକ୍ଷା, ସାଇବର ଅପରାଧ କିପରି ନିୟନ୍ତ୍ରଣ ହେବ ତା’ଉପରେ ଏହି ସମ୍ମିଳନୀରେ ମାନସମନ୍ଥନ ହେବ। ଲୋକସେବା ଭବନ କନ୍‌ଫରେନ୍ସ ହଲରେ ନଭେମ୍ବର ୨୯ରୁ ଆରମ୍ଭ ହେବ ଏହି ୩ ଦିନିଆ କନଫରେନ୍ସ । ଏଥିପାଇଁ ପ୍ରସ୍ତୁତିକୁ ଜୋରଦାର କରିଛି ଓଡ଼ିଶା ପୁଲିସ। ଆଗାମୀ ଦିନରେ କଣ ରହିବ ପୁଲିସର ରୋଡମ୍ୟାପ୍‌, ସାଇବର୍ ସିକ୍ୟୁରିଟିକୁ କେମିତି ସୁଦୃଢ଼ କରାଯିବ, ଅନ୍ତରୀଣ ସୁରକ୍ଷା ଓ ଅନୁପ୍ରବେଶକାରୀ ଚ୍ୟାଲେଞ୍ଜକୁ କେମିତି ସାମ୍ନା କରିବେ ସରକାର ତାହା ଉପରେ ଆଲୋଚନା ହେବ। ଚଳିତ ମାସ ୨୯ ତାରିଖରୁ ଡିସେମ୍ବର ୧ ଯାଏଁ ଚାଲିବ ଏହି କନଫରେନ୍ସ। ବିଭିନ୍ନ ପ୍ରସଙ୍ଗକୁ ନେଇ ପାଖାପାଖି ୧୨ଟି ସେସନ୍ ରହିବ। ଖୋଦ୍ ଗୃହମନ୍ତ୍ରୀ ଅମିତ ଶାହ ୩ ଦିନ ଓଡ଼ିଶାରେ ରହି ସମସ୍ତ ସେସନରେ ଯୋଗ ଦେବେ। ବିଶେଷ କରି ଆତଙ୍କବାଦ ତଥା ସୀମା ସୁରକ୍ଷା, ଅନ୍ତରୀଣ ସୁରକ୍ଷା ଯେମିତି କି ମାଓ ସମସ୍ୟା, ଅନୁପ୍ରବେଶକାରୀ ସମସ୍ୟା ଉପରେ ହେବ ଆଲୋଚନା ।୨୦୨୬ ସୁଦ୍ଧା ଭାରତକୁ ମାଓମୁକ୍ତ କରିବା ଟାର୍ଗେଟ୍ କେମିତି ହାସଲ ହେବ ସେ ନେଇ ବି ସମୀକ୍ଷା ହେବ। ସେହିପରି ବଢୁଥିବା ସାଇବର୍ ଅପରାଧ, ଆର୍ଟିଫିସିଆଲ ଇଣ୍ଟେଲିଜେନ୍ସର ଅପବ୍ୟବହାର ଏବେ ବଡ଼ ଚାଲେଞ୍ଜ ପାଲଟିଛି। ତାକୁ କେମିତି ନିୟନ୍ତ୍ରଣରେ ରଖାଯିବ ସେ ନେଇ କନଫରେନ୍ସରେ ଗୁରୁତ୍ୱ ଦିଆଯିବ। ଜେଲ୍ ସଂସ୍କାର ସହ ବିଭିନ୍ନ ରାଜ୍ୟର ପୁଲିସ୍ ବ୍ୟବସ୍ଥାକୁ ନେଇ ମଧ୍ୟ ଆଲୋଚନା ହେବ। ଏହାବ୍ୟତୀତ ୱାଇଲ୍ଡ ଲାଇଫ୍ ଟ୍ରାଫିକିଂ ଏବଂ ଡ୍ରଗ୍ସ ଚାଲାଣକୁ ରୋକିବା ପାଇଁ ବିଭିନ୍ନ ରାଜ୍ୟ ପୁଲିସ ମଧ୍ୟରେ ସମନ୍ୱୟ କେମିତି ରକ୍ଷା ହେବ ତାଉପରେ ବି ଫୋକସ୍ ଦିଆଯିବ। ସମୁଦାୟ ୯୦ ଜଣିଆ ଡେଲିଗେସନ ମଧ୍ୟ ଏଥିରେ ଯୋଗଦେବାର କାର୍ଯ୍ୟକ୍ରମ ରହିଛି। ଏଥିପାଇଁ ଆରମ୍ଭ ହୋଇଛି ପ୍ରସ୍ତୁତି। ଓଡ଼ିଶା ପୁଲିସ ପକ୍ଷରୁ ସମୀକ୍ଷା ବୈଠକ କରାଯାଇ କଫରେନ୍ସକୁ ସଫଳ କରିବାକୁ ମଧ୍ୟ ଦାୟିତ୍ୱ ବଣ୍ଟା ସରିଛି। କିଛି ଡେଲିଗେସନଙ୍କ ପାଇଁ ଘରୋଇ ହୋଟେଲ ବୁକ୍ ସରିଥିବା ବେଳେ ଆଉ କିଛି ଗେଷ୍ଟଙ୍କ ପାଇଁ ରାଜ୍ୟ ଅତିଥି ଭବନ ପ୍ରସ୍ତୁତ ହେଉଛି। ପୂର୍ବରୁ ସମସ୍ତ ଡିଜି କନଫରେନ୍ସ ଦିଲ୍ଲୀରେ ଅନୁଷ୍ଠିତ ହେଉଥିଲା। ୨୦୧୪ରେ ବିଜେପି ସରକାରକୁ ଆସିବା ପରେ ବିଭିନ୍ନ ରାଜ୍ୟର ମୁଖ୍ୟାଳୟଗୁଡିକରେ ଏହି କନଫରେନ୍ସ ଅନୁଷ୍ଠିତ ହେଉଛି। ଚଳିତ ବର୍ଷ ଜାନୁଆରୀ ୫ରୁ ୭ ତାରିଖ ମଧ୍ୟରେ ରାଜସ୍ଥାନର ଜୟପୁରରେ ଅନୁଷ୍ଠିତ ହୋଇଥିଲା ୫୮ତମ ଡିଜିପି ସମ୍ମିଳନୀ। ଓଡ଼ିଶା ଏବେ ପ୍ରଧାନମନ୍ତ୍ରୀଙ୍କ ଫୋକସରେ ଥିବାରୁ ପ୍ରଥମ ଥର ପାଇଁ ଓଡ଼ିଶାରେ ଏହି କନଫରେନ୍ସ ଅନୁଷ୍ଠିତ ହେବାକୁ ଯାଉଛି।